'ആ ചിത്രം ഒരു മാസ്റ്റര്പീസാണ്, ബയാന മോമിന്റേത് ലോക നിലവാരത്തിലുള്ള പ്രകടനം'; മലയാള ചിത്രത്തെ പ്രശംസിച്ച് ധനുഷ്
കൊച്ചി: മലയാള ചിത്രം 'എക്കോ'യെ പ്രശംസിച്ച് തമിഴ് ചലച്ചിത്രതാരം ധനുഷ്. നെറ്റ്ഫ്ലിക്സിലൂടെ ഒടിടി റിലീസിനെത്തിയ ചിത്രം മികച്ച പ്രതികരണം നേടി മുന്നേറുന്നതിനിടെയാണ് ധനുഷിന്റെ അഭിനന്ദനം. ചിത്രം ഒരു മാസ്റ്റർപീസാണെന്നും നടി ബിയാന മോമിൻറെ പ്രകടനം ലോകനിലവാരത്തിലുള്ളതാണെന്നും ധനുഷ് എക്സ് പ്ലാറ്റ്ഫോമിലൂടെ കുറിച്ചു. ദിൻജിത്ത് അയ്യത്താൻ സംവിധാനം ചെയ്ത ചിത്രത്തിന്റെ തിരക്കഥയും ഛായാഗ്രഹണവും നിർവഹിച്ചിരിക്കുന്നത് ബാഹുൽ രമേശാണ്.
"ചിത്രം ഒരു മാസ്റ്റർപീസ് ആണ്. നടി ബിയാന മോമിൻ അഭിനയത്തിനുള്ള എല്ലാ വലിയ അംഗീകാരങ്ങളും അർഹിക്കുന്നു. ലോക നിലവാരത്തിലുള്ള പ്രകടനം," ധനുഷ് തന്റെ എക്സ് പോസ്റ്റിൽ രേഖപ്പെടുത്തി. 2023 നവംബർ 21-നാണ് 'എക്കോ' തിയറ്ററുകളിൽ റിലീസ് ചെയ്തത്. ഡിസംബർ 31 മുതൽ നെറ്റ്ഫ്ലിക്സിൽ ചിത്രം സ്ട്രീമിംഗ് ആരംഭിച്ചു. മലയാളത്തിലെ കഴിഞ്ഞ വർഷത്തെ റിലീസുകളിൽ പ്രേക്ഷകപ്രശംസ ഏറെ നേടിയ ചിത്രങ്ങളിലൊന്നായിരുന്നു 'എക്കോ'. വലിയ പ്രീ-റിലീസ് ബഹളങ്ങളോ അവകാശവാദങ്ങളോ ഇല്ലാതെ എത്തിയ ചിത്രം, ആദ്യ ദിനം മുതൽ മികച്ച പ്രേക്ഷകാഭിപ്രായം നേടി.
പോസിറ്റീവ് മൗത്ത് പബ്ലിസിറ്റിയിലൂടെ തിയറ്ററുകളിൽ വലിയ ജനത്തിരക്കും മികച്ച കളക്ഷനും നേടാനായി. ചെറിയ ബജറ്റിൽ ഒരുങ്ങിയ ചിത്രം 50 കോടിക്ക് മുകളിൽ കളക്ഷൻ നേടിയിരുന്നു. ഒടിടി റിലീസോടെ മറുഭാഷാ പ്രേക്ഷകരിലേക്കും 'എക്കോ' എത്തിച്ചേരുകയും സോഷ്യൽ മീഡിയയിൽ വലിയ പ്രതികരണങ്ങൾക്ക് വഴിയൊരുക്കുകയും ചെയ്തു. 2024-ൽ തിയറ്ററുകളിലെത്തി മികച്ച പ്രേക്ഷകപ്രീതി നേടിയ 'കിഷ്കിന്ധാ കാണ്ഡം' എന്ന ചിത്രത്തിന്റെ രചയിതാവും സംവിധായകനും വീണ്ടും ഒന്നിക്കുന്നു എന്ന നിലയിൽ 'എക്കോ' റിലീസിന് മുൻപേ സിനിമാപ്രേമികൾക്കിടയിൽ ശ്രദ്ധ നേടിയിരുന്നു.
ബാഹുൽ രമേശിന്റെ രചനയാണ് ചിത്രത്തിന്റെ പ്രധാന ഹൈലൈറ്റ്. 'കിഷ്കിന്ധാ കാണ്ഡം', ജിയോ ഹോട്ട്സ്റ്റാറിന്റെ വെബ് സീരീസായ 'കേരള ക്രൈം ഫയൽസ് രണ്ടാം സീസണിനും' (സെർച്ച് ഫോർ സിപിഒ അമ്പിളി രാജു) ശേഷം ബാഹുൽ രമേശിന്റെ 'അനിമൽ ട്രൈലജി'യിലെ മൂന്നാമത്തെ ഭാഗമായാണ് 'എക്കോ' ഒരുക്കിയിരിക്കുന്നത്. യുവനായകനിരയിലേക്ക് ഉയർന്നു വരുന്ന സന്ദീപ് പ്രദീപിനും ഈ ചിത്രം വലിയ നേട്ടമാണ് സമ്മാനിച്ചത്. വിനീത്, നരെയ്ൻ, ബിനു പപ്പു, സൗരഭ് സച്ച്ദേവ, ബിയാന മോമിൻ തുടങ്ങിയ ശ്രദ്ധേയ താരനിരയും ചിത്രത്തിലുണ്ട്.