സമയക്രമത്തെ ചൊല്ലി തർക്കം; സ്വകാര്യ ബസ് ഡ്രൈവറെ യാത്രക്കാരുടെ മുന്നിലിട്ട് മർദിച്ച് മറ്റൊരു ബസ്സിലെ ജീവനക്കാരൻ; കേസെടുത്ത് പോലീസ്

കൊല്ലം: പരവൂരിൽ സ്വകാര്യ ബസുകളുടെ സമയക്രമത്തെ ചൊല്ലിയുള്ള തർക്കം കലാശിച്ചത് കയ്യാങ്കളിയിൽ. ബസ് ഡ്രൈവറെ യാത്രക്കാരുടെ മുന്നിലിട്ട് മറ്റൊരു ബസ്സിലെ ക്ലീനർ മർദിച്ചു. പരവൂരിൽ നിന്ന് വർക്കലയിലേക്ക് സർവീസ് നടത്തുന്ന സാമിയ ബസ്സിലെ ഡ്രൈവർ സുരേഷ് ബാബുവിനാണ് മർദനമേറ്റത്. എസ്കെവി ബസ്സിലെ ക്ലീനർ പ്രണവിനെതിരെ പരവൂർ പോലീസ് കേസെടുത്തു.

സെപ്റ്റംബർ 12-ന് വൈകുന്നേരം തെക്കുംഭാഗത്ത് വെച്ചാണ് സംഭവം നടന്നത്. സാമിയ ബസ് സർവീസ് നടത്തുന്നതിനിടെയാണ് പ്രതിയായ പ്രണവ് ബസ്സിൽ കയറി ടൈം ഷെഡ്യൂളിനെ ചൊല്ലി ഡ്രൈവറുമായി തർക്കത്തിലേർപ്പെട്ടത്. തർക്കം കൈയ്യാങ്കളിയിലേക്ക് നീങ്ങുകയായിരുന്നു.

ഡ്രൈവറെ നിലത്തിട്ട് പ്രണവ് മർദിച്ചതായും യാത്രക്കാർ പരിഭ്രാന്തരായി. സംഭവത്തിൽ നിയമനടപടികളുമായി മുന്നോട്ട് പോകുമെന്ന് സുരേഷ് ബാബു അറിയിച്ചിട്ടുണ്ട്. സ്വകാര്യ ബസ് സർവീസുകളിലെ ഡ്രൈവർമാർ തമ്മിലുള്ള ഈ തർക്കം ബസ് ഓപ്പറേറ്റർമാരുടെ ശ്രദ്ധയിൽപ്പെടുത്തുമെന്നും അദ്ദേഹം കൂട്ടിച്ചേർത്തു.