അച്ഛൻ ലീവിന് വരുന്ന ദിവസം കലണ്ടറിൽ വട്ടമിട്ട് അമ്മ കാത്തിരിക്കും'; ജീവിതത്തില്‍ കണ്ട ആദ്യ പ്രണയം അവരുടേതായിരുന്നു; അച്ഛന്റെ യൂണിഫോം കെട്ടിപ്പിടിച്ചിരുന്ന് കരഞ്ഞിട്ടുണ്ടെന്നും രജിഷ വിജയൻ
കൊച്ചി: താന്‍ ജീവിതത്തില്‍ കണ്ട ആദ്യ പ്രണയം തന്റെ അച്ഛന്റേയും അമ്മയുടേയുമാണെന്ന് തുറന്ന് പറഞ്ഞ് നടി രജിഷ വിജയൻ. ആര്‍മി ഉദ്യോഗസ്ഥനായിരുന്നു രജിഷയുടെ അച്ഛന്‍. അതുകൊണ്ട് തന്നെ അച്ഛനും അമ്മയും അകലങ്ങളിലായിരുന്നു. അച്ഛന്‍ ലീവിന് വരുന്നത് കാത്തിരുന്നതിനെക്കുറിച്ചും രജിഷ പറയുന്നു. ഒരു തമിഴ് യൂട്യൂബ് ചാനലിന് നൽകിയ അഭിമുഖത്തിലാണ് ഹൃദയസ്പർശിയായ ഓർമ്മകൾ പങ്കുവെച്ചത്.
രജിഷയുടെ അച്ഛൻ സൈന്യത്തിൽ ആയിരുന്നതിനാൽ വർഷത്തിൽ രണ്ടു മാസത്തെ ലീവിനാണ് വീട്ടിൽ വന്നിരുന്നത്. "ജീവിതത്തിൽ ഞാൻ ആദ്യം കണ്ട പ്രണയകഥ എൻ്റെ അച്ഛൻ്റേയും അമ്മയുടേയുമായിരുന്നു. അച്ഛൻ പട്ടാളത്തിലായിരുന്നതിനാൽ വർഷത്തിൽ കുറച്ച് ദിവസങ്ങളേ വരുള്ളൂ. അമ്മ ആ ദിവസം കലണ്ടറിൽ വട്ടമിട്ട് കാത്തിരിക്കും," രജിഷ പറഞ്ഞു. അകന്നു കഴിയുന്നവരുടെ പ്രണയബന്ധം അങ്ങനെയുള്ളതായിരിക്കുമെന്നും തന്നെക്കാൾ അച്ഛനെ കാത്തിരുന്നത് അമ്മയായിരിക്കുമെന്നും അവർ കൂട്ടിച്ചേർത്തു.
മാതാപിതാക്കൾ അടുത്ത് ഉണ്ടായിരിക്കുന്നത് കുട്ടികളുടെ കാര്യത്തിൽ നല്ലതാണെങ്കിലും എല്ലാവർക്കും ആ ഭാഗ്യം ലഭിക്കില്ലെന്നും രജിഷ ചൂണ്ടിക്കാട്ടി. അച്ഛൻ ഫീൽഡിൽ ആയിരുന്നതിനാൽ, അദ്ദേഹത്തിന്റെ യൂണിഫോമും വാച്ചും കെട്ടിപ്പിടിച്ച് താൻ കരഞ്ഞിട്ടുണ്ട്. അക്കാലത്ത് ഫോണുകളില്ലാതിരുന്നതിനാൽ കത്തുകളായിരുന്നു പ്രധാന ആശ്രയം. കത്തുകളിലെ എഴുത്ത് വായിക്കാൻ അറിയില്ലായിരുന്നെങ്കിലും താൻ അത് വായിച്ചുകൊണ്ടിരിക്കുമായിരുന്നു എന്നും നടി ഓർമ്മിച്ചു.
അമ്മയോടൊപ്പം കൂടുതൽ സമയം ചെലവഴിച്ചിട്ടും അച്ഛനോടായിരുന്നു തനിക്ക് കൂടുതൽ ആത്മബന്ധം തോന്നിയിരുന്നതെന്നും, തൻ്റെ ഉള്ളിലെ കരുതലും സംരക്ഷണ സ്വഭാവവും അങ്ങനെ വന്നതാണെന്നും രജിഷ വെളിപ്പെടുത്തി. അച്ഛൻ സൈന്യത്തിൽ നിന്ന് വിരമിച്ച് പിന്നീട് സിബിഐയിൽ ചേർന്നു. അവിടെനിന്നും വിരമിച്ച് ഇപ്പോൾ വീട്ടിൽ സുരക്ഷിതനായി കഴിയുകയാണ്. എന്നിരുന്നാലും, താൻ ഏത് സെറ്റിൽ പോയാലും മറ്റുള്ളവരുടെ കാര്യത്തിൽ അതീവ ശ്രദ്ധാലുവായിരിക്കും എന്നും രജിഷ പറഞ്ഞു.