തന്ത്രപ്രധാന ഹോര്മുസ് കടലിടുക്കിന് പകരമായി മറ്റൊരുപാത കണ്ടെത്തിയോ? ഒമാന് തീരം വഴി പുതിയ സമാന്തര പാത? ഇറാന്റെ ഉപരോധ തന്ത്രങ്ങള് മറികടക്കാന് നിര്ണായക നീക്കം; സിഗ്നലുകള് ഓഫ് ചെയ്തുള്ള രഹസ്യ നീക്കത്തില് ഇന്ത്യന് കപ്പലും; ഒരു സുരക്ഷിത ഇടനാഴി രൂപപ്പെടുന്നുവെന്ന് സൂചന
ടെഹ്റാന്: ഹോര്മുസ് കടലിടുക്കിനെച്ചൊല്ലിയുള്ള ആഗോള ആശങ്കകള്ക്കിടെ, ഇറാന്-ഇസ്രായേല് സംഘര്ഷം ലോക ഇന്ധന വിപണിയെ മുനമുനയില് നിര്ത്തുന്ന സാഹചര്യത്തില് തന്ത്രപ്രധാന കടലിടുക്കിന് പകരമായി മറ്റൊരു അന്താരാഷ്ട്ര ജലപാത വഴിതുറക്കുന്നോ? ഫെബ്രുവരി 28-ന് ഇറാനെതിരെ യുഎസും ഇസ്രായേലും സംയുക്തമായി നടത്തിയ വ്യോമാക്രമണത്തെത്തുടര്ന്ന് തന്ത്രപ്രധാനമായ ഹോര്മുസ് കടലിടുക്ക് അടച്ചതോടെ, ലോകത്തിലെ ഊര്ജ്ജ വിതരണ ശൃംഖല വലിയ പ്രതിസന്ധിയാണ് നേരിട്ടിരുന്നത്. എന്നാല്, ഈ ഉപരോധങ്ങളെയും ഭീഷണികളെയും മറികടക്കാന് അന്താരാഷ്ട്ര ജലാശയങ്ങള്ക്ക് പകരം ഒമാന്റെ സമുദ്രാതിര്ത്തിക്കുള്ളിലൂടെ പുതിയൊരു സമാന്തര പാത കപ്പലുകള് കണ്ടെത്തിയിരിക്കുന്നു എന്ന വാര്ത്ത ആഗോള സാമ്പത്തിക രംഗത്ത് വലിയ ചര്ച്ചകള്ക്കാണ് തുടക്കമിട്ടിരിക്കുന്നത്. എണ്ണ, എല്.എന്.ജി, കാര്ഗോ എന്നിവ വഹിക്കുന്ന നാല് വലിയ കപ്പലുകള് അന്താരാഷ്ട്ര ജലാശയങ്ങള് ഒഴിവാക്കി ഒമാന്റെ സമുദ്രാതിര്ത്തിക്കുള്ളിലെ പുതിയ പാതയിലൂടെ കടന്നുപോയിട്ടുണ്ടെന്ന് എ.ഐ.എസ് (ഓട്ടോമാറ്റിക് ഐഡന്റിഫിക്കേഷന് സിസ്റ്റം)ന്റെ റിമോട്ട് സെന്സിങ് ഡാറ്റകളെ ഉദ്ധരിച്ച് എന്.ഡി.ടി.വി റിപ്പോര്ട്ട് ചെയ്യുന്നു.
എന്.ഡി.ടി.വി പുറത്തുവിട്ട റിപ്പോര്ട്ടുകള് പ്രകാരം, എണ്ണയും എല്.എന്.ജിയും ചരക്കുകളും വഹിക്കുന്ന നാല് വമ്പന് കപ്പലുകള് ഈ പുതിയ പാതയിലൂടെ യാത്ര ആരംഭിച്ചിട്ടുണ്ട്. എ.ഐ.എസ് (ഓട്ടോമാറ്റിക് ഐഡന്റിഫിക്കേഷന് സിസ്റ്റം) ഡാറ്റകളെ ഉദ്ധരിച്ചുള്ള വിവരങ്ങള് പ്രകാരം, ഹോര്മുസിലെ സംഘര്ഷ മേഖലകള് ഒഴിവാക്കി ഒമാന് തീരത്തോട് ചേര്ന്നുള്ള സുരക്ഷിത പാതയാണ് ഈ കപ്പലുകള് തിരഞ്ഞെടുത്തിരിക്കുന്നത്. ഇതില് ഒരു ഇന്ത്യന് കാര്ഗോ കപ്പലും ഉള്പ്പെടുന്നു എന്നത് ഇന്ത്യയെ സംബന്ധിച്ചിടത്തോളം അതീവ പ്രാധാന്യമുള്ള കാര്യമാണ്.
