രാജ്യത്ത് ലഹരി ഭീകരവാദത്തിന്റെ വെല്ലുവിളി നേരിടുന്നു; ലഹരിക്കടത്തിന്റെ കേന്ദ്രമാകാൻ ഇന്ത്യയെ അനുവദിക്കില്ലെന്ന് അമിത് ഷാ

അഹമ്മദാബാദ്: ഇന്ത്യ ലഹരി ഭീകരവാദത്തിന്റെ വെല്ലുവിളി നേരിടുകയാണെന്നു കേന്ദ്ര ആഭ്യന്തരമന്ത്രി അമിത് ഷാ. ലഹരിക്കടത്തിന്റെ കേന്ദ്രമാകാൻ ഇന്ത്യയെ അനുവദിക്കില്ല, അതു അവസാനിപ്പിക്കേണ്ടതുണ്ടെന്നും അദ്ദേഹം പറഞ്ഞു.

ഗുജറാത്ത് ഗാന്ധിനഗറിലെ നാഷനൽ ഫൊറൻസിക് സയൻസ് സർവകലാശാലയിൽ ലഹരി മരുന്നുകളുടെയും സൈക്കോട്രോപ്പിക് വസ്തുക്കളുടെയും ഗവേഷണത്തിനുള്ള സെന്റർ ഫോർ എക്‌സലൻസ് ഉദ്ഘാടനം ചെയ്യുകയായിരുന്നു അദ്ദേഹം.

'ഇന്ത്യ മറ്റൊരു അപകടത്തെ അഭിമുഖീകരിക്കുന്നു, അതാണു ലഹരി ഭീകരവാദം (നാർക്കോ ടെററിസം). ലഹരിമരുന്ന് നമ്മുടെ രാജ്യത്തു പ്രവേശിക്കാൻ കേന്ദ്ര സർക്കാർ അനുവദിക്കില്ല. ലഹരിയുടെ പാതയാകാൻ ഇന്ത്യയെ അനുവദിക്കരുതെന്നും തീരുമാനിച്ചിട്ടുണ്ട്. ലഹരിക്കടത്ത് അവസാനിപ്പിക്കേണ്ടതു പ്രധാനമാണ്. ശാസ്ത്രീയ തെളിവുകളുടെ അടിസ്ഥാനത്തിലായിരിക്കണം നമ്മുടെ അന്വേഷണം' അമിത് ഷാ പറഞ്ഞതായി ദ് വീക്ക് റിപ്പോർട്ട് ചെയ്തു.

'ഈ സർവകലാശാല മറ്റു സംസ്ഥാനങ്ങളിലേക്കും വ്യാപിക്കും. ഫൊറൻസിക് സയൻസിനു സംഭാവന നൽകാനുള്ള അവസരം നിരവധി യുവാക്കൾക്കു ലഭിക്കും. സൈബർ പ്രതിരോധത്തിലും അമിതവണ്ണം തടയുന്നതിനുള്ള ബരിയാട്രിക് ഗവേഷണത്തിലും നമ്മൾ സ്വയംപര്യാപ്തരാകും. വേഗത്തിലും കാര്യക്ഷമവുമായ അന്വേഷണത്തിനായി ശാസ്ത്രീയ സമീപനം ആവശ്യമാണ്. ക്രിമിനൽ കേസുകളിൽ ഫൊറൻസിക് സയൻസിനു നിർണായക റോളുണ്ട്' ഷാ വിശദീകരിച്ചു.