കേരള സാരിയുടുത്ത് തലയില്‍ മുല്ലപ്പൂ ചൂടി വിമാനയാത്ര; മെല്‍ബണ്‍ വിമാനത്താവളത്തില്‍ 'മുല്ലപ്പൂ' കെണിയില്‍ നവ്യ നായര്‍ക്ക് ചുമത്തിയത് കനത്ത പിഴ; സംഭവിച്ചത് തെറ്റ് തന്നെയെന്ന് നടി; 'ഫൈന്‍ അടിക്കുന്നതിന് തൊട്ടു മുന്നേയുള്ള പ്രഹസനം' എന്ന് വീഡിയോയില്‍; അടുത്ത പി എസ് സി ചോദ്യമെന്ന് കമന്റുകള്‍
തിരുവനന്തപുരം: വിമാനയാത്രയില്‍ മുല്ലപ്പൂ കൈവശം വച്ചതിവ് നടി നവ്യ നായരില്‍ നിന്നും ഓസ്‌ട്രേലിയയിലെ മെല്‍ബണ്‍ രാജ്യാന്തര വിമാനത്താവളത്തില്‍ ഫൈന്‍ ഈടാക്കിയത് കഴിഞ്ഞ ദിവസമാണ്. ഒന്നേകാല്‍ ലക്ഷത്തോളം രൂപയാണ് നടിക്ക് പിഴയായി ഒടുക്കേണ്ടി വന്നത്. വിക്ടോറിയയിലെ മലയാളി അസോസിയേഷന്റെ ഓണപ്പരിപാടിയില്‍ പങ്കെടുക്കാനായാണ് നവ്യ ഓസ്‌ട്രേലിയയില്‍ എത്തിയത്. ഓണപ്പരിപാടിയില്‍ പ്രസംഗിക്കവെ നടി തന്നെയാണ് ഫൈനടിച്ച കാര്യം വെളിപ്പെടുത്തിയത്.
സംഭവം വൈറലായതിന് പിന്നാലെ ഫൈനിന് കാരണക്കാരനായ മുല്ലപ്പൂവിന്റെ ദൃശ്യങ്ങള്‍ പങ്കുവച്ചിരിക്കുകയാണ് നടി. എയര്‍പോര്‍ട്ടില്‍ നിന്നടക്കമുള്ള തന്റെ ദൃശ്യങ്ങള്‍ കൊര്‍ത്തിണക്കി കൊണ്ടാണ് റീല്‍സ് ചെയ്തിരിക്കുന്നത്. കേരള സാരിയുടുത്ത് തലയില്‍ മുല്ലപ്പൂ ചൂടിയാണ് നവ്യയുടെ ഫ്‌ലെറ്റ് യാത്ര. 'ഫൈന്‍ അടിക്കുന്നതിന് തൊട്ടുമുന്‍പുള്ള പ്രഹസനം' എന്നാണ് പോസ്റ്റിന് ക്യാപ്ഷന്‍ നല്‍കിയിരിക്കുന്നത്. നിരവധി പേരാണ് പോസ്റ്റിന് താഴെ രസകരമായ കമന്റിട്ടിരിക്കുന്നത്. 'ഐ എം ഫൈന്‍, താങ്ക്യൂ' എന്നായിരുന്നു നടന്‍ രമേഷ് പിഷാരടി കുറിച്ചത്. 'അടുത്ത പി എസ് സി ചോദ്യം: മുല്ലപ്പൂ വച്ചതിന് ഏറ്റവും വലിയ ഫൈന്‍ കിട്ടിയ മലയാള നടി ആര്' തുടങ്ങി വറൈറ്റി കമന്റുകളും കൂട്ടത്തിലുണ്ട്.
ഓസ്ട്രേലിയയുടെ ജൈവസുരക്ഷാ നിയമപ്രകാരമാണ് നവ്യയില്‍ നിന്നും പിഴ ഈടാക്കിയത്. വിദേശത്ത് നിന്നുള്ള ചെടികള്‍, പൂക്കള്‍ എന്നിവയ്ക്ക് ഓസ്‌ട്രേലിയയില്‍ വിലക്കുണ്ട്. 15 സെന്റിമീറ്റര്‍ നീളമുള്ള മുല്ലപ്പൂവാണ് തന്റെ പക്കല്‍ ഉണ്ടായിരുന്നതെന്ന് നവ്യ പറയുന്നു. 'ഇവിടേക്ക് വരുന്നതിന് മുന്‍പ് അച്ഛനാണ് എനിക്ക് മുല്ലപ്പൂവ് വാങ്ങി തന്നത്. രണ്ട് കഷ്ണങ്ങളാക്കി മുറിച്ചാണ് എനിക്ക് തന്നത്. കൊച്ചി മുതല്‍ സിങ്കപ്പൂര്‍ വരെ ഒരു കഷ്ണം മുടിയില്‍ ചൂടാന്‍ അച്ഛന്‍ പറഞ്ഞു. സിങ്കപ്പൂരില്‍ നിന്ന് രണ്ടാമത്തെ കഷ്ണം ചൂടാമെന്നും അത് ഹാന്‍ഡ്ബാഗില്‍ വയ്ക്കാനും അച്ഛന്‍ പറഞ്ഞു. ഒരു ക്യാരിബാഗിലാക്കി ഞാന്‍ മുല്ലപ്പൂവ് എന്റെ ഹാന്‍ഡ് ബാഗില്‍ വച്ചു. എന്നാല്‍ അത് നിയമവിരുദ്ധമാണെന്ന് എനിക്ക് അറിയില്ലായിരുന്നു. അറിവില്ലായ്മ ഒഴിവുകഴിവല്ല എന്ന് എനിക്കറിയാം. 15 സെന്റീമീറ്റര്‍ മുല്ലപ്പൂ കൊണ്ടുവന്നതിന് അധികൃതര്‍ എന്നോട് 1,980 ഡോളര്‍ പിഴ അടയ്ക്കാന്‍ ആവശ്യപ്പെട്ടു. തെറ്റ് തെറ്റ് തന്നെയാണ് എന്ന് എനിക്ക് അറിയാം. പക്ഷേ അത് മനഃപൂര്‍വമായിരുന്നില്ല. 28 ദിവസത്തിനകം പിഴ അടയ്ക്കണമെന്നാണ് അവര്‍ പറഞ്ഞത്'- നവ്യ പറഞ്ഞു.