റോയ് എബ്രഹാമിനെ കേരള ബാങ്ക് എക്‌സിക്യൂട്ടീവ് ഡയറക്ടറാക്കി; ട്രാവന്‍കൂര്‍ ടൈറ്റാനിയം എംഡിയായി ബാബു റ്റി എസും; മന്ത്രിസഭാ തീരുമാനങ്ങള്‍ ഇങ്ങനെ

തിരുവനന്തപുരം: രാത്രികാല പട്രോളിംഗ് ഡ്യൂട്ടിക്കിടെ അപകടം സംഭവിച്ച് കാല്‍ മുറിച്ചുമാറ്റിയ കാസര്‍ഗോഡ് ജില്ലയിലെ ഹാര്‍ബര്‍ റസ്‌ക്യൂ ഗാര്‍ഡ് ബിനീഷ് എംന് നേരത്തെ അനുവദിച്ച 55,000 രൂപയുടെ ധനസഹായത്തിന് പുറമെ 5 ലക്ഷം രൂപ കൂടി മുഖ്യമന്ത്രിയുടെ ദുരിതാശ്വാസ നിധിയില്‍ നിന്നും അനുവദിക്കാന്‍ മന്ത്രിസഭാ യോഗ തീരുമാനം.

ഓണറേറിയം വര്‍ദ്ധിപ്പിച്ചു

പട്ടികവര്‍ഗ്ഗ വികസന വകുപ്പിന് കീഴില്‍ പ്രവര്‍ത്തിക്കുന്ന 18 മോഡല്‍ പ്രീ സ്‌കൂളുകളിലെ ജീവനക്കാരുടെ ഓണറേറിയം വര്‍ദ്ധിപ്പിച്ചു. ടീച്ചര്‍ക്ക് 13,000 രൂപയായും, ആയ/ഹെല്‍പ്പര്‍ക്ക് 9000 രൂപയായുമാണ് പ്രതിമാസം ഓണറേറിയം വര്‍ദ്ധിപ്പിച്ചത്.

തസ്തിക

കോഴിക്കോട് സ്ഥാപിക്കുന്ന ഇന്‍സ്റ്റിറ്റ്യൂട്ട് ഓഫ് ഓര്‍ഗന്‍ ട്രാന്‍സ്പ്ലന്റേഷന്റെ ഒന്നാം ഘട്ടത്തിലേക്ക് തസ്തികകള്‍ അനുവദിച്ചു. പ്രഫസര്‍- 14, അസോസിയേറ്റ് പ്രഫസര്‍ -7, അസിസ്റ്റന്റ് പ്രഫസര്‍ - 39 എന്നിങ്ങനെയാണിത്.

തിരുവനന്തപുരം സര്‍ക്കാര്‍ മെഡിക്കല്‍ കോളേജിലെ അവയവദാന പദ്ധതിയുടെ തുടര്‍ നടത്തിപ്പിന് ഒരു ട്രാന്‍സ്പ്ലാന്റ്‌റ് കോര്‍ഡിനേറ്റര്‍ തസ്തിക നിലനിര്‍ത്തും.

മലപ്പുറം ജില്ലയിലെ വേങ്ങര ഉപജില്ലയിലെ കാരാത്തോട് പി.എം.എസ്.എ.എം.യു.പി. സ്‌കൂളില്‍ 2022-23 അധ്യയന വര്‍ഷത്തില്‍ ജൂനിയര്‍ അറബിക് ഫുള്‍ടൈം തസ്തിക-1, ജൂനിയര്‍ സംസ്‌കൃതം പാര്‍ട്ട് ടൈം തസ്തിക-1 എന്നീ അധിക തസ്തികകള്‍ അനുവദിക്കും.

പെന്‍ഷന്‍ പദ്ധതി

മലബാര്‍ കാന്‍സര്‍ സെന്ററിലെ ജീവനക്കാര്‍ക്ക് എല്‍ഐസിയുമായി ചേര്‍ന്ന് പെന്‍ഷന്‍ പദ്ധതി നടപ്പിലാക്കും.

