'നമ്മളെ ഓർത്ത് ലജ്ജ തോന്നുന്നു!, കൈ കൊടുക്കാതിരിക്കുന്നത് ബാലിശമായ പ്രവൃത്തി മാത്രമല്ല, അപമാനകരവും'; ഇന്ത്യൻ ടീമിനെ വിമർശിച്ച് ആനന്ദ് പട്‌വര്‍ധന്‍
കൊച്ചി: ഏഷ്യാ കപ്പിൽ പാകിസ്താൻ താരങ്ങളുമായി ഹസ്തദാനം ചെയ്യാതെ ഇന്ത്യൻ ക്രിക്കറ്റ് ടീം മടങ്ങിയതിനെതിരെ പ്രമുഖ സംവിധായകൻ ആനന്ദ് പട്‌വർധൻ രംഗത്തെത്തി. താരങ്ങളുടെ നടപടി 'ബാലിശവും അപമാനകരവുമാണ്' എന്ന് അദ്ദേഹം സാമൂഹിക മാധ്യമങ്ങളിലൂടെ പ്രതികരിച്ചു. 'നമ്മളെയോർത്ത് ലജ്ജിക്കുന്നു' എന്നും അദ്ദേഹം കുറിച്ചു.
ഏഷ്യാ കപ്പിലെ ഒരു മത്സരത്തിനു ശേഷം, മത്സരം പൂർത്തിയായിട്ടും ഇന്ത്യൻ താരങ്ങൾ പാകിസ്താൻ കളിക്കാർക്ക് കൈ കൊടുത്തില്ല. ക്രീസിൽ ഉണ്ടായിരുന്ന ക്യാപ്റ്റൻ സൂര്യകുമാർ യാദവും ശിവം ദുബെയും പാക് താരങ്ങളെ ശ്രദ്ധിക്കാതെ ഡ്രസ്സിങ് റൂമിലേക്ക് മടങ്ങി. ടോസ് സമയത്തും ക്യാപ്റ്റൻമാർ പരസ്പരം കൈ കൊടുത്തില്ല. ഈ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു.
ഇന്ത്യൻ താരങ്ങൾ ഹസ്തദാനം ചെയ്യുമെന്നും അവർക്ക് കൈ കൊടുക്കാൻ പാക് കളിക്കാർ കാത്തുനിന്നിരുന്നുവെന്നും റിപ്പോർട്ടുകളുണ്ട്. എന്നാൽ, അത് സംഭവിക്കാതെ പോയതും ഡ്രസ്സിങ് റൂമിന്റെ വാതിൽ അടച്ചതും പാക് താരങ്ങളെ നിരാശപ്പെടുത്തിയതായി പാക് പരിശീലകൻ പ്രതികരിച്ചു. മത്സരശേഷമുള്ള അവതരണ ചടങ്ങിൽ പാക് നായകൻ സൽമാൻ ആഗയും പങ്കെടുത്തില്ല.
പട്‌വർധന്റെ വിമർശനത്തെ അനുകൂലിച്ചും പ്രതികൂലിച്ചും നിരവധി പ്രതികരണങ്ങൾ വരുന്നുണ്ട്. കളിക്കാരെ കുറ്റപ്പെടുത്തേണ്ടതില്ലെന്നും അവർക്ക് മേൽ സമ്മർദ്ദമുണ്ടെന്നും ചിലർ വാദിക്കുന്നു. മത്സരം ബഹിഷ്കരിക്കുകയായിരുന്നു വേണ്ടതെന്ന അഭിപ്രായങ്ങളും ഉയർന്നു വന്നിട്ടുണ്ട്.