ഇത് ജനാധിപത്യ അവകാശം വിനിയോഗിക്കാനുള്ള അവസരം; അതുകൊണ്ട്...വോട്ട് ചെയ്യാൻ വേതനത്തോടെയുള്ള അവധി നൽകണം; ആവശ്യവുമായി ഡി.കെ.ശിവകുമാർ

ബംഗളൂരു: ബിഹാറിൽ നിന്നുള്ള തൊഴിലാളികൾക്ക് വോട്ടവകാശം വിനിയോഗിക്കാൻ മൂന്നു ദിവസത്തെ വേതനത്തോടെയുള്ള അവധി നൽകണമെന്ന് കർണാടക ഉപമുഖ്യമന്ത്രിയും കോൺഗ്രസ് നേതാവുമായ ഡി.കെ.ശിവകുമാർ. കർണാടകയിലെ വിവിധ ഭാഗങ്ങളിൽ തൊഴിലെടുക്കുന്ന ബിഹാറിയിൽ നിന്നുള്ളവർക്ക് തങ്ങളുടെ ജനാധിപത്യ അവകാശം വിനിയോഗിക്കാനുള്ള അവസരം ഒരുക്കണമെന്ന് അദ്ദേഹം സ്ഥാപന ഉടമകളോട് ആവശ്യപ്പെട്ടു.

തിങ്കളാഴ്ചയാണ് അദ്ദേഹം സ്ഥാപന ഉടമകൾക്ക് ഇത് സംബന്ധിച്ച് തുറന്ന കത്ത് നൽകിയത്. ബിഹാറിൽ നവംബർ 6, 11 തീയതികളിൽ രണ്ട് ഘട്ടങ്ങളായാണ് തിരഞ്ഞെടുപ്പ് നടക്കുന്നത്. ബെംഗളൂരുവിൽ താമസിക്കുന്ന ബിഹാറിയിൽ നിന്നുള്ളവരോട് ബിഹാറിലെ മഹാസഖ്യത്തിന് വോട്ട് ചെയ്യാനും ശിവകുമാർ അഭ്യർത്ഥിച്ചു. നഗരത്തിലെ ബീഹാർ അസോസിയേഷന്റെ യോഗത്തിൽ സംസാരിക്കവെയാണ് അദ്ദേഹം ഇക്കാര്യങ്ങൾ വ്യക്തമാക്കിയത്.

"നിങ്ങൾ എല്ലാവരും പറയുന്നു ഞാൻ വലിയ പദവി അർഹിക്കുന്നുവെന്ന്. എന്നാൽ, അത് എനിക്ക് പ്രധാനമല്ല. നിങ്ങളെല്ലാവരും ബിഹാറിലെ മഹാസഖ്യത്തിന് വോട്ട് ചെയ്താൽ ഞാൻ കൂടുതൽ സന്തോഷിക്കും. നിതീഷ് കുമാർ തന്റെ രാഷ്ട്രീയ ജീവിതത്തിന്റെ അവസാന ഘട്ടത്തിലാണ്," അദ്ദേഹം കൂട്ടിച്ചേർത്തു. ബിഹാറിയിൽ മഹാസഖ്യം അധികാരത്തിൽ വന്നാൽ കർണാടകയിൽ നടപ്പാക്കിയ ക്ഷേമപ്രവർത്തനങ്ങൾ ബിഹാറിലും ഉണ്ടാകുമെന്നും അദ്ദേഹം വാഗ്ദാനം ചെയ്തു.