'ആരോപിക്കപ്പെട്ട കുറ്റം തെളിയുന്നതുവരെ നിങ്ങൾ നിരപരാധിയാണ്, ഇനി വരുന്നിടത്തു വെച്ചു കാണാം'; ആരേയും ധിക്കരിച്ചെന്ന് പറയാനാകില്ല; രാഹുൽ മാങ്കൂട്ടത്തിലിന് പിന്തുണയുമായി സീമ ജി. നായർ
തിരുവനന്തപുരം: ലൈംഗികാരോപണത്തെത്തുടർന്ന് കോൺഗ്രസ് പാർട്ടിയിൽ നിന്ന് സസ്‌പെൻഡ് ചെയ്യപ്പെട്ട എം.എൽ.എ രാഹുൽ മാങ്കൂട്ടത്തിലിന് പിന്തുണയുമായി നടി സീമ ജി. നായർ വീണ്ടും രംഗത്ത്. ആരോപണവിധേയനായ കുറ്റം തെളിയിക്കപ്പെടുന്നതുവരെ രാഹുൽ നിരപരാധിയാണെന്ന് സീമ ജി. നായർ ഫെയ്‌സ്ബുക്കിലൂടെ അറിയിച്ചു. സസ്‌പെൻഷനു ശേഷം നിയമസഭയിൽ രാഹുൽ മാങ്കൂട്ടത്തിൽ എത്തിയതിനെക്കുറിച്ചായിരുന്നു സീമയുടെ പ്രതികരണം.
ആരോപണങ്ങൾ ഉയർന്നുവന്ന ഘട്ടത്തിലും രാഹുലിനെ പിന്തുണച്ച് അവർ രംഗത്തെത്തിയിരുന്നു. 'കുറ്റം തെളിയിക്കപ്പെടുന്നതുവരെ രാഹുൽ നിരപരാധിയാണ്. നിലവിൽ ഒരു പാർട്ടിയിലും അംഗമല്ലാത്തതിനാൽ ആരെയും ധിക്കരിച്ചു എന്ന് പറയാനാവില്ല. സ്വതന്ത്രനായതിനാൽ സ്വന്തമായി തീരുമാനമെടുക്കാം,' സീമ ഫെയ്‌സ്ബുക്കിൽ കുറിച്ചു.
സീമ ജി നായരുടെ ഫെയ്‌സ്ബുക്ക് കുറിപ്പിന്റെ പൂർണരൂപം:
'വരുമോ ,വരില്ല ,വരില്ലേ ,വരാതിരിക്കില്ല ,വരുമായിരിക്കും ,വന്നു ..ഇനി വരുന്നിടത്തു വെച്ചു കാണാം അല്ലേ ..രാഹുലിന്റെ മേൽ ആരോപിക്കപ്പെട്ട കുറ്റം തെളിയുന്നതുവരെ നിങ്ങൾ നിരപരാധി ആണ്‌ ..(ഇപ്പോൾ നിലവിൽ ഒരു പാർട്ടിയിലും അംഗമല്ലാത്തതുകൊണ്ട് ,പ്രാഥമിക അംഗത്വം പോലും ഇല്ലാത്തതുകൊണ്ട് ,ആരെയും ധിക്കരിച്ചു എന്ന് പറയാൻ ആകില്ല ..സ്വതന്ത്രൻ ആയതുകൊണ്ട് ,സ്വന്തമായി തീരുമാനമെടുക്കാം)'
നേരത്തെ, രാഹുൽ മാങ്കൂട്ടത്തിനെതിരായ ചർച്ചകളെക്കുറിച്ചും പ്രതിഷേധങ്ങളെക്കുറിച്ചും സംസാരിക്കവെ, മുൻ മുഖ്യമന്ത്രി ഉമ്മൻചാണ്ടിക്കെതിരായ തേജോവധമാണ് ഓർമ്മ വരുന്നതെന്ന് സീമ അഭിപ്രായപ്പെട്ടിരുന്നു. രാഹുൽ മാങ്കൂട്ടത്തിനെതിരെ ഔദ്യോഗിക പരാതികളൊന്നും ലഭിച്ചിട്ടില്ലെന്ന് അവർ ചൂണ്ടിക്കാട്ടി. ഏതെങ്കിലും ഒരു വ്യക്തിക്ക് തെറ്റുപറ്റിയാൽ അതിൽ രണ്ട് പേർക്കും പങ്കുണ്ടെന്നും ഒരു പക്ഷത്തെ മാത്രം കുറ്റപ്പെടുത്താനാവില്ലെന്നും സീമ അന്ന് പറഞ്ഞിരുന്നു.