ഓപ്പറേഷന്‍ സിന്ദൂറിന് പ്രതികാരം? ജമ്മു കശ്മീരില്‍ വീണ്ടും ആക്രമണം നടത്താന്‍ ലഷ്‌കര്‍-ഇ-തൊയ്ബയും ജെയ്ഷെ മുഹമ്മദും; ഭീകരസംഘടനകളെ ഒന്നിപ്പിക്കാന്‍ ഐഎസ്‌ഐ; ഡ്രോണുകള്‍ ഉപയോഗിച്ച് ആകാശനിരീക്ഷണം നടത്തി; ചാവേര്‍ ആക്രമണങ്ങള്‍ക്കും സാധ്യത; അതീവ ജാഗ്രതയില്‍ രഹസ്യാന്വേഷണ ഏജന്‍സികള്‍
ന്യൂഡല്‍ഹി: പഹല്‍ഗാം ഭീകരാക്രമണത്തിന് മറുപടിയായി ആറു മാസങ്ങള്‍ക്കു മുന്‍പ് ഇന്ത്യന്‍ സൈന്യം നടത്തിയ ഓപ്പറേഷന്‍ സിന്ദൂറിലെ നഷ്ടങ്ങള്‍ക്ക് പ്രതികാരമായി ജമ്മു കശ്മീരില്‍ വീണ്ടും ഭീകരാക്രമണങ്ങള്‍ക്ക് പാക്ക് ഭീകരസംഘടനകള്‍ കോപ്പുകൂട്ടുന്നതായി റിപ്പോര്‍ട്ടുകള്‍. ലഷ്‌കര്‍-ഇ-തൊയ്ബയും ജെയ്ഷെ മുഹമ്മദും കൈകോര്‍ത്ത് ഒരു പുതിയ ആക്രമണ പദ്ധതി തയ്യാറാക്കുന്നതായി രഹസ്യാന്വേഷണ ഏജന്‍സികള്‍ക്ക് വിവരം ലഭിച്ചു. ഈ സാഹചര്യത്തില്‍ താഴ്വരയില്‍ അതീവ ജാഗ്രത പുലര്‍ത്താന്‍ നിര്‍ദ്ദേശം നല്‍കിയിട്ടുണ്ട്.
'സിന്ദൂര്‍ ഓപ്പറേഷന്‍' വഴി ഭീകരര്‍ക്ക് കനത്ത നാശനഷ്ടം വരുത്താന്‍ സൈന്യത്തിന് കഴിഞ്ഞിരുന്നു. എന്നിരുന്നാലും, ഈ തിരിച്ചടികള്‍ക്ക് ശേഷം പാക്കിസ്ഥാന്‍ കേന്ദ്രീകരിച്ചുള്ള ഭീകര സംഘടനകള്‍ വീണ്ടും പ്രവര്‍ത്തനസജ്ജരാകാനുള്ള ശ്രമങ്ങള്‍ നടത്തുന്നുവെന്ന് സുരക്ഷാ വൃത്തങ്ങള്‍ സൂചിപ്പിക്കുന്നു. വിവിധ ഇന്റലിജന്‍സ് ഏജന്‍സികളില്‍ നിന്ന് ലഭിച്ച വിവരങ്ങള്‍ സംയോജിപ്പിച്ചുള്ള വിലയിരുത്തലിലാണ് ഈ നിഗമനത്തിലെത്തിയിരിക്കുന്നത്.
ഇരു സംഘടനകളും സംയുക്തമായി ആക്രമണങ്ങള്‍ നടത്താന്‍ സാധ്യതയുണ്ടെന്നും, ഇതിനായി പുതിയ തന്ത്രങ്ങള്‍ ആവിഷ്‌കരിച്ചതായും റിപ്പോര്‍ട്ടുകളുണ്ട്. ഇത്തരം നീക്കങ്ങളെ നേരിടാന്‍ ആവശ്യമായ എല്ലാ മുന്‍കരുതലുകളും സ്വീകരിച്ചിട്ടുണ്ടെന്നും, സുരക്ഷാ സേനകള്‍ അതീവ ജാഗ്രതയോടെയാണ് കാര്യങ്ങള്‍ നിരീക്ഷിക്കുന്നതെന്നും അധികൃതര്‍ അറിയിച്ചു. കശ്മീരിലെ സ്ഥിതിഗതികള്‍ വിലയിരുത്താനും പ്രതിരോധ നടപടികള്‍ ശക്തിപ്പെടുത്താനും ഉന്നതതല യോഗങ്ങള്‍ നടക്കുന്നുണ്ട്. ഈ നീക്കങ്ങളെക്കുറിച്ച് കൂടുതല്‍ വിവരങ്ങള്‍ ലഭ്യമായിട്ടില്ലെങ്കിലും, ഏത് അടിയന്തര സാഹചര്യത്തെയും നേരിടാന്‍ സൈന്യം സജ്ജമാണെന്ന് ഉറപ്പുവരുത്തിയിട്ടുണ്ട്.
