ഞാനാണ് ആദ്യം അക്കാര്യം അവനോട് തുറന്നുപറഞ്ഞത്; ആദ്യം പറയാൻ പേടിച്ചാണ് വിളിച്ചത്; പിന്നെ ആർക്കും കുഴപ്പം ഇല്ലായിരുന്നു; തുറന്നുപറഞ്ഞ് നടി സ്വാസിക

കൊച്ചി: പ്രശസ്ത നടിയും അവതാരകയുമായ സ്വാസിക വിജയ് തൻ്റെ ഇന്റർ കാസ്റ്റ് വിവാഹത്തെക്കുറിച്ചുള്ള പുതിയ വെളിപ്പെടുത്തലുകളുമായി രംഗത്തെത്തി. ടെലിവിഷൻ താരവും മോഡലുമായ പ്രേം ജേക്കബാണ് സ്വാസികയുടെ ഭർത്താവ്. ഇരുവരും ഏറെ നാളത്തെ പ്രണയത്തിന് ശേഷമാണ് വിവാഹിതരായത്. ഒരുമിച്ച് സീരിയലിൽ അഭിനയിക്കുന്ന കാലത്താണ് ഇരുവരും പ്രണയത്തിലായത്. തൻ്റെ വിവാഹം ഒരു inter-caste വിവാഹമായിരിക്കുമെന്ന് താൻ സ്വപ്നത്തിൽ പോലും കരുതിയിരുന്നില്ലെന്ന് സ്വാസിക തുറന്നുപറഞ്ഞു.

ഹാപ്പി ഫ്രെയിംസ് എന്ന യൂട്യൂബ് ചാനലിന് നൽകിയ അഭിമുഖത്തിലാണ് സ്വാസിക ഇക്കാര്യങ്ങൾ വ്യക്തമാക്കിയത്. ബന്ധുക്കൾ ആരും മതത്തെ ഒരു തടസ്സമായി കണ്ടില്ലെന്നും അവർ കൂട്ടിച്ചേർത്തു. "ഞങ്ങൾ പ്രണയത്തിലാകുന്നതിന് മുൻപേ അമ്മയ്ക്ക് പ്രേമിനെ അറിയാമായിരുന്നു. ഞങ്ങൾ സീരിയലിൽ അഭിനയിക്കുമ്പോൾ അമ്മ ലൊക്കേഷനിൽ വരാറുണ്ടായിരുന്നു. പ്രേം ഒരു നല്ല ചെറുക്കനാണെന്ന് അമ്മ മനസ്സിൽ കണ്ടിരിക്കാം. അതുകൊണ്ട്, അയാൾ ക്രിസ്ത്യാനിയാണെന്ന് പറഞ്ഞപ്പോൾ അമ്മ എതിർത്തില്ല," സ്വാസിക പറഞ്ഞു.

അച്ഛൻ ബഹ്‌റിനിലായിരുന്നതിനാൽ അദ്ദേഹത്തോട് ഈ വിവരം പറയാൻ ആദ്യം ഭയന്നിരുന്നുവെന്നും, എന്നാൽ ക്രിസ്ത്യാനിയാണെന്ന് പറഞ്ഞപ്പോൾ അച്ഛനും കുഴപ്പമില്ലെന്ന് അറിയിച്ചതായും സ്വാസിക വെളിപ്പെടുത്തി.

"എൻ്റെ ബന്ധുക്കളും എതിർപ്പൊന്നും പറഞ്ഞില്ല. അമ്മയ്ക്ക് കൂടുതലും പേടി അവരുടെ സഹോദരങ്ങളെക്കുറിച്ചായിരുന്നു. അവർക്കും മുത്തശ്ശിക്കും ആർക്കും പ്രശ്നമുണ്ടായിരുന്നില്ല. എനിക്ക് വട്ടായതാണോ എല്ലാവർക്കും വട്ടായതാണോ എന്ന് ഞാൻ ചിന്തിച്ചുപോയി," അവർ കൂട്ടിച്ചേർത്തു.