കന്നിവോട്ടിനു മുന്‍പായി ഇവിഎം ട്രാക്ക്; സോഫ്റ്റ് വെയര്‍ വികസിപ്പിച്ച് താരങ്ങളായി ബിടെക് വിദ്യാര്‍ത്ഥികള്‍; ഇവിഎമ്മുകളുടെ സ്ഥാനവും സ്ഥലവും തല്‍സമയം നിരീക്ഷിക്കാന്‍ സൗകര്യം; വിദ്യാര്‍ത്ഥികളെ അഭിനന്ദിച്ച് സംസ്ഥാന തിരഞ്ഞെടുപ്പ് കമ്മീഷണര്‍
കന്നിവോട്ടിനു മുന്‍പായി ഇവിഎം ട്രാക്ക്
തിരുവനന്തപുരം: വരുന്ന തദ്ദേശ തിരഞ്ഞെടുപ്പില്‍ കന്നിവോട്ടു ചെയ്യാനാകുമെന്ന സന്തോഷത്തിനൊപ്പം തിരഞ്ഞെടുപ്പു പ്രക്രിയയില്‍ തങ്ങള്‍ക്കും മികച്ച സംഭാവന നല്കാനായതിന്റെ ആത്മവിശ്വാസത്തിലുമാണ് ആഷിനും ജെസ്വിനും. ചെന്നൈ എസ്ആര്‍എം ഇന്‍സ്റ്റിറ്റ്യൂട്ട് ഓഫ് സയന്‍സ് ആന്റ് ടെക്‌നോളജിയിലെ ബിടെക് കംപ്യൂട്ടര്‍ സയന്‍സ് മൂന്നാം വര്‍ഷ വിദ്യാര്‍ത്ഥികളാണ് തിരുവനന്തപുരം സ്വദേശി ആഷിന്‍ സി അനിലും, തൃശൂര്‍ സ്വദേശി ജെസ്വിന്‍ സണ്‍സിയും. കേരള സംസ്ഥാന തിരഞ്ഞെടുപ്പ് കമ്മീഷന്‍ പുതുതായി ലോഞ്ച് ചെയ്ത ഇവിഎം ട്രാക്ക് സോഫ്റ്റ് വെയര്‍ വികസിപ്പിച്ചതിനു പിന്നിലിവരാണ്.
ജനാധിപത്യപ്രക്രിയയില്‍ നിര്‍ണായക പങ്കുവഹിക്കുന്നതാണ് ഇലക്ട്രോണിക് വോട്ടിംഗ് മെഷീന്‍ അഥവാ ഇവിഎം. ബാലറ്റ് പേപ്പര്‍ മാറി ബാലറ്റ് യൂണിറ്റും കണ്‍ട്രോള്‍ മെഷീനുമടങ്ങുന്ന ഇവിഎം തിരഞ്ഞെടുപ്പില്‍ നിര്‍ണായക സ്ഥാനം വഹിക്കാനാരംഭിച്ചതോടെ വോട്ടിംഗ് സംവിധാനം കുറെയേറെ സുഗമമായി. ഇപ്പോള്‍ വോട്ടിംഗ് മെഷീനുകളുടെ സുഗമവും സുതാര്യവുമായ വിന്യാസം തത്സമയം നിരീക്ഷിക്കുന്നതിനും കൃത്യമായി ട്രാക്ക് ചെയ്യുന്നതിനുമായി 'ഇവിഎം ട്രാക്ക്' എന്ന പുതിയ സംവിധാനവും ആദ്യമായി സംസ്ഥാന തിരഞ്ഞെടുപ്പ് കമ്മീഷന്‍ ലോഞ്ച് ചെയ്തു. ഇവിഎം ഇന്‍വെന്ററി ആന്റ് മാനേജ്‌മെന്റ് സോഫ്റ്റ് വെയര്‍ സംവിധാനത്തിലൂടെയാണ് പദ്ധതി പ്രാവര്‍ത്തികമാക്കിയത്.
ഇവിഎമ്മുകള്‍ നിലവില്‍ എവിടെ? ഏതു നിയോജക മണ്ഡലത്തിലെ പോളിംഗ് സ്റ്റേഷനില്‍, അല്ലെങ്കില്‍ സ്‌ട്രോങ് റൂമിലാണോ, വോട്ടെണ്ണല്‍ കേന്ദ്രത്തിലാണോ, ഉദ്യോഗസ്ഥരുടെ കൈവശമാണോ തുടങ്ങി എല്ലാവിധ വിവരങ്ങളും സംസ്ഥാന തിരഞ്ഞടുപ്പ് കമ്മീഷന്‍ ഓഫീസിലും അതത് ജില്ലാ കളക്ടര്‍മാര്‍ക്കും തത്സമയം ലഭ്യമാകും. കമ്മീഷന്റെ ഇവിഎം കണ്‍സള്‍ട്ടന്റായ എല്‍. സൂര്യനാരായണന്റെ മേല്‍നോട്ടത്തില്‍ ഈ വിദ്യാര്‍ത്ഥികള്‍ 6 മാസത്തോളം നീണ്ട ശ്രമകര ദൗത്യത്തിനുശേഷമാണ് ഓരോ പോയിന്റും വിശകലനം ചെയ്ത് അപാകതകളെല്ലാം പരിഹരിച്ച് ഫൈനല്‍ പ്രോഗ്രാം തയ്യാറാക്കി, ആദ്യഘട്ട പരിശോധനയും പൂര്‍ത്തിയാക്കി 'ഇവിഎം ട്രാക്ക്' ട്രാക്കിലെത്തിച്ചത്. സംസ്ഥാന തിരഞ്ഞെടുപ്പ് കമ്മീഷനു മുതല്‍ക്കൂട്ടാകുന്ന സോഫ്റ്റ് വെയര്‍ വികസിപ്പിച്ച വിദ്യാര്‍ത്ഥികളെ സംസ്ഥാന തിരഞ്ഞെടുപ്പ് കമ്മീഷണര്‍ എ.ഷാജഹാന്‍ അഭിനന്ദിച്ചു.