ജയവും തോല്വിയുമല്ല മറിച്ച് തന്റെ രാഷ്ട്രീയം പറയാനുള്ള വേദിയായി മലമ്പുഴയെ കാണാനാണ് സുരേഷിന് താല്പ്പര്യം; പക്ഷേ 'അരുണ്കുമാര് വന്നാല് മലമ്പുഴയിലില്ല'; വി.എസിന്റെ മകനെതിരെ മത്സരിക്കാനില്ലെന്ന് സുരേഷ്; മലമ്പുഴയിലെ യുഡിഎഫ് സ്ഥാനാര്ത്ഥിയില് തീരുമാനം സിപിഎം ആരെ മത്സരിക്കുമെന്ന് നോക്കി മാത്രം; മലമ്പുഴയില് എന്തും സംഭവിക്കാം
പാലക്കാട്: വി.എസ്. അച്യുതാനന്ദന്റെ വിശ്വസ്തനും സന്തതസഹചാരിയുമായിരുന്ന എ. സുരേഷ് യുഡിഎഫ് പാളയത്തിലേക്ക് ചുവടുറപ്പിക്കുമ്പോള് മലമ്പുഴയില് വമ്പന് ചര്ച്ചകള്. വി.എസിന്റെ മകന് വി.എ. അരുണ്കുമാര് മലമ്പുഴയില് സിപിഎം സ്ഥാനാര്ത്ഥിയായി എത്തിയേക്കുമെന്ന ശക്തമായ സൂചനകള്ക്കിടെ, മകനെതിരെ മത്സരിക്കാന് തനിക്ക് ബുദ്ധിമുട്ടുണ്ടെന്ന് സുരേഷ് തുറന്നുപറഞ്ഞത് യുഡിഎഫിനെ അങ്കലാപ്പിലാക്കിയിരിക്കുകയാണ്. അരുണ്കുമാര് വന്നാല് തന്റെ തീരുമാനത്തില് പുനര്വിചിന്തനം നടത്തുമെന്ന സുരേഷിന്റെ നിലപാട് മലമ്പുഴയിലെ യുഡിഎഫ് സ്ഥാനാര്ത്ഥി പ്രഖ്യാപനം സിപിഎം പട്ടിക വന്നതിന് ശേഷം മതിയെന്ന തീരുമാനത്തിലേക്ക് കോണ്ഗ്രസിനെ എത്തിച്ചിരിക്കുകയാണ്.
പ്രതിപക്ഷ നേതാവ് വി.ഡി. സതീശന് നയിക്കുന്ന പുതുയുഗ യാത്ര ഇന്ന് പാലക്കാട്ടെത്തുമ്പോള് എ. സുരേഷ് ജാഥയില് പങ്കെടുക്കുമെന്നാണ് വിവരം. സന്ദീപ് വാര്യരുടെ സാന്നിധ്യത്തില് കെപിസിസി നേതൃത്വവുമായി നടത്തിയ ചര്ച്ചയില് സുരേഷ് തന്റെ നിലപാട് വ്യക്തമാക്കിയിട്ടുണ്ട്. 'സിപിഎമ്മില് കടുത്ത അപമാനമാണ് നേരിട്ടത്. പുറത്താക്കിയാല് പുറത്താക്കിയത് തന്നെയാണെന്ന എം.വി. ഗോവിന്ദന്റെ പ്രസ്താവന ദുഃഖിപ്പിച്ചു. എന്നാല് ഇപ്പോഴും ആ പഴയ രാഷ്ട്രീയ മനസ്സ് കൂടെയുണ്ട്. വി.എസിന്റെ മകന് അരുണ്കുമാര് എതിരാളിയായി വന്നാല് ആ സൗഹൃദത്തിന് മുന്നില് മത്സരം വേണ്ടെന്ന് വെക്കും,' സുരേഷ് വ്യക്തമാക്കി.