ഒ.ബി.സി പട്ടികയില്‍ ഉള്‍പ്പെടുത്തും

കേരള സംസ്ഥാന പിന്നാക്ക വിഭാഗ കമ്മീഷന്റെ ഉപദേശം അംഗീകരിച്ച് BALIJA, KAVARAI, GAVARA, GAVARAI, GAVARAI NAIDU, BALIJA NAIDU, GAJALU BALIJA or VALAI CHETTY സമുദായങ്ങളെ സംസ്ഥാന ഒ.ബി.സി പട്ടികയില്‍ ഉള്‍പ്പെടുത്തും. അതിനായി 1958 -ലെ കേരള സ്റ്റേറ്റ് & സബോര്‍ഡിനേറ്റ് സര്‍വ്വീസസ് റൂള്‍സ് പാര്‍ട്ട് | ഷെഡ്യൂള്‍ ലിസ്റ്റ് III-ല്‍ ഇനം നമ്പര്‍ 49 B എന്‍ട്രി ആയുള്ള NAIDU എന്നത് NAIDU (BALIJA, KAVARAI, GAVARA, GAVARAI, GAVARAI NAIDU, BALIJA NAIDU, GAJALU BALIJA or VALAI CHETTY) എന്നാക്കി മാറ്റം വരുത്തി ഉത്തരവ് പുറപ്പെടുവിക്കും.

പുതിയ റീജിയണല്‍ ഓഫീസ് ആരംഭിക്കും

കേരള സംസ്ഥാന ന്യൂനപക്ഷ വികസന കോര്‍പ്പറേഷന്റെ പുതിയ റീജിയണല്‍ ഓഫീസ് കോട്ടയത്തും ആലപ്പുഴയിലും ആരംഭിക്കും. ഡെപ്യൂട്ടി മാനേജര്‍, ജൂനിയര്‍ അസിസ്റ്റന്റ്, ഓഫീസ് അറ്റന്റന്റ് എന്നീ തസ്തികള്‍ അനുവദിക്കും. കോഴിക്കോട് പ്രവര്‍ത്തിച്ചു വരുന്ന റീജിയണല്‍ ഓഫീസിന് അനുമതി നല്‍കാനും തീരുമാനിച്ചു. നടത്തിപ്പ് ചെലവ് കോര്‍പ്പറേഷന്‍ വഹിക്കണം എന്ന വ്യവസ്ഥയിലാണ് അനുമതി.

മുദ്രവില, രജിസ്‌ട്രേഷന്‍ ഫീസ് എന്നിവ ഇളവ്

പാലക്കാട്ട് KINFRA-യുടെ കൈവശമുള്ള 74 ഏക്കര്‍ ഭൂമി പ്രെട്രോളിയം, ഓയില്‍, ലൂബ്രിക്കന്റ് (POL) ടെര്‍മിനല്‍ സ്ഥാപിക്കുന്നതിനും (70 ഏക്കര്‍), നിലവിലുള്ള LPG ടെര്‍മിനലിന് പാര്‍ക്കിംഗ് സൗകര്യം ഒരുക്കുന്നതിനുമായി (4 ഏക്കര്‍) BPCL -ന് പാട്ടത്തിന് നല്‍കുന്നതിന് കിന്‍ഫ്രയും ബിപിസിഎല്ലും തമ്മിലുള്ള പാട്ടക്കരാര്‍ രജിസ്റ്റര്‍ ചെയ്യുന്നതിനാവശ്യമായ മുദ്രവില, രജിസ്‌ട്രേഷന്‍ ഫീസ് എന്നിവ ഇളവ് ചെയ്തു നല്‍കും.

വിരമിക്കല്‍ പ്രായം ഉയര്‍ത്തും

ദി ഫാര്‍മസ്യൂട്ടിക്കല്‍ കോര്‍പ്പറേഷന്‍ (ഇന്ത്യന്‍ മെഡിസിന്‍സ്) കേരള ലിമിറ്റഡ് (ഔഷധി) ലെ ജീവനക്കാരുടെ വിരമിക്കല്‍ പ്രായം 58 വയസ്സില്‍ നിന്നും 60 വയസ്സാക്കി ഉയര്‍ത്തും.

സാധൂകരിച്ചു

മുണ്ടക്കയം ഭൂമി പതിവ് സ്‌പെഷ്യല്‍ ഓഫീസിലേക്ക് കരാര്‍ അടിസ്ഥാനത്തില്‍ നിയമിച്ച രണ്ട് ചെയിന്‍മാരുടെ നിയമനം സാധൂകരിച്ചു. ഓഫീസിന് 16/03/2025 മുതല്‍ ഒരു വര്‍ഷത്തേക്ക് കൂടി തുടര്‍ച്ചാനുമതി നല്‍കും.

