'വൈ ഷുഡ്..ഐ മാൻ..; ഐആം പുഷ്പരാജ് താഴത്തില്ലടാ..!!'; മാസ്ക് മാറ്റണമെന്ന് എയർപോർട്ടിലെ സുരക്ഷാ ഉദ്യോഗസ്ഥൻ; മാറാൻ മടിച്ച് അല്ലു; സോഷ്യൽ മീഡിയയിൽ വ്യാപക വിമർശനം
മുംബൈ: വിമാനത്താവളത്തിലെ സുരക്ഷാ നടപടികൾക്കിടെ തെലുഗ് സൂപ്പർ താരം അല്ലു അർജുൻ മാസ്ക് മാറ്റാൻ പ്രകടിപ്പിച്ച മടി ഇപ്പോൾ സോഷ്യൽ മീഡിയയിൽ വലിയ വിവാദങ്ങൾക്ക് തിരി കൊളുത്തിയിരിക്കുകയാണ്. രാജ്യസുരക്ഷയുടെ ഭാഗമായുള്ള അടിസ്ഥാനപരമായ നിയമങ്ങൾ പാലിക്കുന്നതിൽ സെലിബ്രിറ്റികൾക്കുള്ള ഉത്തരവാദിത്തത്തെക്കുറിച്ചുള്ള ഗൗരവതരമായ ചോദ്യങ്ങളും ഈ സംഭവത്തിലൂടെ ഉയർത്തുന്നു.
മുംബൈയിലെ ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളത്തിൽ വെച്ചാണ് സംഭവങ്ങളുടെ തുടക്കം. സുരക്ഷാ പരിശോധനയുടെ ഭാഗമായി, സി.ഐ.എസ്.എഫ് ഉദ്യോഗസ്ഥൻ തിരിച്ചറിയലിനായി അല്ലു അർജുനോട് അദ്ദേഹത്തിന്റെ മാസ്കും സൺഗ്ലാസ്സും മാറ്റാൻ ആവശ്യപ്പെട്ടു. ഈ നിർദ്ദേശത്തോട് താരം ആദ്യമേ തന്നെ ഉൾവലിയുന്ന മനോഭാവം പ്രകടിപ്പിക്കുകയും ഉദ്യോഗസ്ഥനുമായി സംസാരിക്കുകയും ചെയ്തു. ഈ ദൃശ്യങ്ങൾ അടങ്ങിയ ഒരു വീഡിയോ അതിവേഗം പ്രചരിച്ചതോടെയാണ് വിഷയം പൊതുശ്രദ്ധ നേടിയത്. ഏതാനും നിമിഷങ്ങൾക്കു ശേഷം താരം മാസ്ക് പെട്ടെന്ന് മാറ്റി മുഖം വ്യക്തമാക്കുകയും തുടർന്ന് യാത്രയ്ക്കുള്ള അനുമതി നേടുകയും ചെയ്തു.
അതേസമയം, ഈ സംഭവത്തിന്റെ ദൃശ്യങ്ങൾ പുറത്തുവന്നതോടെ താരത്തിന്റെ നിലപാടിനെതിരെ ശക്തമായ പ്രതികരണങ്ങൾ ഉയർന്നു. നിയമത്തിന് മുന്നിൽ എല്ലാവരും തുല്യരാണെന്നും, താരപരിവേഷം നിയമപരമായ നടപടിക്രമങ്ങളിൽ നിന്ന് ഒഴിഞ്ഞുമാറാനുള്ള ഉപാധിയല്ലെന്നും നിരവധി പേർ അഭിപ്രായപ്പെടുകയും ചെയ്തു. ഒരു അടിസ്ഥാന സുരക്ഷാ ചട്ടം പാലിക്കുന്നതിൽ കാണിച്ച താത്പര്യക്കുറവ്, പൊതുരംഗത്ത് പ്രവർത്തിക്കുന്ന ഒരു വ്യക്തിക്ക് ചേർന്നതല്ല എന്ന വിമർശനവും വ്യാപകമായി.