തന്റെ ഭാര്യയുമായി സിപിഎം ലോക്കല്‍ സെക്രട്ടറിയുടെ വഴിവിട്ട ബന്ധത്തിനെതിരേ പ്രവാസി പരാതി നല്‍കിയത് പല തവണ; ജില്ലാ നേതൃത്വം സംരക്ഷിച്ചപ്പോള്‍ ഭര്‍ത്താവിന്റെ അറ്റകൈ പ്രയോഗം; നേതാക്കളുമായുളള ഫോണ്‍ സംഭാഷണം പരസ്യപ്പെടുത്തുമെന്ന് വന്നതോടെ ലോക്കല്‍ സെക്രട്ടറി പുറത്ത്: പിന്നാലെ പരാതിക്കാരന്റെ വീടു കയറി ആക്രമിച്ചതിന് കേസും
വെണ്ണിക്കുളം ലോക്കല്‍ സെക്രട്ടറി പരാതിക്കാരനായ പ്രവാസിയുടെ വീട് ആക്രമിച്ചു
പത്തനംതിട്ട: തന്റെ ഭാര്യയുമായി അവിഹിത ബന്ധം ആരോപിച്ച് പ്രവാസി നല്‍കിയ പരാതിയില്‍ സിപിഎം ലോക്കല്‍ സെക്രട്ടറിയെ ജില്ലാ നേതൃത്വം സംരക്ഷിച്ചത് മാസങ്ങളോളം. ഗതികെട്ട പ്രവാസി ഒടുക്കം താന്‍ നേതാക്കളെ വിളിച്ചതും അവര്‍ പറഞ്ഞ മറുപടിയും ഉള്‍ക്കൊള്ളുന്ന ഫോണ്‍ സംഭാഷണം പുറത്തു വിടുമെന്ന് ഭീഷണി മുഴക്കി. ഇതോടെ ലോക്കല്‍ സെക്രട്ടറിയെ നീക്കി. സ്ഥാനം നഷ്ടമായതിലുള്ള അരിശം മൂലം ലോക്കല്‍ സെക്രട്ടറി പരാതിക്കാരന്റെ വീട് ആക്രമിച്ചു. വീട്ടിലുണ്ടായിരുന്ന പ്രവാസിയുടെ വയോധിക മാതാവിന്റെ പരാതിയില്‍ പോലീസ് കേസുമെടുത്തു.
വെണ്ണിക്കുളം ലോക്കല്‍ സെക്രട്ടറിയായിരുന്ന സുനില്‍ വര്‍ഗീസിനെയാണ് കഴിഞ്ഞ ദിവസം നീക്കിയത്. പിറ്റേന്ന് പുലര്‍ച്ചെ ഒരു മണിയോടെയാണ് സുനില്‍ വര്‍ഗീസ് പരാതിക്കാരന്റെ മാതാവ് മാത്രം താമസിക്കുന്ന വീട്ടില്‍ അതിക്രമിച്ച് കയറി അസഭ്യം വിളിച്ചതും ആക്രമണം നടത്തിയതും. വയോധികയുടെ പരാതിയില്‍ ഇയാള്‍ക്കെതിരേ കോയിപ്രം പോലീസ് കേസ് രജിസ്റ്റര്‍ ചെയ്തു. ഇന്നലെ മറുനാടനാണ് ഈ വാര്‍ത്ത പുറത്തു വിട്ടത്.
