'അന്ന് ചെമ്മീന് 5 അവാർഡുകളാണ് ലഭിച്ചത്, ഒരു മെഡൽ അഞ്ച് പവൻ '; സ്വർണ്ണത്തിൽ തീർത്ത ബോട്ടിന്റെ മാതൃകയിലുള്ള സ്പെഷ്യൽ അവാർഡും കിട്ടി'; അതൊക്കെ അപ്പോൾ തന്നെ ഉരുക്കി മാല പണിതെന്നും ഷീല

കൊച്ചി: 1965-ൽ പുറത്തിറങ്ങിയ മലയാളത്തിലെ എക്കാലത്തെയും മികച്ച ചിത്രങ്ങളിലൊന്നായ 'ചെമ്മീൻ' നേടിയ പുരസ്കാരങ്ങളെക്കുറിച്ച് നടി ഷീലയുടെ വെളിപ്പെടുത്തലുകൾ ശ്രദ്ധേയമാകുന്നു. ചിത്രത്തിലെ പ്രധാന താരങ്ങൾ, സംവിധായകൻ, നിർമ്മാതാവ് എന്നിവർക്ക് അഞ്ചു പവൻ വീതം തൂക്കമുള്ള സ്വർണ്ണ മെഡലുകൾ ലഭിച്ചിരുന്നുവെന്ന് ഷീല വ്യക്തമാക്കി. ബിഹൈൻഡ് വുഡ്സ് തമിഴിന് നൽകിയ അഭിമുഖത്തിലാണ് ഷീല ഇക്കാര്യം പറഞ്ഞത്.

സത്യൻ, ഷീല, മധു എന്നിവർക്കൊപ്പം നിർമ്മാതാവിനും സംവിധായകൻ രാമു കാര്യാട്ടിനും ഈ സ്വർണ്ണ മെഡലുകൾ ലഭിച്ചതായി അവർ ഓർത്തെടുത്തു. അന്നത്തെ കാലത്ത് അഞ്ചു പവൻ തൂക്കമുള്ള മെഡലുകൾ ലഭിച്ചത് വലിയ അംഗീകാരമായിരുന്നെന്നും ഷീല പറഞ്ഞു. അവതാരകയുടെ ചോദ്യത്തിന് മറുപടിയായി, മെഡലുകൾ അപ്പോൾ തന്നെ ഉരുക്കി മാല പണിതെന്നും അവർ കൂട്ടിച്ചേർത്തു.

'ചെമ്മീനി'ന് ലഭിച്ച മറ്റൊരു പ്രത്യേക പുരസ്കാരത്തെക്കുറിച്ചും ഷീല സൂചിപ്പിച്ചു. ബോട്ടിന്റെ മാതൃകയിലുള്ള, മുഴുവനായും സ്വർണ്ണത്തിൽ നിർമ്മിച്ച ഒരു സ്‌പെഷ്യൽ പുരസ്കാരം ചിത്രത്തിന് ലഭിച്ചിരുന്നു. എത്ര പവൻ തൂക്കമുണ്ടെന്ന് കൃത്യമായി ഓർക്കുന്നില്ലെങ്കിലും അത് വളരെ വിലപ്പെട്ടതായിരുന്നുവെന്നും ഷീല വിശദീകരിച്ചു.

തകഴി ശിവശങ്കരപ്പിള്ളയുടെ നോവലിനെ ആസ്പദമാക്കി രാമു കാര്യാട്ട് സംവിധാനം ചെയ്ത 'ചെമ്മീൻ' മലയാളത്തിലെ ആദ്യത്തെ കളർ ചിത്രമെന്ന ഖ്യാതിയോടെ നിരവധി പുരസ്കാരങ്ങൾ വാരിക്കൂട്ടിയിരുന്നു. രാഷ്ട്രപതിയുടെ സുവർണ്ണ കമലം ഉൾപ്പെടെയുള്ള ദേശീയ പുരസ്കാരങ്ങളും ചിത്രത്തിന് ലഭിച്ചിട്ടുണ്ട്. ഷീല, സത്യൻ, മധു, കൊട്ടാരക്കര ശ്രീധരൻ നായർ തുടങ്ങിയ പ്രതിഭകൾ അണിനിരന്ന ചിത്രത്തിന്റെ തിരക്കഥ എസ്.എൽ. പുരം സദാനന്ദൻ നിർവ്വഹിച്ചു.