'ഏറ്റവും നന്നായി അഭിനയിച്ചത് ദംഗലില്‍; സിനിമയില്‍ സംഭവിച്ച ഒരു തെറ്റ് കണ്ടെത്തിയത് അമിതാഭ് ബച്ചന്‍'; ആമിര്‍ ഖാന്‍ പറയുന്നു
ഏറ്റവും നന്നായി അഭിനയിച്ചത് ദംഗലില്‍
മുംബൈ: ബോളിവുഡില്‍ ഏറ്റവും കൂടുതല്‍ പണം വാരിയ ചിത്രങ്ങളില്‍ ഒന്നാണ് ആമിര്‍ ഖാന്‍ നായകനായ 'ദംഗല്‍'. നിതേഷ് തിവാരിയുടെ സംവിധാനത്തില്‍ 2016ല്‍ ഇറങ്ങിയ ബയോഗ്രഫിക്കല്‍ സ്‌പോര്‍ട്‌സ് ഡ്രാമ 2000 കോടി രൂപയാണ് ആഗോള ബോക്‌സ് ഓഫിസില്‍നിന്ന് വാരിക്കൂട്ടിയത്.
ദംഗലിനെ തന്റെ കരിയറില്‍ തന്നെ ഏറ്റവും നന്നായി അഭിനയിച്ച ചിത്രമായി കണക്കാക്കുന്നുവെന്ന് ആമിര്‍ ഖാന്‍ വ്യക്തമാക്കി. എന്നാല്‍ ഒരു ഷോട്ടില്‍ മാത്രമാണ് കഥാപാത്രത്തെ തനിക്ക് നഷ്ടമായതെന്നും അത് ആദ്യം കണ്ടുപിടിച്ചത് അമിതാഭ് ബച്ചനാണെന്നും ആമിര്‍ ഖാന്‍ പറയുന്നു. 1988-ല്‍ പുറത്തിറങ്ങിയ തന്റെ ചിത്രമായ 'ഖയാമത് സേ ഖയാമത് തക്' പ്രദര്‍ശിപ്പിച്ച റെഡ് ലോറി ഫിലിം ഫെസ്റ്റിവലില്‍ സംസാരിക്കുകയായിരുന്നു ആമിര്‍.
'എനിക്ക് ഏറ്റവും ഇഷ്ടപ്പെട്ട സിനിമ ഏതാണെന്ന് പറയാന്‍ പ്രയാസമാണ്. ദംഗല്‍ ആണ് ഞാന്‍ ഏറ്റവും നന്നായി അഭിനയിച്ച സിനിമ. സിനിമയില്‍ ഒരു ഷോട്ട് മാത്രം ഞാന്‍ തെറ്റിച്ചു. അമിതാഭ് ബച്ചന്‍ വളരെ ഷാര്‍പ്പായ ആളായതിനാല്‍ അദ്ദേഹം അത് ശ്രദ്ധിച്ചു. ചിത്രത്തിലെ ഒരു ഗുസ്തി രംഗത്തിനിടയിലാണ് ആ തെറ്റ് പറ്റിയത്, ആ രംഗത്തില്‍ ഞാന്‍ 'യെസ്' എന്ന് പറയുന്നുണ്ട്, എന്നാല്‍ മഹാവീര്‍ ഫോഗട്ട് എന്ന കഥാപാത്രത്തിന് ഒരിക്കലും അങ്ങനെ എന്ന് പറയാന്‍ കഴിയില്ല. അദ്ദേഹം 'വാ' അല്ലെങ്കില്‍ 'ശബാഷ്' എന്നേ പറയു...എഡിറ്റിങ്ങിലും അത് വ്യക്തമായില്ല. എല്ലാ സിനിമകളിലും ഞാന്‍ എന്തെങ്കിലും തെറ്റ് ചെയ്തിട്ടുണ്ട്, ഒരു സിനിമയും പൂര്‍ണമല്ല' -ആമിര്‍ പറഞ്ഞു.
സിദ്ധര്‍ഥ് റോയ് കപൂറിന്റെ യു.ടി.വി മോഷന്‍ പിക്‌ചേഴ്‌സും ആമിര്‍ ഖാന്‍ പ്രൊഡക്ഷന്‍സും ചേര്‍ന്നാണ് 'ദംഗല്‍' നിര്‍മിച്ചത്. മഹാവീര്‍ സിങ്ങായി ആമിര്‍ ഖാന്‍ എത്തിയപ്പോള്‍ ഗീത ഫോഗട്ടിന്റെ വേഷത്തില്‍ ഫാത്തിമ സന ഷെയ്ഖ്, സെയ്‌റ വസീം എന്നിവരും ബബിത ഫോഗട്ടായി സന്യ മല്‍ഹോത്ര, സുഹാനി ഭട്‌നഗര്‍ എന്നിവരുമാണ് എത്തിയത്.