സര്‍ക്കാര്‍ ഗ്യാരണ്ടി

കോഴിക്കോട് സൈബര്‍പാര്‍ക്കില്‍ രണ്ടാമത്തെ ഐ.ടി കെട്ടിടം നിര്‍മിക്കുന്നതിന് 190.22 കോടി രൂപ നബാര്‍ഡിന്റെ നിഡ (NIDA) മുഖാന്തിരം പതിനഞ്ച് വര്‍ഷത്തേയ്ക്ക് വായ്പയായി സ്വീകരിക്കുന്നതിന് വ്യവസ്ഥകള്‍ക്ക് വിധേയമായി സര്‍ക്കാര്‍ ഗ്യാരണ്ടി നല്‍കും.

സംസ്ഥാന വനിതാ വികസന കോര്‍പ്പറേഷന് 100 കോടി രൂപയ്ക്കുള്ള അധിക സര്‍ക്കാര്‍ ഗ്യാരണ്ടി, 8 വര്‍ഷത്തേയ്ക്ക് വ്യവസ്ഥകള്‍ക്ക് വിധേയമായി അനുവദിക്കും.

പാട്ടത്തിന് നല്‍കും

National Forensic Infrastructure Enhancement Scheme ന്റെ ഭാഗമായി കേരളത്തില്‍ Central Forensic Science Laboratory (CFSL) സ്ഥാപിക്കുന്നതിന് ടെക്‌നോപാര്‍ക്ക് ഫെയ്‌സ് IV ക്യാമ്പസായ ടെക്‌നോസിറ്റിയിലെ മേല്‍തോന്നയ്ക്കല്‍ വില്ലേജിലെ 5 ഏക്കര്‍ ഭൂമി കേന്ദ്ര ആഭ്യന്തര മന്ത്രാലയത്തിന് പാട്ടത്തിന് നല്‍കും. ഏക്കറിന് പ്രതിവര്‍ഷം 100 രൂപ നിരക്കില്‍ 90 വര്‍ഷത്തേക്ക് പാട്ടത്തിന് നല്‍കുന്നതിന്

ടെക്‌നോപാര്‍ക്ക് ചീഫ് എക്‌സിക്യൂട്ടീവ് ഓഫീസര്‍ക്ക് അനുമതി നല്‍കി.

ബസ് വാങ്ങുന്നതിന് അനുമതി

ആലപ്പുഴ സര്‍ക്കാര്‍ നഴ്‌സിംഗ് കോളേജിന് ബസ് വാങ്ങുന്നതിന് അനുമതി നല്‍കി.

നിയമനം

കേരള സംസ്ഥാന സഹകരണ ബാങ്കില്‍ (കേരള ബാങ്ക്) നിലവില്‍ ചീഫ് ജനറല്‍ മാനേജരായി ജോലി ചെയ്യുന്ന റോയ് എബ്രഹാമിന് കേരള സംസ്ഥാന സഹകരണ ബാങ്കിന്റെ എക്‌സിക്യൂട്ടീവ് ഡയറക്ടറായി നിയമനം നല്‍കും.

ട്രാവന്‍കൂര്‍ ടൈറ്റാനിയം പ്രൊഡക്ട്‌സ് ലിമിറ്റഡില്‍ മാനേജിങ്ങ് ഡയറക്ടറായി ബാബു റ്റി എസിനെ നിയമിക്കും.

ശമ്പള പരിഷ്‌ക്കരണം

റിഹാബിലിറ്റേഷന്‍ പ്ലാന്റേഷന്‍സ് ലിമിറ്റഡിലെ സ്ഥിരം ജീവനക്കാര്‍ക്ക് 11-ാം ശമ്പള പരിഷ്‌ക്കരണം അനുവദിക്കും.

കാലാവധി ദീര്‍ഘിപ്പിക്കും

സംസ്ഥാന തീരദേശ വികസന കോര്‍പ്പറേഷന്‍ മാനേജിങ്ങ് ഡയറക്ടര്‍ പി ഐ ഷെയ്ഖ് പരീതിന്റെ പുനര്‍നിയമ കാലാവധി ഒരു വര്‍ഷത്തേക്ക് കൂടി ദീര്‍ഘിപ്പിക്കും.