പാക്കിസ്ഥാന്‍ കേന്ദ്രീകരിച്ച് പ്രവര്‍ത്തിക്കുന്ന ലഷ്‌കറെ തൊയ്ബ (LeT), ജെയ്ഷെ മുഹമ്മദ് (JeM) തുടങ്ങിയ ഭീകരസംഘടനകള്‍ ഇന്ത്യക്കെതിരായി സംഘടിത ആക്രമണ പരമ്പരയ്ക്ക് തയ്യാറെടുക്കുന്നതായി റിപ്പോര്‍ട്ട്. പാക്ക് ഭീകരകേന്ദ്രങ്ങളെ തകര്‍ത്തെറിഞ്ഞ ഓപ്പറേഷന്‍ സിന്ദൂറിന് ശേഷം ആറ് മാസങ്ങള്‍ക്ക് ശേഷം ലഭിച്ചിരിക്കുന്ന ഈ വിവരം ഗൗരവത്തോടെയാണ് ഇന്ത്യ കാണുന്നത്. ഇന്റലിജന്‍സ് രേഖകള്‍ പ്രകാരം, ഭീകരസംഘടനകള്‍ സെപ്റ്റംബര്‍ മുതല്‍ നുഴഞ്ഞുകയറ്റം, നിരീക്ഷണം, അതിര്‍ത്തി കടന്നുള്ള സഹായങ്ങള്‍ എന്നിവ വര്‍ദ്ധിപ്പിച്ചിട്ടുണ്ട്. പാക്കിസ്ഥാന്റെ സ്പെഷ്യല്‍ സര്‍വീസസ് ഗ്രൂപ്പിന്റെയും (SSG) ഇന്റര്‍-സര്‍വീസസ് ഇന്റലിജന്‍സിന്റെയും (ISI) സഹായത്തോടെ, ലഷ്‌കറെ തൊയ്ബയുടെയും ജെയ്ഷെ മുഹമ്മദിന്റെയും യൂണിറ്റുകള്‍ നിയന്ത്രണരേഖയിലെ (LoC) നുഴഞ്ഞുകയറ്റ പാതകളിലൂടെ ജമ്മു കശ്മീരിലേക്ക് പ്രവേശിച്ചതായി റിപ്പോര്‍ട്ടുണ്ട്.
ഷംഷേര്‍ എന്ന ഭീകരന്റെ നേതൃത്വത്തിലുള്ള ലഷ്‌കറെ തൊയ്ബ യൂണിറ്റ് ഡ്രോണുകള്‍ ഉപയോഗിച്ച് ആകാശനിരീക്ഷണം നടത്തിയതായും റിപ്പോര്‍ട്ടുകളുണ്ട്. ഇത് വരും ആഴ്ചകളില്‍ ചാവേര്‍ ആക്രമണങ്ങള്‍ക്കോ ആയുധങ്ങള്‍ താഴെയിറക്കുന്നതിനോ ഉള്ള സാധ്യതയുടെ സൂചനയാണ്. മുന്‍ എസ്എസ്ജി സൈനികരും ഭീകരരും അടങ്ങുന്ന പാക്കിസ്ഥാന്റെ ബോര്‍ഡര്‍ ആക്ഷന്‍ ടീമുകളെ (BATs) പാക് അധീന കശ്മീരില്‍ (PoK) വീണ്ടും വിന്യസിച്ചിട്ടുണ്ടെന്ന് ഇന്റലിജന്‍സ് വിലയിരുത്തുന്നു. ഇത് ഇന്ത്യന്‍ സൈനിക പോസ്റ്റുകള്‍ക്ക് നേരെ അതിര്‍ത്തി കടന്നുള്ള ആക്രമണ സാധ്യതയെയാണ് സൂചിപ്പിക്കുന്നത്.