ഇരവിപേരൂര്‍ ഏരിയ കമ്മിറ്റിക്ക് കീഴിലുള്ള വെണ്ണിക്കുളം ലോക്കല്‍ കമ്മിറ്റി സെക്രട്ടറി സുനില്‍ വര്‍ഗീസിനെതിരെയാണ് കോയിപ്രം പൊലീസ് കേസെടുത്തത്. തന്റെ ഭാര്യയുമായി സുനിലിന് അടുപ്പമുണ്ടെന്ന് കാട്ടി പ്രവാസിയായ ഭര്‍ത്താവ് സിപിഎം സംസ്ഥാന സെക്രട്ടറി എംവി ഗോവിന്ദനും മുന്‍പ് ജില്ലാ സെക്രട്ടറിയായിരുന്ന കെ.പി. ഉദയഭാനുവിനും പരാതി നല്‍കിയിരുന്നു. 'പാര്‍ട്ടി കോടതി'യില്‍ നിന്നും നീതി ലഭിക്കാതെ വന്നതോടെ കഴിഞ്ഞ ദിവസം പരാതിക്കാരന്‍ ഉദയഭാനുവിനെ വിളിച്ച് രൂക്ഷമായി പ്രതികരിച്ചു. നിയമ നടപടിയിലേക്ക് നീങ്ങുമെന്നും അറിയിച്ചു. നേതാക്കളുമായി നടത്തിയ ഫോണ്‍ സംഭാഷണം പുറത്തു വിടുമെന്നും പറഞ്ഞതോടെ മറ്റു വഴിയില്ലാതായി.
പഞ്ചായത്ത് തെരഞ്ഞെടുപ്പ് പടിവാതില്‍ക്കല്‍ എത്തി നില്‍ക്കുമ്പോള്‍ സംഗതി നാറ്റക്കേസാകുമെന്ന് കണ്ട് സിപിഎം ജില്ലാ നേതൃത്വം നടപടിയുമായി രംഗത്തിറങ്ങി. ഇരവിപേരൂര്‍ ഏരിയ സെക്രട്ടറിയുടെ ചുമതലയുള്ള അനില്‍കുമാര്‍ കഴിഞ്ഞ ദിവസം വിഷയം ലോക്കല്‍ കമ്മിറ്റിയില്‍ റിപ്പോര്‍ട്ട് ചെയ്തു. സുനിലിനെ നീക്കി പകരം ചുമതല ജില്ലാ പഞ്ചായത്ത് അംഗം ജിജി മാത്യുവിന് നല്‍കിയതായും അറിയിച്ചു.
എന്നാല്‍ സുനിലിനെ അനുകൂലിക്കുന്നവര്‍ യോഗത്തില്‍ ബഹളം വച്ചു. യോഗം അവസാനിച്ച ശേഷം രാത്രിയോടെയാണ് പരാതിക്കാരന്റെ വീട്ടില്‍ അതിക്രമിച്ച് കടന്ന് നാശനഷ്ടം ഉണ്ടാക്കിയത്. പരാതിക്കാരന്റെ എഴുപത്തിയഞ്ചു വയസ്സുള്ള മാതാവ് മാത്രമാണ് ആ സമയം വീട്ടില്‍ ഉണ്ടായിരുന്നത്. ഇവരുടെ പരാതിയിലാണ് പോലീസ് കേസെടുത്തിരിക്കുന്നത്. എന്നാല്‍ പ്രതിയുടെ പേരായി സുനില്‍ വെണ്ണിക്കുളം എന്ന് മാത്രമാണ് രേഖപ്പെടുത്തിയിരിക്കുന്നത്. സിപിഎം പ്രാദേശിക നേതാവായ ഇയാളോട് മുട്ടാന്‍ നില്‍ക്കണ്ട എന്ന ഉപദേശവും പൊലീസ് നല്‍കിയതായാണ് പരാതിക്കാരന്റെ സമീപവാസികള്‍ പറയുന്നത്. കേസ് ഒതുക്കി തീര്‍ക്കുന്നതിനും മാധ്യമങ്ങളെ തെറ്റിദ്ധരിപ്പിക്കുന്നതിനും വേണ്ടിയാണ് സുനില്‍ വെണ്ണിക്കുളം എന്ന് മാത്രം എഎഫ്ഐആറില്‍ രേഖപ്പെടുത്തിയതെന്നും പറയുന്നു.