സമുദ്രനിരപ്പിൽ നിന്ന് കണ്ണെത്താ..ദൂരത്തിൽ ഭൂമിയ്ക്ക് ചുറ്റും ഭ്രമണം ചെയ്യുന്ന ആ കൂറ്റൻ പേടകം; പെട്ടെന്ന് ലോക ചരിത്രത്തെ തന്നെ ഞെട്ടിച്ച് കൊണ്ട് വാർത്ത; ഇനി ഒട്ടും താമസിപ്പിക്കാതെ സഞ്ചാരികളെ എല്ലാം തിരിച്ചെത്തിക്കുമെന്ന് പ്രഖ്യാപനം; പിന്നിലെ കാരണം വെളിപ്പെടുത്തി 'നാസ'; ബഹിരാകാശ നിലയത്തിൽ ആശങ്ക പരക്കുമ്പോൾ

വാഷിങ്ടൺ: അന്താരാഷ്ട്ര ബഹിരാകാശ നിലയത്തിലുള്ള (ISS) ഏഴ് ബഹിരാകാശ സഞ്ചാരികളിൽ ഒരാൾക്ക് ഗുരുതരമായ ആരോഗ്യപ്രശ്നം കണ്ടെത്തിയതിനെ തുടർന്ന് ക്രൂ-11 ദൗത്യം വെട്ടിച്ചുരുക്കാൻ നാസ തീരുമാനിച്ചു. ദൗത്യത്തിലെ നാല് അംഗങ്ങളെയും നേരത്തെ ഭൂമിയിലേക്ക് തിരികെ കൊണ്ടുവരും. ബഹിരാകാശ നിലയത്തിൽ നിന്ന് ഇത്തരമൊരു അടിയന്തര തിരിച്ചുവരവ് ചരിത്രത്തിലാദ്യമാണ്.

ആരുടെ ആരോഗ്യപ്രശ്നമാണെന്ന് നാസ ഔദ്യോഗികമായി വെളിപ്പെടുത്തിയിട്ടില്ല. മിഷൻ കമാൻഡറായ നാസയുടെ സെന കാർഡ്മാൻ, മിഷൻ പൈലറ്റായ നാസയുടെ തന്നെ മൈക്ക് ഫിൻകെ, ജാപ്പനീസ് ബഹിരാകാശ ഏജൻസി ജാക്സയുടെ കിമിയ യുവി, റഷ്യൻ ബഹിരാകാശ ഏജൻസി റോസ്കോസ്മോസിന്റെ ഒലെഗ് പ്ലാറ്റോണോവ് എന്നിവരടങ്ങുന്നതാണ് ക്രൂ-11 സംഘം. ഈ മാസം എട്ടാം തീയതി സെന കാർഡ്മാനും മൈക്ക് ഫിൻകെയും ചേർന്ന് ബഹിരാകാശ നിലയത്തിന്റെ പവർ സിസ്റ്റത്തിലെ അറ്റകുറ്റപ്പണിക്കായി പദ്ധതിയിട്ടിരുന്ന ഒരു ബഹിരാകാശ നടത്തം അവസാന നിമിഷം മാറ്റിവെച്ചിരുന്നു.

ഇവരിലൊരാൾക്ക് ആരോഗ്യപ്രശ്നം കണ്ടെത്തിയതിനെ തുടർന്നായിരുന്നു ആ തീരുമാനമെന്നും അന്ന് അറിയിപ്പുണ്ടായിരുന്നു. ദൗത്യം പൂർത്തിയാക്കാൻ ഒരു മാസം കൂടി നിലയത്തിൽ തങ്ങാൻ സാധിക്കുമെങ്കിലും, ബഹിരാകാശ സഞ്ചാരിയുടെ സുരക്ഷയ്ക്ക് മുൻഗണന നൽകിയാണ് ഈ അടിയന്തര നടപടി.

ക്രൂ-11ന്റെ തിരിച്ചുവരവിനുള്ള സമയവും തീയതിയും അടുത്ത 48 മണിക്കൂറിനുള്ളിൽ നാസ പ്രഖ്യാപിക്കും. സാധാരണയായി ആറ് മാസത്തിലധികം നീളുന്ന ക്രൂ ദൗത്യങ്ങളിൽ, അടുത്ത സംഘമെത്തി ചുമതലയേറ്റെടുത്ത ശേഷമാണ് മുൻഗാമികൾ മടങ്ങാറുള്ളത്. ക്രൂ-12 ദൗത്യത്തിന്റെ വിക്ഷേപണം നിലവിൽ ഫെബ്രുവരിയിലാണ് നിശ്ചയിച്ചിരിക്കുന്നത്. ക്രൂ-11 സംഘം നേരത്തെ മടങ്ങുന്നതോടെ, കഴിഞ്ഞ നവംബറിൽ റഷ്യയുടെ സോയൂസ് എംഎസ് 28 ദൗത്യത്തിലൂടെ നിലയത്തിലെത്തിയ മൂന്നംഗ സംഘത്തിനാകും (രണ്ട് റഷ്യൻ ബഹിരാകാശ സഞ്ചാരികളും ഒരു നാസ പ്രതിനിധിയും) അന്താരാഷ്ട്ര ബഹിരാകാശ നിലയത്തിന്റെ സമ്പൂർണ്ണ ചുമതല.

അപ്രതീക്ഷിതമായ ഈ നീക്കം, ബഹിരാകാശ സഞ്ചാരികളുടെ സുരക്ഷയ്ക്ക് നാസ നൽകുന്ന പരമോന്നത പ്രാധാന്യം ഊട്ടിയുറപ്പിക്കുകയും, നിലയത്തിന്റെ പ്രവർത്തനങ്ങളിൽ താൽക്കാലികമായൊരു മാറ്റത്തിന് വഴിയൊരുക്കുകയും ചെയ്യുന്നു.