വില്ലേജ് വിഭജനം

തൃശ്ശൂര്‍ ജില്ലയിലെ കൊടുങ്ങല്ലൂര്‍ താലൂക്കിലെ പൊയ്യ-മടത്തുംപടി-പള്ളിപ്പുറം ഗ്രൂപ്പ് വില്ലേജില്‍ നിന്നും മടത്തുംപടി വില്ലേജ് വിഭജിക്കുന്നതിന് അനുമതി നല്‍കി. വില്ലേജ് പ്രവര്‍ത്തനത്തിനാവശ്യമായ തസ്തികകള്‍ കൂടി സൃഷ്ടിക്കും. വില്ലേജ് ഓഫീസര്‍ -1, സ്‌പെഷ്യല്‍ വില്ലേജ് ഓഫീസര്‍ -1, വില്ലേജ് അസിസ്റ്റന്റ് 1, വില്ലേജ് ഫീല്‍ഡ് അസിസ്റ്റന്റ് - 2, പി.ടി.എസ് - 1 എന്നിങ്ങനെയാണ് തസ്തികകള്‍.

സ്‌പെഷ്യല്‍ തഹസില്‍ദാര്‍ എല്‍ എ യൂണിറ്റ്

ഗുരുവായൂര്‍ ദേവസ്വത്തിന് വേണ്ടി ഭൂമി ഏറ്റെടുക്കുന്നതിന് സ്‌പെഷ്യല്‍ തഹസില്‍ദാര്‍ എല്‍ എ യൂണിറ്റ് ഒരു വര്‍ഷത്തേക്ക് രൂപീകരിക്കും.

നിര്‍മ്മിതി കേന്ദ്ര മുഖേന നടപ്പാക്കും

വയനാട് ജില്ലയിലെ പട്ടികവര്‍ഗ വിഭാഗക്കാരുടെ വീടുകളുടെ മേല്‍ക്കൂരയിലെ ചോര്‍ച്ച പരിഹരിക്കുന്ന പ്രവൃത്തി, വയനാട് ജില്ലാ നിര്‍മ്മിതി കേന്ദ്ര മുഖേന നടപ്പിലാക്കുന്നതിന് അനുമതി നല്‍കി. അംബേദ്കര്‍ സെറ്റില്‍മെന്റ് ഡെവലപ്‌മെന്റ് സ്‌കീം ശീര്‍ഷകത്തില്‍ നിന്നും 6,77,50,000 രൂപ ചെലവഴിക്കും.

ഇളവ് നല്‍കും

അഷ്ടമുടി കായലില്‍ (നീണ്ടകര ഹാര്‍ബര്‍) നിന്നും ഡ്രഡ്ജ് ചെയ്ത 45000 മുതല്‍ 50000 വരെ ക്യുബിക്ക് മീറ്റര്‍ മണ്ണ് ചവറ ഗവണ്മെന്റ്‌റ് സ്‌കൂളുകള്‍ /കോളേജ് ഗ്രൗണ്ട് നിര്‍മ്മാണ പ്രവൃത്തികള്‍ക്ക് അനുവദിക്കും. പഞ്ചായത്തിന്റെ ഫീസും, റവന്യൂ വകുപ്പില്‍ നിന്നുള്ള, സിനറേജ് ചാര്‍ജ്ജും, കേരള മൈനര്‍ മിനറല്‍ കണ്‍സഷന്‍ ചട്ടങ്ങളിലെ റോയല്‍റ്റിയും ഒഴിവാക്കി നല്‍കും.

ടെണ്ടര്‍ അംഗീകരിച്ചു

'KIIFB Augmentation of CWSS to Nattika Firka Phase 1 Package I -Design, Construction and Commissioning of 9m dia intake well cum pumphouse, 26 MLD Water Treatment Plant at Vellani, Renovation of existing WTP at Vellani and existing intake well cum pump house at Illickal, Supply erection testing and commissioning of 2 nos RW and 2 nos CW Pumpsets, 500 KVA Transformers (2 nos), Supplying laying testing and commissioning 700mm DI RWPM 2700m, restoration of roads after laying pipes and allied works-General Civil Work' എന്ന പ്രവൃത്തിക്ക് 38,67,99,199 രൂപയുടെ ടെണ്ടര്‍ അം?ഗീകരിച്ചു.