പാക്ക് അധീന കശ്മീരില്‍ ഒക്ടോബറില്‍ നടന്ന ഉന്നതതല യോഗങ്ങളില്‍ ജമാഅത്തെ ഇസ്ലാമി, ഹിസ്ബുള്‍ മുജാഹിദ്ദീന്‍ എന്നിവയിലെ മുതിര്‍ന്ന നേതാക്കളും ഐഎസ്‌ഐ ഉദ്യോഗസ്ഥരും പങ്കെടുത്തതായി റിപ്പോര്‍ട്ടുണ്ട്. ചോര്‍ത്തിയെടുത്ത ആശയവിനിമയങ്ങള്‍ പ്രകാരം, നിഷ്‌ക്രിയമായ ഭീകരസംഘങ്ങളെ പുനരുജ്ജീവിപ്പിക്കാനും മുന്‍ കമാന്‍ഡര്‍മാര്‍ക്ക് പ്രതിമാസ സ്റ്റൈപ്പന്‍ഡ് നല്‍കാനും ഓപ്പറേഷന്‍ സിന്ദൂറില്‍ സംഭവിച്ച നഷ്ടങ്ങള്‍ക്ക് പ്രതികാരം ചെയ്യാന്‍ ഭീകരസംഘങ്ങള്‍ക്ക് നിര്‍ദ്ദേശം നല്‍കാനും ഈ യോഗങ്ങളില്‍ തീരുമാനമെടുത്തിട്ടുണ്ട്.
ഇന്ത്യന്‍ സുരക്ഷാ സേനയ്ക്കും രാഷ്ട്രീയ പ്രവര്‍ത്തകര്‍ക്കും എതിരെ 'പ്രതികാര ആക്രമണങ്ങള്‍' ശക്തമാക്കാന്‍ ഐഎസ്‌ഐ, ഭീകരസംഘടനകള്‍ക്ക് നിര്‍ദ്ദേശം നല്‍കിയിട്ടുണ്ടെന്നും റിപ്പോര്‍ട്ട് വ്യക്തമാക്കുന്നു. കശ്മീര്‍ താഴ്വരയിലുടനീളമുള്ള പ്രാദേശിക അനുഭാവികളെയും സഹായങ്ങളെയും ലഷ്‌കറെ തൊയ്ബ പ്രവര്‍ത്തകര്‍ കണ്ടെത്താന്‍ തുടങ്ങിയിട്ടുണ്ടെന്നും വിവരമുണ്ട്.
ഭീകരപ്രവര്‍ത്തനങ്ങള്‍ക്ക് പണം കണ്ടെത്താനായി ലഹരി-ഭീകരവാദ, ആയുധക്കടത്ത് ശൃംഖലകളും വിപുലീകരിക്കുന്നുണ്ട്. ഈ വര്‍ഷം ആദ്യം പഞ്ചാബിലും രാജസ്ഥാന്റെ ചില ഭാഗങ്ങളിലും കണ്ടതിന് സമാനമായ രീതികളാണിത്. ജമ്മു കശ്മീരില്‍ നടന്ന പ്രാദേശിക തിരഞ്ഞെടുപ്പുകളും വിനോദസഞ്ചാരത്തിന്റെ തിരിച്ചുവരവും പ്രദേശം സാധാരണ നിലയിലേക്ക് മടങ്ങുന്നതിന്റെ സൂചനകളായി വിലയിരുത്തപ്പെട്ടിരുന്നു. എന്നിരുന്നാലും, ഐഎസ്‌ഐയുടെ പിന്തുണയുള്ള ഭീകര ശൃംഖല ഈ പുരോഗതിയെ തകര്‍ക്കാന്‍ ശ്രമിക്കുകയാണെന്ന് സുരക്ഷാ ഏജന്‍സികള്‍ മുന്നറിയിപ്പ് നല്‍കുന്നു.
നോര്‍ത്തേണ്‍ കമാന്‍ഡ് മേഖലകളിലുടനീളം ഇന്ത്യന്‍ സൈന്യവും ഇന്റലിജന്‍സ് സംവിധാനങ്ങളും അതീവ ജാഗ്രതയിലാണെന്ന് ഉന്നത സൈനിക വക്താക്കള്‍ സൂചിപ്പിച്ചു. ഗുജറാത്ത്, രാജസ്ഥാന്‍ എന്നീ സംസ്ഥാനങ്ങളുടെ പടിഞ്ഞാറന്‍ അതിര്‍ത്തികളില്‍ ഇന്ത്യ തങ്ങളുടെ ഏറ്റവും വലിയ ത്രിസേനാ അഭ്യാസമായ 'ത്രിശൂല്‍' നടത്തുന്ന സമയത്താണ് ഈ വിവരങ്ങള്‍ പുറത്തുവരുന്നത്. ശൈത്യകാലം അടുക്കുന്നതോടെ, നുഴഞ്ഞുകയറ്റം സാധാരണയായി കുറയാറുണ്ട്.