ഇനി ഈ ജപ്പാൻ മോഡലിനെ സ്വാന്തമാക്കാൻ കുറച്ച് പാട് പെടും; ചെറുപ്പക്കാരുടെ മനം കവർന്ന ടൊയോട്ട ഫോർച്യൂണറിന്റെ വില കുതിച്ചുയർന്നു; പുതിയ വിവരങ്ങൾ പുറത്ത്

ഇന്ത്യയിലെ ജനപ്രിയ എസ്‌യുവിയായ ടൊയോട്ട ഫോർച്യൂണറിൻ്റെ വില വീണ്ടും വർദ്ധിപ്പിച്ചു. പാസഞ്ചർ വാഹനങ്ങളുടെ വില ടൊയോട്ട ഇന്ത്യ കൂട്ടിയിരുന്നു. ഇതോടെ, ഫോർച്യൂണറിൻ്റെ വിവിധ വേരിയൻ്റുകൾക്ക് 51,000 രൂപ മുതൽ 74,000 രൂപ വരെയാണ് വർദ്ധനവ് രേഖപ്പെടുത്തിയത്.

പുതിയ വില വർധനവ് അനുസരിച്ച്, ഫോർച്യൂണറിൻ്റെ ഏറ്റവും ഉയർന്ന മോഡലായ GRS വകഭേദത്തിന് 74,000 രൂപയുടെ വർദ്ധനവുണ്ടായപ്പോൾ, ലെജൻഡർ വേരിയൻ്റിന് 71,000 രൂപ വരെ വില കൂടി. എൻട്രി ലെവൽ മാനുവൽ വേരിയൻ്റിനാണ് ഏറ്റവും കുറഞ്ഞ വർധനവ്, 51,000 രൂപ. അതേസമയം, 4x4 വേരിയൻ്റുകൾക്ക് ഏകദേശം 50,000 രൂപയോളം വില വർദ്ധിച്ചിട്ടുണ്ട്. കൂടാതെ, കമ്പനി ലിമിറ്റഡ്-ടൈം ലീഡർ വേരിയൻ്റിൻ്റെ ഉത്പാദനം നിർത്തിവെച്ചതായും അറിയിച്ചു.

വില വർദ്ധനവിന് ശേഷം ടൊയോട്ട ഫോർച്യൂണറിൻ്റെ വിവിധ വേരിയൻ്റുകളുടെ എക്സ്-ഷോറൂം വിലകൾ താഴെ പറയുന്നവയാണ്:

* ഫോർച്യൂണറിൻ്റെ അടിസ്ഥാന വേരിയൻ്റിന് 51,000 രൂപയുടെ വർദ്ധനവോടെ പുതിയ എക്സ്-ഷോറൂം വില 34.16 ലക്ഷം രൂപയായി.

* ഏറ്റവും വിലകുറഞ്ഞ ഓട്ടോമാറ്റിക് വേരിയൻ്റിന് 55,000 രൂപയാണ് കൂടിയത്. ഇതിൻ്റെ മുൻ വില 36.41 ലക്ഷം രൂപയായിരുന്നത് ഇപ്പോൾ 36.96 ലക്ഷം രൂപയായി ഉയർന്നു.

* ഫോർച്യൂണറിൻ്റെ ഏറ്റവും ഉയർന്ന മോഡലായ GRS വകഭേദത്തിന് 74,000 രൂപയുടെ വർദ്ധനവോടെ പുതിയ എക്സ്-ഷോറൂം വില 49.59 ലക്ഷം രൂപയായി. ഇതിൻ്റെ മുൻ വില 48.85 ലക്ഷം രൂപയായിരുന്നു.

ശക്തമായ പ്രകടനം, ആകർഷകമായ രൂപം, വിശ്വസനീയമായ ടൊയോട്ട ഗുണമേന്മ, 4x4 ശേഷി എന്നിവയാൽ ശ്രദ്ധേയമായ ഫോർച്യൂണർ, ഉയർന്ന വിലയുണ്ടായിട്ടും രാജ്യത്തെ ഏറ്റവും ജനപ്രിയമായ ഏഴ് സീറ്റർ എസ്‌യുവിയായി തുടരുകയാണ്.