മലമ്പുഴയില് സിപിഎം സ്ഥാനാര്ത്ഥിയായി വി.എ. അരുണ്കുമാറിന് തന്നെയാണ് മുന്തൂക്കമെന്നാണ് പുറത്തുവരുന്ന സൂചനകള്. വി.എസിന്റെ മകനെന്ന പരിഗണനയും മണ്ഡലത്തിലെ സ്വാധീനവും വോട്ടാക്കി മാറ്റാനാണ് സിപിഎം ലക്ഷ്യമിടുന്നത്. എന്നാല് സുരേഷിനെപ്പോലെ ഒരാള് യുഡിഎഫ് സ്വതന്ത്രനായി മത്സരിക്കാന് ഇറങ്ങുന്നത് പാര്ട്ടിയുടെ ഉറച്ച വോട്ടുകളില് വിള്ളല് വീഴ്ത്തുമെന്ന് ഉറപ്പാണ്. ഇത് മുന്കൂട്ടി കണ്ടാണ് സുരേഷിനെ തിരിച്ചെടുക്കില്ലെന്നും അയാളുടെ പോക്ക് വോട്ടുകളെ ബാധിക്കില്ലെന്നും എം.വി. ഗോവിന്ദന് ആവര്ത്തിക്കുന്നത്.
സുരേഷിന്റെ യുഡിഎഫ് പ്രവേശനത്തെ വി.ഡി. സതീശന് സ്വാഗതം ചെയ്തെങ്കിലും മലമ്പുഴയിലെ സ്ഥാനാര്ത്ഥിത്വത്തില് സസ്പെന്സ് തുടരുകയാണ്. സിപിഎം സ്ഥാനാര്ത്ഥി ആരാണെന്ന് ഉറപ്പായ ശേഷം മാത്രം മതി സുരേഷിന്റെ പ്രഖ്യാപനം എന്നാണ് യുഡിഎഫ് കണക്കുകൂട്ടല്. അരുണ്കുമാറാണ് സ്ഥാനാര്ത്ഥിയെങ്കില് മറ്റൊരു സ്വതന്ത്രനെയോ കോണ്ഗ്രസ് നേതാവിനെയോ മലമ്പുഴയില് പരീക്ഷിക്കേണ്ടി വരും. വരുംദിവസങ്ങളില് കൂടുതല് രാഷ്ട്രീയ വിസ്മയങ്ങള് ഉണ്ടാകുമെന്ന് സതീശന് അവകാശപ്പെടുമ്പോള്, മലമ്പുഴയുടെ പോരാട്ടം വി.എസിന്റെ പാരമ്പര്യത്തെ ചുറ്റിപ്പറ്റിയാകുമെന്ന് ഉറപ്പാവുകയാണ്.
അച്യുതാനന്ദന്റെ വിശ്വസ്തനും നിഴലുമായിരുന്ന എ. സുരേഷ് യുഡിഎഫ് സ്വതന്ത്രനായി മത്സരിക്കാന് ഒരുങ്ങുമ്പോഴും പാര്ട്ടിയെക്കാള് ഉപരിയായി വ്യക്തിബന്ധങ്ങള്ക്ക് നല്കുന്ന വിലയാണ് ഇപ്പോള് ചര്ച്ചയാകുന്നത്. വി.എസിന്റെ മകന് വി.എ. അരുണ്കുമാര് മലമ്പുഴയില് സിപിഎം സ്ഥാനാര്ത്ഥിയായി എത്താന് സാധ്യതയേറിയതോടെ, മകനെതിരെ മത്സരിക്കാന് തനിക്ക് ബുദ്ധിമുട്ടുണ്ടെന്നും തീരുമാനത്തില് പുനര്വിചിന്തനം നടത്തുമെന്നും സുരേഷ് തുറന്നുപറഞ്ഞത് യുഡിഎഫ് ക്യാമ്പിനെ ഞെട്ടിച്ചിരിക്കുകയാണ്.
