ഇനി പുതിയത് വന്നാലും അത് മാത്രം ഞാൻ ചെയ്യില്ല; അത്രയും കഷ്ടപ്പെട്ടതല്ലേ...പെട്ടെന്ന് മറക്കാൻ പറ്റോ; എന്താണോ തോന്നുന്നത്..അതങ്ങ് ചെയ്യും; തുറന്നുപറഞ്ഞ് അനുമോൾ

ബിഗ് ബോസ് മലയാളം സീസൺ 7-ന്റെ വിജയിയായ അനുമോൾ, ഷോയിൽ നിന്നുള്ള തന്റെ പുതിയ വിശേഷങ്ങൾ യൂട്യൂബ് ചാനലിലൂടെ ആരാധകരുമായി പങ്കുവെച്ചു. ബിഗ് ബോസ് വീട്ടിലെ വാസത്തിനിടെ തനിക്ക് സംഭവിച്ച വലിയ മാറ്റങ്ങളിൽ ഒന്ന് ശരീരഭാരത്തിന്റെ കാര്യത്തിലാണെന്ന് താരം വെളിപ്പെടുത്തി.

ഷോയിലേക്ക് പോകുമ്പോൾ 56 കിലോ ആയിരുന്നു ഭാരം. എന്നാൽ 100 ദിവസത്തെ കഠിനമായ ടാസ്ക്കുകൾക്കും മാനസിക സമ്മർദ്ദങ്ങൾക്കും ശേഷം പുറത്തിറങ്ങിയപ്പോൾ അത് 49 കിലോയിലേക്ക് കുറഞ്ഞു. നിലവിൽ, പഴയ ആരോഗ്യനില വീണ്ടെടുക്കാൻ വേണ്ടി ഭാരം 50 കിലോയിൽ എത്തിച്ചിട്ടുണ്ട് എന്നും അനുമോൾ പറഞ്ഞു.

സമ്മാനമായി ലഭിക്കുന്ന പുതിയ കാറിനെക്കുറിച്ചും താരം സംസാരിച്ചു. വിജയിയായി പുതിയ കാർ കിട്ടുമെങ്കിലും, താൻ ഏറെ കഷ്ടപ്പെട്ട് വാങ്ങിയ പഴയ കാർ ഒരിക്കലും ഒഴിവാക്കില്ലെന്നും അനുമോൾ വ്യക്തമാക്കി. പലരുടെയും പരിഹാസങ്ങൾക്കിടയിലും ലോൺ എടുക്കാതെ കഷ്ടപ്പെട്ട് വാങ്ങിയതാണ് ആ കാറെന്നും അതിനോട് തനിക്ക് വൈകാരികമായ ബന്ധമുണ്ടെന്നും അവർ കൂട്ടിച്ചേർത്തു.

ബിഗ് ബോസ് ഹൗസിലെ തന്റെ പെരുമാറ്റത്തെക്കുറിച്ച് സംസാരിക്കുമ്പോൾ, "ക്യാമറ ഉണ്ടെന്നുപോലും ഞാൻ ശ്രദ്ധിച്ചിരുന്നില്ല. വീട്ടിലൊരു പ്രശ്നം ഉണ്ടായാൽ എന്താണോ ചെയ്യുന്നത്, അത് തന്നെയാണ് ഞാൻ അവിടെയും ചെയ്തത്," എന്ന് അനുമോൾ പറഞ്ഞു. തന്റെ പെരുമാറ്റം തികച്ചും സ്വാഭാവികമായിരുന്നുവെന്നും താരം ഉറപ്പിച്ചു പറയുന്നു.