കുന്നും മലയുമെല്ലാം ചുമ്മാ..പുഷ്പം പോലെ കയറും; 75 kWh ബാറ്ററി പാക്ക്; അടിമുടി മാറി ടാറ്റ ഹാരിയർ ഇവി; ഇത് കരുത്തിന്റെ പുതിയ മുഖം

ഇലക്ട്രിക് വാഹന വിപണിയിൽ തങ്ങളുടെ ആധിപത്യം ഉറപ്പിച്ചുകൊണ്ട് ടാറ്റ മോട്ടോഴ്‌സിന്റെ കരുത്തൻ എസ്‌യുവി ഹാരിയർ ഇവി (Harrier EV) വിപണിയിൽ തരംഗമാകുന്നു. പുറത്തിറങ്ങിയ ചുരുങ്ങിയ കാലയളവിനുള്ളിൽ തന്നെ വലിയ ഉപഭോക്തൃ പ്രതികരണം നേടിയ ഈ വാഹനം, ജനുവരിയിൽ മാത്രം 1,995 യൂണിറ്റുകൾ വിറ്റഴിച്ച് ഇലക്ട്രിക് കാർ വിപണിയിൽ മൂന്നാം സ്ഥാനം സ്വന്തമാക്കി. ഇതിന് പിന്നാലെ ഹാരിയർ ഇവിയുടെ കരുത്തുറ്റ ഒരു പുതിയ വേരിയന്റ് കൂടി അവതരിപ്പിക്കാൻ ടാറ്റ പദ്ധതിയിടുന്നതായാണ് റിപ്പോർട്ടുകൾ.

പുതിയ ‘ഫിയർലെസ് പ്ലസ്’ വേരിയന്റും സവിശേഷതകളും

ഹാരിയർ ഇവിയുടെ ഏറ്റവും ഉയർന്ന വേരിയന്റായ ഫിയർലെസ് പ്ലസ് (Fearless Plus) ആണ് കമ്പനി പുതുതായി അവതരിപ്പിക്കുന്നത്. 75 kWh ബാറ്ററി പാക്കും ഡ്യുവൽ മോട്ടോർ ഓൾ-വീൽ ഡ്രൈവ് (AWD) സംവിധാനവുമാണ് ഇതിന്റെ പ്രധാന ആകർഷണം. 500 Nm ടോർക്ക് ഉത്പാദിപ്പിക്കുന്ന ഈ കരുത്തൻ എസ്‌യുവിക്ക് വെറും 6.3 സെക്കൻഡിനുള്ളിൽ പൂജ്യത്തിൽ നിന്ന് 100 കിലോമീറ്റർ വേഗത കൈവരിക്കാൻ സാധിക്കും.

മറ്റ് പ്രധാന ഫീച്ചറുകൾ:

360-ഡിഗ്രി 3D സറൗണ്ട് ക്യാമറയ്ക്ക് പുറമെ കാറിനടിയിലെ കാഴ്ചകൾ നൽകുന്ന 540-ഡിഗ്രി വ്യൂ.

സാംസങ് രൂപകൽപ്പന ചെയ്ത 14.5 ഇഞ്ച് നിയോ ക്യുഎൽഇഡി (Neo QLED) ഇൻഫോടെയ്ൻമെന്റ് സിസ്റ്റം.

JBL-ന്റെ 10-സ്പീക്കർ സൗണ്ട് സിസ്റ്റം, വെന്റിലേറ്റഡ് സീറ്റുകൾ.

സുരക്ഷയ്ക്കായി 9 എയർബാഗുകൾ.

പിൻകാഴ്ചകൾ വ്യക്തമായി കാണാൻ ഷാർക്ക് ഫിൻ ആന്റിനയിൽ ഘടിപ്പിച്ച ക്യാമറയോടു കൂടിയ ഡിജിറ്റൽ IRVM.

മികച്ച ഓഫ്-റോഡിംഗ് മികവ്

സാധാരണ ഹാരിയറിൽ നിന്ന് വ്യത്യസ്തമായി ഹാരിയർ ഇവിയിൽ ആറ് മൾട്ടി-ടെറൈൻ മോഡുകൾ (Normal, Mud, Rock, Sand, Snow, Custom) ഉൾപ്പെടുത്തിയിട്ടുണ്ട്. ഓഫ്-റോഡിംഗിൽ വമ്പൻ പ്രകടനമാണ് ഈ വാഹനം കാഴ്ചവെക്കുന്നത്. കുത്തനെയുള്ള ചരിവുകൾ കയറാനും, വലിയ ഭാരമുള്ള ടാങ്ക് വലിക്കാനും, ചെളി നിറഞ്ഞ പാതകൾ മറികടക്കാനും ഹാരിയർ ഇവിക്ക് അനായാസം സാധിക്കുമെന്ന് ടാറ്റ തെളിയിച്ചു കഴിഞ്ഞു.

സുരക്ഷയിൽ വിട്ടുവീഴ്ചയില്ല

ഭാരത് എൻസിഎപി (Bharat NCAP) ക്രാഷ് ടെസ്റ്റിൽ ഹാരിയർ ഇവി 5-സ്റ്റാർ റേറ്റിംഗ് സ്വന്തമാക്കി. മുതിർന്നവരുടെ സുരക്ഷയിൽ 32-ൽ 32 പോയിന്റും കുട്ടികളുടെ സുരക്ഷയിൽ 49-ൽ 45 പോയിന്റും വാഹനം നേടി. കാറിന്റെ ബോഡി കരുത്ത് പരീക്ഷിക്കുന്നതിനായി 1.5 ടൺ ഭാരമുള്ള കണ്ടെയ്നർ കാറിന് മുകളിൽ വെച്ചുകൊണ്ടുള്ള പരീക്ഷണവും കമ്പനി നടത്തിയിരുന്നു.

യഥാർത്ഥ റേഞ്ച് എത്ര?

ഹാരിയർ ഇവിയുടെ AWD വേരിയന്റിന്റെ യഥാർത്ഥ റേഞ്ച് പരീക്ഷിച്ചുകൊണ്ടുള്ള വീഡിയോകൾ അടുത്തിടെ പുറത്തുവന്നിരുന്നു. ഫരീദാബാദ് മുതൽ മുംബൈ എക്‌സ്പ്രസ് വേ വരെ നടത്തിയ പരീക്ഷണത്തിൽ 100% ചാർജിൽ വാഹനം ഏകദേശം 415 കിലോമീറ്റർ ദൂരം പിന്നിട്ടു. എസി ഓൺ ചെയ്ത് മണിക്കൂറിൽ 80-100 കിലോമീറ്റർ വേഗതയിൽ ഓടിച്ചപ്പോഴാണ് ഈ റേഞ്ച് ലഭിച്ചത്. ഡിസ്‌പ്ലേയിൽ കാണിക്കുന്ന 489 കിലോമീറ്ററിനേക്കാൾ അല്പം കുറവാണെങ്കിലും, വാഹനത്തിന്റെ വലുപ്പവും കരുത്തും വെച്ചുനോക്കുമ്പോൾ ഇത് മികച്ചൊരു റേഞ്ച് ആണെന്ന് വിദഗ്ധർ വിലയിരുത്തുന്നു.