'ഉപരാഷ്ട്രപതി സഭാ മേലധ്യക്ഷന്മാരെ വിളിച്ച് തൊട്ടടുത്ത ദിവസമാണ് ഈ സംഭവം; അതാണ് ഏറ്റവും വേദനാജനകം; ക്രൈസ്തവ സമൂഹത്തെ തിരഞ്ഞുപിടിച്ച് ആക്രമിക്കുമ്പോള് ഭരണകൂടം നിശബ്ദത പാലിക്കുന്നു'; മഹാരാഷ്ട്രയില് ക്രൈസ്തവ പുരോഹിതന്റെ അറസ്റ്റില് പ്രതികരണവുമായി സി.എസ്.ഐ സഭ
'ഉപരാഷ്ട്രപതി സഭാ മേലധ്യക്ഷന്മാരെ വിളിച്ച് തൊട്ടടുത്ത ദിവസമാണ് ഈ സംഭവം
ന്യൂഡല്ഹി: നിര്ബന്ധിത മതപരിവര്ത്തനം നടത്തിയെന്ന് ആരോപിച്ച് ബി.ജെ.പി ഭരിക്കുന്ന മഹാരാഷ്ട്രയില് ക്രൈസ്തവ പുരോഹിതനെ അറസ്റ്റ് ചെയ്തതില് പ്രതിഷേധിച്ചു സിഎസ്ഐ സഭ. വിഷയത്തില് പ്രതികരിച്ചു രംഗത്തുവന്നത് സി.എസ്.ഐ സഭ ബിഷപ്സ് കൗണ്സില് സെക്രട്ടറി ബിഷപ്പ് ഡോ. മലയില് സാബുവാണ്. ഉപരാഷ്ട്രപതി സി.പി. രാധാകൃഷ്ണന് സഭാ മേലധ്യക്ഷന്മാരെ വിളിച്ച് തൊട്ടടുത്ത ദിവസമാണ് ഈ സംഭവമെന്നത് ഏറ്റവും വേദനാജനകമായ അനുഭവമാണെന്ന് അദ്ദേഹം മാധ്യമങ്ങളോട് പറഞ്ഞു.
'ക്രിസ്ത്യാനികള്ക്ക് നേരെ വര്ധിച്ചുവരുന്ന ആക്രമണങ്ങളുടെ പശ്ചാത്തലത്തില് ഉപരാഷ്ട്രപതി സി.പി. രാധാകൃഷ്ണന് സഭാ മേലധ്യക്ഷന്മാരെ കഴിഞ്ഞ ദിവസം ലോക്ഭവനില് വിളിച്ചിരുന്നു. ക്രൈസ്തവ സമൂഹത്തെ തിരഞ്ഞുപിടിച്ച് ആക്രമിക്കുമ്പോള് ഭരണകൂടം നിശബ്ദത പാലിക്കുന്നതായും അത് അക്രമം ചെയ്യുന്ന ആളുകള്ക്ക് പ്രേരണയാകുന്നതായും ഞങ്ങള് പറഞ്ഞിരുന്നു. ഈ കാര്യങ്ങളില് ഗവണ്മെന്റും നേതൃത്വം നല്കുന്ന രാഷ്ട്രീയ പാര്ട്ടിയും പ്രതികരിക്കണമെന്നും മതമേലധ്യക്ഷന്മാരുടെ യോഗം ഉപരാഷ്ട്രപതിയോട് ആവശ്യപ്പെട്ടതാണ്. അതിന്റെ അടുത്ത ദിവസമാണ് ഇത് സംഭവിച്ചത് എന്നതാണ് ഏറ്റവും വേദനാജനകമായ അനുഭവം' -അദ്ദേഹം പറഞ്ഞു.
ഇന്ത്യന് ഭരണഘടന നല്കുന്ന സ്വാതന്ത്ര്യത്തിന് നേരെ എതിരായ കാര്യമാണ് സി.എസ്.ഐ നാഗ്പൂര് മിഷനിലെ ഫാ. സുധീര്, ഭാര്യ ജാസ്മിന്, സ്വദേശികളായ രണ്ടുകുടുംബങ്ങളുടെയും അറസ്റ്റെന്നും ബിഷപ്പ് ഡോ. മലയില് സാബു പറഞ്ഞു. 'സിഎസ്ഐ സൗത്ത് കേരള ഇടവകയിലെ പട്ടക്കാരനാണ് ഫാ. സുധീര്. കഴിഞ്ഞ 12 വര്ഷമായി നാഗ്പൂരില് സഭ പ്രവര്ത്തനങ്ങള് നടക്കുന്നുണ്ട്. ഇന്നും ഇന്നലെയും തുടങ്ങിയതല്ല. അവിടെ മതപരിവര്ത്തനമല്ല നടക്കുന്നത്.
