'ലെസ്ബിയനായാല്‍ തന്നെ എന്താണു കുഴപ്പം?; അവര്‍ക്കും ജീവിക്കണ്ടേ; ഈ ഭൂമി പുരുഷനും സ്ത്രീക്കും മതി എന്ന വാദത്തോടെല്ലാം എനിക്ക് യോജിപ്പില്ല'; ഞങ്ങള്‍ ലെസ്ബിയനാണെങ്കില്‍ മറ്റാര്‍ക്കെങ്കിലും എന്തെങ്കിലും പ്രശ്നമുണ്ടോ'; മഞ്ജു പത്രോസ്
കഴിഞ്ഞ കുറച്ചു നാളുകളായി നടി മഞ്ജു പത്രോസിന്റെയും സുഹൃത്ത് സിമി സാബുവിന്റെയും സൗഹൃദം വിമര്‍ശനങ്ങള്‍ക്കും പരിഹാസങ്ങള്‍ക്കും ഇടയാക്കിയിരുന്നു. ഒന്നിച്ച് വ്ളോഗ് ചെയ്യാന്‍ തുടങ്ങിയതിന് ശേഷം തങ്ങള്‍ ലെസ്ബിയന്‍സ് ആണോ എന്നാണ് പലരും ചോദിക്കുന്നത് എന്നും ഒരു നല്ല സൗഹൃദത്തെ ഒക്കെ ആളുകള്‍ എന്തൊക്കെ രീതിയിലേക്ക് ആണ് മാറ്റുന്നത് എന്ന് ഓര്‍ക്കുമ്പോള്‍ അതിശയമാണ് എന്നും മഞ്ജു ഒരു അഭിമുഖത്തില്‍ പറഞ്ഞിരുന്നു.
ഇപ്പോഴിതാ, തങ്ങളെ ലെസ്ബിയന്‍സ് എന്ന് വിളിക്കുന്നതിനോട് പ്രതികരിക്കുകയാണ് മഞ്ജു പത്രോസ്. 'ഞങ്ങള്‍ ലെസ്ബിയന്‍ കപ്പിള്‍ ആണെന്നൊക്കെ ആളുകള്‍ അവരുടെ സുഖത്തിനു വേണ്ടി പറയുന്നതാണ്. ഇനി ലെസ്ബിയനായാല്‍ തന്നെ എന്താണു കുഴപ്പം? അവര്‍ക്കും ജീവിക്കണ്ടേ. ഗേ ആയവര്‍ക്കും ലെസ്ബിയന്‍ ആയവര്‍ക്കും ഈ സമൂഹത്തില്‍ ജീവിക്കണം. ഈ ഭൂമി പുരുഷനും സ്ത്രീക്കും മതി എന്ന വാദത്തോടെല്ലാം എനിക്ക് യോജിപ്പില്ല' എന്നാണ് മഞ്ജു പറയുന്നത്.
ഞാനും സിമിയും ലെസ്ബിയന്‍സ് ആണെന്നിരിക്കട്ടെ. അങ്ങനെയാണെങ്കില്‍ തന്നെ എന്താണു തെറ്റ്? ഞങ്ങള്‍ ലെസ്ബിയനാണെങ്കില്‍ മറ്റാര്‍ക്കെങ്കിലും എന്തെങ്കിലും പ്രശ്നമുണ്ടോ എന്നും താരം ചോദിക്കുന്നു. തങ്ങള്‍ സമൂഹത്തിന് യാതൊരു പ്രശ്നവും സൃഷ്ടിക്കുന്നില്ല എന്നും മഞ്ജു പറയുന്നു. മനോരമയ്ക്ക് നല്‍കിയ അഭിമുഖത്തിലാണ് മഞ്ജു ഇക്കാര്യം സംസാരിച്ചത്.