സംസ്ഥാനത്ത് നാലു ദിനസം ശക്തമായ മഴയ്ക്ക് സാധ്യത; ഇന്ന് ആറു ജില്ലകളില്‍ യെല്ലോ അലേര്‍ട്ട്

തിരുവനന്തപുരം: സംസ്ഥാനത്ത് അടുത്ത നാലു ദിവസം ശക്തമായ മഴയ്ക്ക് സാധ്യത. അറബിക്കടലിലെ ന്യൂനമര്‍ദം ശക്തിയേറിയതിനു പിന്നാലെ രണ്ടു ദിവസത്തിനകം തെക്കു പടിഞ്ഞാറന്‍ ബംഗാള്‍ ഉള്‍ക്കടലിലും പുതിയ ന്യൂനമര്‍ദം രൂപപ്പെടാന്‍ സാധ്യത തെളിഞ്ഞതോടെ കേരളത്തില്‍ അടുത്ത ദിവസങ്ങളില്‍ ശക്തമായ മഴയ്ക്കു സാധ്യത. ലക്ഷദ്വീപിനു മുകളില്‍ രൂപപ്പെട്ട ന്യൂനമര്‍ദമാണ് അറബിക്കടലില്‍ ഗോവ കര്‍ണാടക തീരത്തിനു സമീപം ശക്തിപ്രാപിച്ചത്. ഇതു രണ്ട് ദിവസത്തിനകം തീവ്ര ന്യൂനമര്‍ദമാകുമെന്നാണു പ്രവചനം.

ഇന്ന് ആറു ജില്ലകളില്‍ യെല്ലോ അലേര്‍ട്ട് പ്രഖ്യാപിച്ചു. ഇന്നും നാളെയും ശക്തമായ മഴയ്ക്കും ഞായറും തിങ്കളും അതിശക്തമായ മഴയ്ക്കുമാണു സാധ്യതയെന്നു കാലാവസ്ഥ വകുപ്പ് അറിയിച്ചു. ഇന്നു തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി ജില്ലകളിലും നാളെ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലും യെലോ അലര്‍ട്ട് പ്രഖ്യാപിച്ചു. കേരള, ലക്ഷദ്വീപ് തീരങ്ങളില്‍ നിന്നു തിങ്കളാഴ്ച വരെയും കര്‍ണാടക തീരത്തു നിന്നു നാളെ വരെയും മീന്‍പിടിത്തത്തിനു പോകാന്‍ പാടില്ല. തമിഴ്‌നാട്ടിലെ രാമനാഥപുരം, തിരുനെല്‍വേലി ഭാഗങ്ങളില്‍ ഉയര്‍ന്ന തിരയ്ക്കു സാധ്യതയുണ്ട്.