ഡാലസ്: ജൂലൈ ഒന്നാം തീയതി ശനിയാഴ്ച സംഘടിപ്പിക്കുന്ന നൂറ്റിപ്പതിനാറാമത് അമേരിക്കൻ മലയാളി സാഹിത്യ സല്ലാപം 'സാംസി കൊടുമണിനൊപ്പം' എന്ന പേരിലായിരിക്കും നടത്തുക. അമേരിക്കൻ മലയാളികൾക്കിടയിൽ അറിയപ്പെടുന്ന എഴുത്തുകാരനാണ് സാംസി കൊടുമൺ. വിചാരവേദി, ലാന എന്നിവയുടെ നേതൃനിരയിൽ പ്രവർത്തിക്കുന്ന അദ്ദേഹം ഒരു നല്ല സംഘാടകൻ കൂടിയാണ്.

ഈ സല്ലാപത്തിൽ പങ്കെടുക്കുവാനും, സാംസി കൊടുമണിനെക്കുറിച്ചും അദ്ദേഹം മലയാള ഭാഷയ്ക്കും സാഹിത്യത്തിനും ചെയ്യുന്ന സേവനങ്ങളെക്കുറിച്ചും കൂടുതൽ അറിയുവാനും, അമേരിക്കൻ മലയാളികളുമായി ബന്ധപ്പെട്ട മറ്റ് സാമൂഹിക സാഹിത്യ സാംസ്‌കാരിക ഭാഷാ വിഷയങ്ങൾ വിശദമായി ചർച്ച ചെയ്യുവാനും താത്പര്യമുള്ള എല്ലാ നല്ല ആളുകളെയും അമേരിക്കൻ മലയാളി സാഹിത്യ സല്ലാപത്തിലെയ്ക്ക് സ്വാഗതം ചെയ്യുന്നതായി ഭാരവാഹികൾ അറിയിച്ചു.

2017 ജൂൺ മൂന്നാം തീയതി ശനിയാഴ്ച സംഘടിപ്പിച്ച നൂറ്റിപ്പതിനഞ്ചാമത് അമേരിക്കൻ മലയാളി സാഹിത്യ സല്ലാപം 'ഡോ. പി. ഹരികുമാറിനൊപ്പം' എന്ന പേരിലാണ് നടത്തിയത്. അദ്ദേഹത്തിന്റെതായി ധാരാളം ശാസ്ത്ര സാഹിത്യ ഗ്രന്ഥങ്ങൾ മലയാള ഭാഷയിൽ പ്രസിദ്ധീകരിച്ചിട്ടുണ്ട്. പ്രവാസി മലയാളിയും മലയാള ഭാഷയെയും സാഹിത്യത്തെയും സ്‌നേഹിക്കുകയും ആദരിക്കുകയും അതിന്റെ വളർച്ചയ്ക്കായി പരിശ്രമിക്കുകയും ചെയ്യുന്ന ആളാണ് ഡോ. ഹരികുമാർ. അന്തരിച്ച ജനപ്രിയ കവി അയ്യപ്പന്റെ സ്മരണയ്ക്കായി സംഘടിപ്പിച്ചിട്ടുള്ള അയ്യപ്പൻ ട്രസ്റ്റ്, മലയാള പുസ്തക പ്രസിദ്ധീകരണ മേഖലയിൽ പുതിയ പരീക്ഷണങ്ങളുമായി പ്രവേശിച്ചിരിക്കുന്ന 'പുലിസ്റ്റർ ബുക്‌സ്' എന്നിവയുടെ പ്രതിനിധി കൂടിയാണ് ഡോ. പി. ഹരികുമാർ. ഡോ. പി. ഹരികുമാറിനെക്കുറിച്ചും 'അയ്യപ്പൻ ട്രസ്റ്റ്', 'പുലിസ്റ്റർ ബുക്‌സ്' എന്നിവയെക്കുറിച്ചും കൂടുതൽ മനസിലാക്കത്തക്കവിധം ചോദ്യോത്തരങ്ങളും ചർച്ചകളും വളരെ പ്രയോജനകരമായിരുന്നു.

ഡോ. എൻ. പി. ഷീല, ഡോ. രാജൻ മർക്കോസ്, തോമസ് കെ, വർഗീസ്, വർഗീസ് എബ്രഹാം ഡെൻവർ, രാജു തോമസ്, യു. എ. നസീർ, സജി കരിമ്പന്നൂർ, പി. ടി. പൗലോസ്, അലക്‌സാൻഡർ മേപ്പിൾട്ടൺ, വർഗീസ് സ്‌കറിയ, ജോൺ തോമസ്, തോമസ് ഫിലിപ്പ് റാന്നി, ജോസഫ് മാത്യു, ജേക്കബ് കോര, സി. ആൻഡ്‌റൂസ് എന്നിവർ ചർച്ചയിൽ സജീവമായി പങ്കെടുത്തു. അമേരിക്കയിലെ വിവിധ ഭാഗങ്ങളിൽ നിന്നായി ധാരാളം ശ്രോതാക്കളും ഉണ്ടായിരുന്നു.

എല്ലാ മാസത്തിലെയും ആദ്യ ശനിയാഴ്ചയിലായിരിക്കും അമേരിക്കൻ മലയാളി സാഹിത്യ സല്ലാപം നടത്തുന്നത്. സല്ലാപത്തിൽ പങ്കെടുക്കുവാൻ എല്ലാ ആദ്യശനിയാഴ്ചയും രാവിലെ പത്തു മുതൽ പന്ത്രണ്ട് വരെ (ഈസ്റ്റേൺ സമയം) നിങ്ങളുടെ ടെലിഫോണിൽ നിന്നും താഴെ കൊടുത്തിരിക്കുന്ന ടെലിഫോൺ നമ്പരിലേയ്ക്ക് വിളിക്കാവുന്നതാണ്.

1-857-232-0476 കോഡ് 365923

ടെലിഫോൺ ചർച്ചയിൽ പങ്കെടുക്കുന്ന എല്ലാവർക്കും ചോദ്യങ്ങൾ ചോദിക്കാൻ അവസരം ഉണ്ടായിരിക്കും. jain@mundackal.com , internationalmalayalam@gmail.com എന്ന ഇ-മെയിൽ വിലാസങ്ങളിൽ ചർച്ചയിൽ അവതരിപ്പിക്കാൻ താത്പര്യമുള്ള വിഷയങ്ങളും ചോദ്യങ്ങളും മുൻകൂറായി അയച്ചു കൊടുക്കാവുന്നതാണ്. കൂടുതൽ വിവരങ്ങൾക്ക് ബന്ധപ്പെടുക: 813-389-3395 / 469-620-3269