ചികിത്സയ്ക്ക് പോകാനായി ബുക്ക് ചെയ്ത ട്രെയിൻ വൈകിയതോടെ മറ്റൊരു ട്രെയിനിൽ കയറി; പിന്നാലെ പുറത്ത് വന്നത് നേവി ഉദ്യോഗസ്ഥന്റെ ഭാര്യയുടെ മരണം; അപകടമരണമെന്ന് കരുതിയ സംഭവത്തിൽ പുറത്ത് വന്നത് റെയിൽവേ ഉദ്യോഗസ്ഥന്റെ ക്രൂരത; 32കാരിയെ ട്രെയിനിൽ നിന്ന് തള്ളിയിട്ടു കൊന്നത് ടിക്കറ്റിനെച്ചൊല്ലിയുള്ള തർക്കത്തിൽ; പ്രതി പിടിയിൽ

ദില്ലി: ഓടുന്ന ട്രെയിനിൽ നിന്ന് വീണ് യുവതി മരിച്ച സംഭവത്തിൽ പുറത്ത് വരുന്നത് ഞെട്ടിക്കുന്ന വിവരങ്ങൾ. ആദ്യം അപകടമരണമാണെന്നു കരുതിയ സംഭവമാണ് അന്വേഷണത്തിൽ കൊലപാതകമാണെന്ന് തെളിഞ്ഞത്. നേവി ഉദ്യോഗസ്ഥന്റെ ഭാര്യയായ യുവതിയെയാണ് ട്രെയിനിൽ നിന്നും തള്ളിയിട്ട് കൊന്നത്. സംഭവത്തിൽ റെയിൽവേ ടിടിഇ അറസ്റ്റിലായി. ഉത്തർപ്രദേശിലെ ഇറ്റാവയിൽ ഒക്ടോബർ 25ന് രാത്രിയാണ് ഞെട്ടിക്കുന്ന സംഭവം അരങ്ങേറിയത്.

നാവികസേനാ ഉദ്യോഗസ്ഥനായ അജയ് സിങ്ങിന്റെ ഭാര്യയായ 32 വയസ്സുകാരി ആരതി യാദവാണ് കൊല്ലപ്പെട്ടത്. കാൺപൂർ ദേഹത്ത് സ്വദേശിനിയാണ് ആരതി. ടിക്കറ്റിനെച്ചൊല്ലിയുണ്ടായ തർക്കത്തിനിടെ ടിടിഇ യുവതിയെ ട്രെയിനിന് പുറത്തേക്ക് തള്ളിയിടുകയായിരുന്നുവെന്നാണ് പോലീസിന്റെ പ്രാഥമിക കണ്ടെത്തൽ. സംഭവത്തിൽ അറസ്റ്റിലായ ടിടിഇയെ റെയിൽവേ പോലീസ് കസ്റ്റഡിയിൽ വാങ്ങി വിശദമായി ചോദ്യം ചെയ്തുവരികയാണ്.

ചികിത്സാ ആവശ്യങ്ങൾക്കായി ഡൽഹിയിലേക്ക് പോകാൻ കാൻപൂരിൽ നിന്ന് ബരൗണി-ന്യൂഡൽഹി ഹംസഫർ സ്പെഷ്യൽ ട്രെയിനിൽ ആരതി യാദവ് ടിക്കറ്റ് റിസർവ് ചെയ്തിരുന്നു. എന്നാൽ ഈ ട്രെയിൻ വൈകിയതിനാൽ അവർ പട്‌ന-ആനന്ദ് വിഹാർ സ്പെഷ്യൽ ട്രെയിനിൽ ഒറ്റയ്ക്ക് യാത്ര ചെയ്യുകയായിരുന്നു. താൻ റിസർവ് ചെയ്ത ട്രെയിനല്ല ഇത് എന്നതിനാലും മതിയായ ടിക്കറ്റില്ലാതെയാണ് മറ്റൊരു ട്രെയിനിൽ കയറിയത് എന്നതിനാലും ടിടിഇ ഇവരെ ചോദ്യം ചെയ്യുകയും ഇത് പിന്നീട് രൂക്ഷമായ വാക്കുതർക്കത്തിലേക്ക് നയിക്കുകയുമായിരുന്നു.

പ്രകോപിതനായ ടിടിഇ ആരതിയുടെ ബാഗ് ട്രെയിനിന് പുറത്തേക്ക് വലിച്ചെറിയുകയും തുടർന്ന് അവരെ ട്രെയിനിൽ നിന്ന് തള്ളിയിടുകയുമായിരുന്നുവെന്ന് ബന്ധുക്കൾ ആരോപിക്കുന്നു. ട്രെയിനിൽ നിന്ന് തെറിച്ചുവീണ ആരതി തൽക്ഷണം മരിക്കുകയായിരുന്നുവെന്നും കുടുംബം പരാതിയിൽ പറയുന്നു. സംഭവത്തിൽ കുടുംബത്തിന്റെ പരാതിയിൽ കൊലപാതകക്കുറ്റം ചുമത്തി കേസ് രജിസ്റ്റർ ചെയ്തിട്ടുണ്ടെന്നും വിശദമായ അന്വേഷണം പുരോഗമിക്കുകയാണെന്നും റെയിൽവേ പോലീസ് വ്യക്തമാക്കി.