'പൃഥ്വിരാജിന് ഉണ്ണി മുകുന്ദന്റെ സ്വാഗ് ഇല്ല'; ഗ്ലിംപ്‌സ് വിഡിയോ പുറത്തിറങ്ങിയതിന് പിന്നാലെ താരതമ്യവുമായി സോഷ്യൽ മീഡിയ; സ്റ്റൈലിഷായി സിഗരറ്റ് വലിക്കാന്‍ അറിയാത്ത കാരണം വ്യക്തമാക്കി ആരാധകർ
കൊച്ചി: ഗ്ലിംപ്‌സ് വിഡിയോ പുറത്തിറങ്ങിയതിന് പിന്നാലെ മാര്‍ക്കോയുമായി ഖലീഫയെ താരതമ്യം ചെയ്ത് സോഷ്യൽ മീഡിയ. സിഗരറ്റ് വലിക്കുമ്പോൾ പൃഥ്വിരാജിന് ഉണ്ണി മുകുന്ദന്റെ സ്വാഗ് ഇല്ലെന്നാണ് സോഷ്യൽ മീഡിയയുടെ കണ്ടെത്തൽ. എന്നാൽ, ഈ വിമർശനങ്ങളെ തള്ളിക്കളയുന്ന നിലപാടുമായാണ് പൃഥ്വിരാജ് ആരാധകർ രംഗത്തെത്തിയിരിക്കുന്നത്. വൈശാഖ് സംവിധാനം ചെയ്യുന്ന 'ഖലീഫ'യുടെ ഗ്ലിംപ്‌സ് വീഡിയോ അടുത്തിടെയാണ് പുറത്തിറങ്ങിയത്. പൃഥ്വിരാജിന്റെ പിറന്നാളിന് ആരാധകർക്കുള്ള സമ്മാനമായാണ് ഇത് പുറത്തിറക്കിയിരിക്കുന്നത്.
സ്റ്റൈലിഷ് ആക്ഷൻ ചിത്രമായിരിക്കും 'ഖലീഫ'യെന്നും, പൃഥ്വിരാജിന്റെ കരിയറിലെ ഏറ്റവും വയലന്റായ ചിത്രമായിരിക്കും ഇതെന്നും വീഡിയോ സൂചിപ്പിക്കുന്നു. ജിനു എബ്രഹാം ആണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ഗ്ലിംപ്‌സ് വീഡിയോ പുറത്തിറങ്ങിയതിന് പിന്നാലെ, 'ഖലീഫ'യെ ഉണ്ണി മുകുന്ദൻ്റെ 'മാർക്കോ' എന്ന ചിത്രവുമായി താരതമ്യം ചെയ്യുന്ന പോസ്റ്റുകൾ സോഷ്യൽ മീഡിയയിൽ വ്യാപകമായി പ്രചരിക്കാൻ തുടങ്ങി. 'മാർക്കോ'യിലേതുപോലെ രക്തരൂക്ഷിതമായ ഒരു കഥയായിരിക്കും 'ഖലീഫ'യെന്നും, പൃഥ്വിരാജിന്റെ കഥാപാത്രവും സ്റ്റെപ്പുകളും 'മാർക്കോ'യിലെ ഉണ്ണി മുകുന്ദന്റെ കഥാപാത്രത്തോട് സാമ്യമുള്ളതാണെന്നും പലരും അഭിപ്രായപ്പെടുന്നു.
