പെണ്‍കുട്ടിയെ സ്‌കൂളിലും ട്യൂഷനും കൊണ്ടുപോയി വിട്ടു; ഫോണ്‍ വാങ്ങി നല്‍കി പ്രണയമാണെന്ന് പറഞ്ഞു; പിന്നാലെ പ്രലോഭിപ്പിച്ച് പീഡനം; ഓട്ടോ ഡ്രൈവര്‍ പിടിയില്‍
തിരുവനന്തപുരം: സ്‌കൂള്‍ വിദ്യാര്‍ത്ഥിനിയെ പ്രലോഭിപ്പിച്ച് പീഡനത്തിനിരയാക്കിയ സംഭവത്തില്‍ ഓട്ടോ ഡ്രൈവര്‍ പിടിയില്‍. വെമ്പവയം സ്വദേശി അരുണിനെയാണ് വട്ടപ്പാറ പോലീസ് അറസ്റ്റ് ചെയ്തത്. വട്ടപ്പാറ സര്‍ക്കിള്‍ ഇന്‍സ്‌പെക്ടര്‍ എസ് ശ്രീജിത്തിന്റെ നേതൃത്വത്തില്‍ നടത്തിയ അന്വേഷണത്തിലാണ് പ്രതിയെ പോലീസ് പിടികൂടിയത്.
പ്രതിയുടെ ഓട്ടോയിലായിരുന്നു കുട്ടി സ്‌കൂളിലും ട്യൂഷനും പോയിരുന്നത്. ഒരു ദിവസം ഇങ്ങനെ കൊണ്ടുപോകുന്നതിനിടെ കുട്ടിക്ക് മൊബൈല്‍ ഫോണ്‍ ഇയാള്‍ വാങ്ങിക്കൊടുത്തു. തനിക്ക് കുട്ടിയെ ഇഷ്ടമാണെന്ന് പറഞ്ഞ് വിശ്വസിപ്പിച്ചു. തുടര്‍ന്ന് പ്രലോഭിപ്പിച്ച് പീഡനത്തിന് ഇരയാക്കുകയായിരുന്നു. സംഭവത്തിന് ശേഷം വീട്ടില്‍ പറയരുതെന്ന് കുട്ടിയെ ഇയാള്‍ ഭീഷണിപ്പെടുത്തി. പ്രതിയുടെ ഭീഷണി ഭയന്ന് കുട്ടി ഇക്കാര്യം വീട്ടില്‍ ആരോടും പറഞ്ഞില്ല.
എന്നാല്‍ അടുത്തിടെ പെണ്‍കുട്ടിയുടെ പെരുമാറ്റത്തില്‍ അസ്വഭാവികത തോന്നി ബന്ധുക്കള്‍ വിശദമായി കാര്യങ്ങള്‍ ചോദിച്ചപ്പോഴാണ് വിവരം പുറത്തു വന്നത്. തുടര്‍ന്ന് പോലീസില്‍ പരാതി നല്‍കുകയായിരുന്നു.