'ഥാർ' കൊണ്ട് യുവാക്കളുടെ ഇടയിൽ കോളിളക്കം സൃഷ്ട്ടിച്ചു; ഇലക്ട്രിക് എസ്‌യുവികളും മികച്ച പ്രകടനം; സെപ്റ്റംബറിൽ റെക്കോർഡ് കുതിപ്പുമായി മഹീന്ദ്ര; വിൽപ്പന കണക്കുകൾ അറിയാം

സെപ്റ്റംബറിൽ മഹീന്ദ്ര ആൻഡ് മഹീന്ദ്രയ്ക്ക് ചരിത്ര നേട്ടം. പ്രതിമാസ എസ്‌യുവി വിൽപ്പനയിൽ ഇതുവരെയുള്ളതിൽ ഏറ്റവും ഉയർന്ന കണക്ക് രേഖപ്പെടുത്തി. ഈ കാലയളവിൽ 56,233 എസ്‌യുവി യൂണിറ്റുകളാണ് കമ്പനി ഡീലർഷിപ്പുകളിലേക്ക് എത്തിച്ചത്. ജനപ്രിയ മോഡലുകളായ സ്കോർപിയോ, ഥാർ എന്നിവയുടെ വിൽപ്പനയും റെക്കോർഡിട്ടു.

പുതിയ ഇലക്ട്രിക് എസ്‌യുവികളായ BE 6, XUV 9e എന്നിവയുടെ ഉത്പാദനത്തിലും വിൽപ്പനയിലും കയറ്റുമതിയിലും ശ്രദ്ധേയമായ മുന്നേറ്റമുണ്ടായി. മഹീന്ദ്രയുടെ ചക്കൻ പ്ലാന്റിൽ ഈ ഇ-എസ്‌യുവികളുടെ 5,959 യൂണിറ്റുകൾ ഉത്പാദിപ്പിച്ചു. ഇത് 2025 ഓഗസ്റ്റിനെ അപേക്ഷിച്ച് 21 ശതമാനം വർദ്ധനവാണ്. മൊത്തം 57,150 എസ്‌യുവി ഉത്പാദനത്തിൽ BE 6, XUV 9e എന്നിവ 10 ശതമാനം സംഭാവന ചെയ്തു. കഴിഞ്ഞ വർഷം സെപ്റ്റംബറിനെ അപേക്ഷിച്ച് ഉത്പാദനത്തിൽ 24% വർദ്ധനവുണ്ടായി. ആദ്യമായി, ഈ രണ്ട് ഇ-എസ്‌യുവികളുടെയും പ്രതിമാസ ഉത്പാദനം 5,000 യൂണിറ്റ് മറികടന്നു.

BE 6, XUV 9e എന്നിവയുടെ 210 യൂണിറ്റുകൾ സെപ്റ്റംബറിൽ കയറ്റുമതി ചെയ്തു, ഇതും എക്കാലത്തെയും ഉയർന്ന പ്രതിമാസ കയറ്റുമതിയാണ്. ഇതുവരെ വിദേശത്തേക്ക് ആകെ 217 യൂണിറ്റുകൾ കയറ്റി അയച്ചിട്ടുണ്ട്. 2025 ജനുവരി മുതൽ സെപ്റ്റംബർ വരെയുള്ള കാലയളവിൽ ഈ ഇലക്ട്രിക് എസ്‌യുവികളുടെ 31,262 യൂണിറ്റുകളാണ് ഡീലർമാർക്ക് കൈമാറിയത്. ഇത് മഹീന്ദ്രയുടെ ആകെ എസ്‌യുവി വിൽപ്പനയുടെ 6% വരും. സെപ്റ്റംബറിലെ 4,320 യൂണിറ്റുകളുടെ കയറ്റുമതി തുടർച്ചയായ നാലാം മാസവും 4,000 യൂണിറ്റ് മറികടന്നു.