സിപിഎം കോട്ടയായ മലമ്പുഴ നിലനിര്ത്താന് വി.എസിന്റെ പാരമ്പര്യം തന്നെ വേണമെന്ന ഉറച്ച വിശ്വാസത്തിലാണ് ഒരു വിഭാഗം നേതാക്കള്. ഇതിനായി വി.എ. അരുണ്കുമാറിന്റെ പേരിനാണ് മണ്ഡലത്തില് മുന്തൂക്കം. അരുണ്കുമാര് സ്ഥാനാര്ത്ഥിയായാല് വി.എസ് പക്ഷക്കാരുടെ വോട്ടുകള് ഉറപ്പിക്കാമെന്ന കണക്കുകൂട്ടലിലാണ് എകെജി സെന്റര്. സിപിഎം സ്ഥാനാര്ത്ഥി പ്രഖ്യാപനം വന്ന ശേഷം മാത്രം മലമ്പുഴയില് കൈപ്പത്തി ചിഹ്നത്തിലോ സ്വതന്ത്രനായോ ആരെ നിര്ത്തണമെന്ന് തീരുമാനിച്ചാല് മതിയെന്നാണ് കോണ്ഗ്രസ് നേതൃത്വത്തിന്റെ ഇപ്പോഴത്തെ നീക്കം.
'പുറത്താക്കിയാല് പുറത്താക്കിയത് തന്നെ' എന്ന എം.വി. ഗോവിന്ദന്റെ കടുത്ത പ്രസ്താവന സുരേഷിനെ വേദനിപ്പിച്ചിട്ടുണ്ട്. പാര്ട്ടിക്ക് വേണ്ടി ജീവിതം ഉഴിഞ്ഞുവെച്ചിട്ടും തന്നെ അപമാനിച്ചവര്ക്കെതിരെ രാഷ്ട്രീയം പറയാന് തന്നെയാണ് സുരേഷിന്റെ തീരുമാനം. പ്രതിപക്ഷ നേതാവ് വി.ഡി. സതീശന് നയിക്കുന്ന 'പുതുയുഗ യാത്ര'യില് സുരേഷ് പങ്കെടുക്കുന്നതോടെ യുഡിഎഫ് പ്രവേശനം ഔദ്യോഗികമാകും. എന്നാല് കോണ്ഗ്രസിന്റെ ഭാഗമാകാനോ പാര്ട്ടി വിമതര്ക്കൊപ്പം നിന്ന് സിപിഎമ്മിനെ കണ്ണടച്ച് വിമര്ശിക്കാനോ താനില്ലെന്ന് അദ്ദേഹം വ്യക്തമാക്കുന്നു. ജയവും തോല്വിയുമല്ല, മറിച്ച് തന്റെ രാഷ്ട്രീയം പറയാനുള്ള വേദിയായി മലമ്പുഴയെ കാണാനാണ് സുരേഷിന് താല്പ്പര്യം.
ഇടതുപക്ഷത്തിന്റെ പ്രതീകമായ വി.എസിന്റെ സന്തതസഹചാരികള് പോലും യുഡിഎഫിലേക്ക് വരുന്നത് വരാനിരിക്കുന്ന വലിയ മാറ്റത്തിന്റെ സൂചനയാണെന്ന് വി.ഡി. സതീശന് അവകാശപ്പെടുന്നു. മലമ്പുഴയില് സുരേഷിനെ നിര്ത്തി അട്ടിമറി വിജയം നേടാമെന്നായിരുന്നു യുഡിഎഫ് ലക്ഷ്യം. എന്നാല് അരുണ്കുമാര് ഫാക്ടര് സുരേഷിനെ പിന്നോട്ട് വലിപ്പിച്ചാല് മലമ്പുഴയില് മറ്റൊരു കരുത്തുറ്റ സ്ഥാനാര്ത്ഥിയെ കണ്ടെത്തുക യുഡിഎഫിന് പ്രയാസകരമാകും. വരും ദിവസങ്ങളില് വി.എ. അരുണ്കുമാറിന്റെയും സുരേഷിന്റെയും നീക്കങ്ങള്ക്കായി കാതോര്ക്കുകയാണ് രാഷ്ട്രീയ കേരളം.