ആ പിഞ്ചു കഴുത്തിനെ 'ബ്ലേഡ്' കൊണ്ട് കീറി മുറിച്ചു; എന്നിട്ടും വിടാതെ കത്രികയ്ക്ക് കുത്തി താഴ്ത്തി ആ പെറ്റമ്മ; കാട്ടാക്കടയിലെ നവജാതശിശുവിന്റെ മരണം നടുക്കുന്നത്; അമ്മ ഷംന ഇനി അഴിയെണ്ണും

തിരുവനന്തപുരം: കാട്ടാക്കടയിൽ നവജാതശിശു മരിച്ച സംഭവത്തിൽ നടുക്കുന്ന വെളിപ്പെടുത്തലുകളുമായി പോലീസ്. സ്വന്തം കുഞ്ഞിനെ അമ്മയായ ഷംന (21) അതിക്രൂരമായി കൊലപ്പെടുത്തുകയായിരുന്നുവെന്ന് പോലീസ് സ്ഥിരീകരിച്ചു. പ്രസവിച്ച ഉടൻ തന്നെ കുഞ്ഞിന്റെ കഴുത്തിൽ ബ്ലേഡ് കൊണ്ട് കീറുകയും കത്രിക കൊണ്ട് കുത്തി പരിക്കേൽപ്പിക്കുകയും ചെയ്തതായി ചോദ്യം ചെയ്യലിൽ ഷംന സമ്മതിച്ചു. യുവതിക്കെതിരെ കൊലക്കുറ്റം ചുമത്തി പോലീസ് അറസ്റ്റ് രേഖപ്പെടുത്തിയിട്ടുണ്ട്.

കഴിഞ്ഞ ഞായറാഴ്ചയാണ് ഷംന തന്റെ വീട്ടിൽ വച്ച് പ്രസവിച്ചത്. കുഞ്ഞിനെ നോക്കാനുള്ള സാമ്പത്തിക ബുദ്ധിമുട്ടും പ്രായോഗികമായ പ്രയാസങ്ങളുമാണ് ഈ ക്രൂരകൃത്യത്തിന് പ്രേരിപ്പിച്ചതെന്നാണ് ഷംന നൽകിയ മൊഴി. ദമ്പതികൾക്ക് ഒന്നര വയസ്സുള്ള മറ്റൊരു കുട്ടിയുണ്ട്. രണ്ടാമതൊരു കുട്ടി കൂടി ഉണ്ടായാൽ വളർത്താൻ പ്രയാസമാകുമെന്ന് കരുതിയാണ് കുഞ്ഞിനെ ഇല്ലാതാക്കാൻ തീരുമാനിച്ചതെന്ന് ഇവർ പോലീസിനോട് പറഞ്ഞു.

പ്രസവത്തിന് പിന്നാലെ കട്ടിലിനടിയിൽ തുണിയിൽ പൊതിഞ്ഞ നിലയിലാണ് കുഞ്ഞിനെ കണ്ടെത്തിയത്. വയറുവേദനയാണെന്ന് പറഞ്ഞ് ഷംന ഭർത്താവിനൊപ്പം ആശുപത്രിയിലെത്തിയെങ്കിലും കുഞ്ഞിനെ അപ്പോഴേക്കും മരിച്ചിരുന്നു.

ആശുപത്രി അധികൃതർ കുഞ്ഞിന്റെ ശരീരത്തിൽ അസ്വാഭാവികമായ മുറിപ്പാടുകൾ കണ്ടതോടെയാണ് പോലീസിനെ വിവരമറിയിച്ചത്. പ്രസവത്തിനിടെയുണ്ടായ പരിക്കുകളാണോ മരണകാരണമെന്നായിരുന്നു പ്രാഥമിക സംശയം. എന്നാൽ, പോസ്റ്റ്മോർട്ടം റിപ്പോർട്ട് വന്നതോടെയാണ് കൊലപാതകത്തിന്റെ ചുരുളഴിഞ്ഞത്. ശ്വാസംമുട്ടിയാണ് കുഞ്ഞ് മരിച്ചതെന്ന് പോസ്റ്റ്മോർട്ടത്തിൽ തെളിഞ്ഞു. തുടർച്ചയായി നടത്തിയ ചോദ്യം ചെയ്യലിൽ ഷംന കുറ്റം സമ്മതിക്കുകയായിരുന്നു.

ഈ സംഭവത്തിൽ ഏറ്റവും ദുരൂഹമായ വശം ഷംന ഗർഭിണിയായിരുന്നു എന്ന വിവരം ഭർത്താവ് അറിഞ്ഞിരുന്നില്ല എന്ന മൊഴിയാണ്. തന്റെ ഭാര്യ ഗർഭിണിയാണെന്ന കാര്യം ശ്രദ്ധയിൽപ്പെട്ടിരുന്നില്ലെന്നാണ് അദ്ദേഹം പോലീസിനോട് പറഞ്ഞത്. എന്നാൽ ഈ മൊഴി പോലീസ് പൂർണ്ണമായും വിശ്വാസത്തിലെടുത്തിട്ടില്ല. ഗർഭാവസ്ഥ മറച്ചുവെച്ചതിലും കൊലപാതകത്തിലും മറ്റാർക്കെങ്കിലും പങ്കുണ്ടോ എന്ന കാര്യം പോലീസ് ഗൗരവമായി അന്വേഷിച്ചുവരികയാണ്.

പിഞ്ചുകുഞ്ഞിനെ അമ്മ തന്നെ ഇത്ര ക്രൂരമായി കൊലപ്പെടുത്തിയത് കേരളീയ സമൂഹത്തെ ഞെട്ടിച്ചിരിക്കുകയാണ്. ബ്ലേഡും കത്രികയും ഉപയോഗിച്ച് നടത്തിയ മാരകമായ ആക്രമണങ്ങൾ ഷംനയുടെ മാനസികാവസ്ഥയെക്കുറിച്ചും ചോദ്യങ്ങൾ ഉയർത്തുന്നുണ്ട്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു. സംഭവസ്ഥലത്ത് പോലീസ് വിശദമായ തെളിവെടുപ്പ് പൂർത്തിയാക്കി.

കൊലപാതകത്തിന് ഉപയോഗിച്ച ആയുധങ്ങൾ പോലീസ് കണ്ടെടുത്തിട്ടുണ്ട്. ഒരു പിഞ്ചുജീവനെ ലോകം കാണുന്നതിന് മുൻപ് തന്നെ ഇല്ലാതാക്കിയ ഈ സംഭവത്തിൽ ശാസ്ത്രീയമായ തെളിവുകൾ ശേഖരിച്ച് ശക്തമായ കുറ്റപത്രം സമർപ്പിക്കാനാണ് അന്വേഷണ സംഘത്തിന്റെ തീരുമാനം.