പ്രധാനമായും ചർച്ചയായിരിക്കുന്നത് ചിത്രത്തിലെ പൃഥ്വിരാജിൻ്റെ സിഗരറ്റ് വലിക്കുന്ന രംഗമാണ്. 'മാർക്കോ' എന്ന ചിത്രത്തിൽ ഉണ്ണി മുകുന്ദൻ്റെ സിഗരറ്റ് വലിക്കുന്നതിലെ സ്വാഗ് പൃഥ്വിരാജിനില്ലെന്നും, അദ്ദേഹത്തിൻ്റെ സിഗരറ്റ് വലിക്കാനുള്ള സ്റ്റൈൽ അത്ര മികച്ചതല്ലെന്നും പലരും അഭിപ്രായപ്പെടുന്നു. സോഷ്യൽ മീഡിയയിൽ ഇത് സംബന്ധിച്ച ട്രോളുകളും നിറയുന്നുണ്ട്. എന്നാൽ, ഈ താരതമ്യങ്ങളെയും വിമർശനങ്ങളെയും പൃഥ്വിരാജ് ആരാധകർ ശക്തമായി പ്രതിരോധിക്കുന്നു.
മലയാളത്തിലെ ഏറ്റവും മികച്ച ആക്ഷൻ താരങ്ങളിൽ ഒരാളാണ് പൃഥ്വിരാജ് എന്നും, ഉണ്ണി മുകുന്ദൻ രംഗത്ത് വരുന്നതിന് എത്രയോ മുമ്പേ തന്നെ പൃഥ്വിരാജ് ആക്ഷൻ രംഗങ്ങളിൽ അഭിനയിച്ച് കയ്യടി വാങ്ങിയിട്ടുണ്ടെന്നും അവർ ചൂണ്ടിക്കാണിക്കുന്നു. അഭിനയത്തിലും പൃഥ്വിരാജ് ഉണ്ണി മുകുന്ദനെക്കാൾ ഒരുപാട് മുന്നിലാണെന്നും ആരാധകർ വാദിക്കുന്നു. പൃഥ്വിരാജിൻ്റെ സിഗരറ്റ് വലിക്കാനുള്ള സ്റ്റൈലിനെക്കുറിച്ചുള്ള ട്രോളുകളെ ആരാധകർ പലതും അംഗീകരിക്കുന്നുണ്ട്. ഇതിനുള്ള കാരണം പൃഥ്വിരാജ് യഥാർത്ഥ ജീവിതത്തിൽ സിഗരറ്റ് വലിക്കാത്ത വ്യക്തിയാണ് എന്നതാണ്.
മുമ്പ് ഭരദ്വാജ് രംഗന് നൽകിയ ഒരു അഭിമുഖത്തിൽ പൃഥ്വിരാജ് തന്നെ ഇക്കാര്യം വ്യക്തമാക്കിയതിൻ്റെ ഭാഗങ്ങൾ ചൂണ്ടിക്കാണിച്ചാണ് ആരാധകർ താരത്തെ പിന്തുണയ്ക്കുന്നത്. തൻ്റെ പിതാവ് സ്ഥിരമായി സിഗരറ്റ് വലിക്കുന്ന വ്യക്തിയായിരുന്നു. അതിനാൽ സിഗരറ്റിൻ്റെ മണം പോലും തനിക്കിഷ്ടമല്ലെന്നും, താൻ ഇതുവരെ സിഗരറ്റ് വലിച്ചിട്ടില്ലെന്നും പൃഥ്വിരാജ് ആ അഭിമുഖത്തിൽ പറഞ്ഞിരുന്നു. ഈ വാക്കുകൾ നിരത്തിയാണ് ആരാധകർ ഇപ്പോൾ സോഷ്യൽ മീഡിയയിലെ ട്രോളുകൾക്ക് മറുപടി നൽകുന്നത്. യഥാർത്ഥ ജീവിതത്തിൽ സിഗരറ്റ് വലിക്കാത്ത ഒരാൾക്ക് സിഗരറ്റ് സ്റ്റൈലായി വലിക്കാൻ എങ്ങനെ അറിയുമെന്നും, അഭിനയത്തിന് വേണ്ടി മാത്രം ഇത്തരം രംഗങ്ങൾ ചെയ്യുന്നതിലെ ബുദ്ധിമുട്ട് പലരും മനസ്സിലാക്കണമെന്നും അവർ പറയുന്നു.