കൊല്ലത്ത് രണ്ടു വയസ്സുകാരന് നേരെ തെരുവ് നായ ആക്രമണം; കുട്ടിയുടെ മുഖത്തും കഴുത്തിലും കണ്ണിനും ഗുരുതര പരിക്ക്; നായ കടിച്ചത് അമ്മയോടൊപ്പമിരുന്ന് ഭക്ഷണം കഴിക്കവെ

കൊല്ലം: കൊല്ലം ഓയൂരില്‍ രണ്ടു വയസ്സുകാരന് നേരെ തെരുവ് നായയുടെ ആക്രമണം. അമ്മയോടൊപ്പം വീടിന്റെ അടുക്കളഭാഗത്ത് ആഹാരം കഴിച്ചുകൊണ്ടിരുന്ന കുട്ടിക്കാണ് തെരുവ് നായയുടെ കടിയേറ്റത്. കുട്ടിയുടെ മുഖത്തും കഴുത്തിലും കണ്ണിനും ഗുരുതര പരിക്കുണ്ട്. മുഖത്തെ രണ്ട് എല്ലുകള്‍ക്ക് പൊട്ടലുണ്ട്. കണ്ണിന്റെ കൃഷ്ണമണിക്കാണ് പരിക്ക്.

പരിസരവാസികള്‍ എത്തിയാണ് നായയെ തുരുത്തിയത്. ഏരൂര്‍ പത്തടി കൊച്ചുവിളവീട്ടില്‍ ഷൈന്‍ഷായുടെയും അരുണിമയുടെയും മകന്‍ ആദം റഹാനെയാണ് നായ കടിച്ചത്. കഴിഞ്ഞദിവസം അമ്മയുടെ വീടായ ഓടനാവട്ടം കളപ്പില കുളത്തൂരഴികത്ത് ഉച്ചയ്ക്ക് രണ്ടരയോടെയാണ് സംഭവം. അമ്മ കുട്ടിക്ക് ആഹാരം കൊടുക്കുന്നതിനിടയില്‍ നായ ആക്രമിക്കുകയായിരുന്നു. അമ്മ നായയെ തടയാന്‍ ശ്രമിച്ചെങ്കിലും കഴിഞ്ഞില്ല. ആദ്യം താലൂക്ക് ആശുപത്രിയിലെത്തിച്ച കുട്ടി ഇപ്പോള്‍ തിരുവനന്തപുരം എസ്എടി ആശുപത്രിയില്‍ ചികിത്സയിലാണ്.