ഈ നീക്കത്തില് ഏറ്റവും ശ്രദ്ധേയം കപ്പലുകള് സ്വീകരിച്ചിരിക്കുന്ന രഹസ്യ സ്വഭാവമാണ്. മാര്ഷല് ദ്വീപുകളുടെ പതാകയുള്ള 'ഹബ്രൂട്ട്', 'ധാല്കുട്ട്' എന്നീ കൂറ്റന് എണ്ണക്കപ്പലുകളും പനാമയുടെ പതാകയുള്ള 'സോഹാര്' എന്ന എല്.എന്.ജി കപ്പലുമാണ് ഒമാന് അതിര്ത്തിയിലെ ജലാശയത്തില് പ്രവേശിച്ചതായി കണ്ടെത്തിയത്. മുസന്ദം പെനിന്സുലയ്ക്ക് സമീപമെത്തിയതോടെ ഇവ തങ്ങളുടെ പൊസിഷന്-എമിറ്റിങ് സിഗ്നല് ട്രാന്സ്പോണ്ടറുകള് ഓഫ് ചെയ്യുകയായിരുന്നു. ഏപ്രില് മൂന്നിന് മസ്കറ്റ് തീരത്ത് നിന്ന് ഏകദേശം 350 കിലോമീറ്റര് അകലെയാണ് ഇവയെ അവസാനമായി കണ്ടെത്തിയത്. ടാങ്കര്ട്രാക്കേഴ്സ് എന്ന സമുദ്ര വിശകലന ഏജന്സിയുടെ കണക്കനുസരിച്ച്, ധല്കുട്ടിലും ഹബ്രൂട്ടിലും മാത്രം 20 ലക്ഷം ബാരല് വീതം സൗദി-യുഎഇ ക്രൂഡ് ഓയില് ഉണ്ടെന്നാണ് കരുതപ്പെടുന്നത്.
ഈ മൂന്ന് കപ്പലുകള്ക്ക് തൊട്ടുപിന്നാലെയാണ് ദുബായില് നിന്ന് പുറപ്പെട്ട ഇന്ത്യന് പതാകയേന്തിയ കാര്ഗോ കപ്പലുള്ളത്. മാര്ച്ച് 31-ന് യാത്ര ആരംഭിച്ച ഈ കപ്പല് ഒമാനിലെ ദിബ്ബ തുറമുഖത്തിന് സമീപമുള്ള കടലിലാണ് നിലവില് ഉള്ളത്. ഈ കപ്പലിലെ ചരക്കിനെക്കുറിച്ചോ ലക്ഷ്യസ്ഥാനത്തെക്കുറിച്ചോ വ്യക്തമായ വിവരങ്ങള് ലഭ്യമല്ലെങ്കിലും, ഹോര്മുസ് കടലിടുക്കിന് പകരമായി ഒരു സുരക്ഷിത ഇടനാഴി രൂപപ്പെടുന്നു എന്നതിന്റെ വ്യക്തമായ സൂചനയാണിത്.
ലോകത്തെ ഇന്ധന വ്യാപാരത്തിന്റെ അഞ്ചിലൊന്നും കടന്നുപോകുന്ന ഹോര്മുസ് കടലിടുക്ക് അടഞ്ഞുകിടക്കുന്നത് ആഗോളതലത്തില് വലിയ വിലക്കയറ്റത്തിനും ക്ഷാമത്തിനുമാണ് കാരണമായത്. ഈ പ്രതിസന്ധി മറികടക്കാന് നാറ്റോ സഖ്യത്തിന്റെ സഹായത്തോടെ ബലപ്രയോഗത്തിലൂടെ പാത തുറക്കാന് അമേരിക്ക ശ്രമിച്ചെങ്കിലും അത് പരാജയപ്പെട്ടിരുന്നു. ട്രംപ് ഭരണകൂടത്തിന് വലിയ രാഷ്ട്രീയ വെല്ലുവിളി ഉയര്ത്തുന്ന ഈ സാഹചര്യത്തില്, ഒമാന്റെ സമുദ്രാതിര്ത്തിയിലൂടെയുള്ള ഈ നീക്കം വലിയൊരു നയതന്ത്ര വിജയം കൂടിയാകാം. ഔദ്യോഗികമായി ഇത്തരമൊരു പാത പ്രഖ്യാപിക്കപ്പെട്ടിട്ടില്ലെങ്കിലും, ഉപരോധങ്ങളെ മറികടന്ന് ഇന്ത്യയുള്പ്പെടെയുള്ള രാജ്യങ്ങളിലേക്ക് ഊര്ജ്ജം എത്തിക്കാനുള്ള ഈ രഹസ്യനീക്കം വരുംദിവസങ്ങളില് ഗള്ഫ് മേഖലയിലെ ഭൗമരാഷ്ട്രീയ സാഹചര്യങ്ങളെ മാറ്റിമറിക്കുമെന്ന് ഉറപ്പാണ്. മധ്യേഷ്യയിലെ യുദ്ധസമാനമായ അന്തരീക്ഷത്തില് ഈ പുതിയ കടല്പാത ലോകത്തിന് ആശ്വാസമായി മാറുകയാണ്.