'ചേച്ചിയുടെ ജീവിതത്തിലെ പ്രധാനപ്പെട്ട നിമിഷമായിരുന്നു'; പിറന്നാൾ ദിനത്തിൽ അമൃത സുരേഷിന് സർപ്രൈസൊരുക്കി അഭിരാമി

കൊച്ചി: ഗായിക അമൃത സുരേഷിന്റെ പിറന്നാൾ ദിനത്തിൽ സംഗീതലോകത്തെ അവിസ്മരണീയ നിമിഷം പുനരാവിഷ്കരിച്ച കേക്ക് സമ്മാനിച്ച് സഹോദരിയും ഗായികയുമായ അഭിരാമി സുരേഷ്. സംഗീത ഇതിഹാസം എ.ആർ. റഹ്മാനോടൊപ്പം അമൃത വേദി പങ്കിട്ട നിമിഷമാണ് പിറന്നാൾ കേക്കിന്റെ രൂപത്തിൽ ഒരുക്കിയത്. അടുത്ത സുഹൃത്തുക്കളും കുടുംബാംഗങ്ങളും മാത്രം പങ്കെടുത്ത ലളിതമായ ചടങ്ങിലായിരുന്നു പിറന്നാൾ ആഘോഷം. ആഘോഷത്തിന്റെ വീഡിയോ അഭിരാമി തന്നെയാണ് സമൂഹമാധ്യമങ്ങളിൽ പങ്കുവെച്ചത്.

വീട്ടിൽ എല്ലാവർക്കും സുഖമില്ലാത്തതിനാലാണ് ഇത്തവണ വലിയ ആഘോഷങ്ങൾ ഒഴിവാക്കിയതെന്ന് അഭിരാമി വ്യക്തമാക്കി.അമൃതയുടെ ജീവിതത്തിലെ ഏറ്റവും പ്രധാനപ്പെട്ട നിമിഷം തന്നെ പിറന്നാൾ സമ്മാനമായി നൽകാനായിരുന്നു അഭിരാമിയുടെ തീരുമാനം. 'ചേച്ചിയുടെ ഏറ്റവും വലിയ ആഗ്രഹമായിരുന്നു എ.ആർ. റഹ്മാൻ സാറിനുവേണ്ടി പാടുക എന്നത്. അദ്ദേഹത്തോടൊപ്പം ഒരു സ്റ്റേജ് ഷോയും ചെയ്യാൻ കഴിഞ്ഞു. ആ പരിപാടിയുടെ ചിത്രമാണ് കേക്കിൽ പുനഃസൃഷ്ടിച്ചത്. ചേച്ചിയുടെ കഠിനാധ്വാനത്തിനും നേട്ടത്തിനുമുള്ള ഒരു അഭിനന്ദനമായാണ് ഈ സമ്മാനം,' അഭിരാമി പറഞ്ഞു.

കടുത്ത സൈബർ ആക്രമണങ്ങൾക്കിടയിലും പുഞ്ചിരിക്കാൻ മടിക്കാത്ത സഹോദരിക്ക് നൽകാൻ കഴിയുന്ന ഏറ്റവും വലിയ കാര്യമാണിതെന്നും അഭിരാമി കൂട്ടിച്ചേർത്തു. സർപ്രൈസ് കേക്ക് കണ്ട് അമൃത അത്ഭുതപ്പെടുന്നതും സന്തോഷിക്കുന്നതും വീഡിയോയിൽ വ്യക്തമാണ്.