കുഗ്രാമങ്ങളിലുള്ള എഴുത്തും വായനയും അറിയാത്തവര്ക്ക് സാക്ഷരതാ ക്ലാസുകളും കുട്ടികള്ക്ക് നഴ്സറി സ്കൂളുകളും നടത്തുന്നുണ്ട്. ഗ്രാമങ്ങളില് ഉള്ളവര്ക്ക് ആരോഗ്യവും വൃത്തിയും സംബന്ധിച്ച പരിശീലനങ്ങള് കൊടുക്കുന്നുണ്ട്. ഇന്ത്യയുടെ ഗ്രാമങ്ങളില് ക്രൈസ്തവ മിഷണറിമാരുടെ പ്രവര്ത്തനങ്ങള് വളരെയധികം നടന്നു എന്നതിന്റെ തെളിവാണ് അവിടെയുള്ള വളര്ച്ച. ഗവണ്മെന്റിന് ചെന്നെത്താന് സാധിക്കാത്ത ധാരാളം മേഖലകളിലാണ് ക്രൈസ്തവ മിഷണറിമാര് പ്രവര്ത്തിക്കുന്നത്.
അകാരണമായാണ് ഇവരെ അറസ്റ്റ് ചെയ്തത് എന്നതില് യാതൊരു സംശയവുമില്ല. ക്രിസ്മസ്, ന്യൂ ഇയര് ആരാധനക്ക് ഫാ. സുധീറിനെ അങ്ങോട്ട് വിളിച്ചുവരുത്തിയതായിരുന്നു. ആ ആരാധനയില് പങ്കെടുത്തു എന്നതിന്റെ പേരിലാണ് മതപരിവര്ത്തനം ആരോപിച്ച് അവരെ അറസ്റ്റ് ചെയ്തത്. സിഎസ്ഐ ബിഷപ്സ് കൗണ്സില് ശക്തമായി അപലപിക്കുന്നു. ഗവണ്മെന്റ് ഇത്തരം നടപടികളില് നിന്ന് പിന്മാറണമെന്ന് ബിഷപ്സ് കൗണ്സില് ആവശ്യപ്പെടുകയും ചെയ്യുന്നു. നിലവില് അറസ്റ്റ് രേഖപ്പെടുത്തിയതിനാല് നിയമവശം നോക്കി മുന്നോട്ട് പോകും. നിയമസഹായം നല്കാന് പ്രത്യേകം ശ്രമിക്കും' -ബിഷപ്പ് പറഞ്ഞു.
മലയാളി വൈദികനും ഭാര്യയും അടക്കം 12 പേര്ക്കെതിരെ നിര്ബന്ധിത മതപരിവര്ത്തന കുറ്റം ചുമത്തിയാണ് പോലീസ് കേസെടുത്തിരിക്കുന്നത്. നാഗ്പൂര് മിഷനിലെ ഫാദറും തിരുവനന്തപുരം അമരവിള സ്വദേശിയുമായ സുധീര്, അദ്ദേഹത്തിന്റെ ഭാര്യ ജാസ്മിന് എന്നിവരുള്പ്പെടെയുള്ളവരെയാണ് കഴിഞ്ഞ ദിവസം പൊലീസ് കസ്റ്റഡിയിലെടുത്തത്. അറസ്റ്റിലായവരെ ഇന്ന് കോടതിയില് ഹാജരാക്കും.
അറസ്റ്റിലായ വൈദികനും ഭാര്യയും കൂടാതെ, പ്രതിപ്പട്ടികയിലുള്ള 12 പേരില് പ്രദേശവാസികളായ നാല് വിശ്വാസികള്, പ്രാര്ത്ഥനാ യോഗം നടന്ന വീടിന്റെ ഉടമയും ഭാര്യയും, കൂടാതെ അറസ്റ്റിലായവരെക്കുറിച്ച് അന്വേഷിക്കാന് പോലീസ് സ്റ്റേഷനിലെത്തിയ നാല് പേര് എന്നിവരും ഉള്പ്പെടുന്നു പ്രാദേശിക വൈദികരുടെ ക്ഷണം സ്വീകരിച്ചാണ് ഫാദര് സുധീറും ഭാര്യയും പ്രാര്ത്ഥനാ യോഗത്തില് പങ്കെടുത്തതെന്നാണ് വിവരം.