ലേലത്തിലെത്തുന്ന വെടിക്കെട്ട് ഫിനിഷറെ നോട്ടമിട്ടിരുന്ന ടീമുകൾക്ക് തെറ്റി; മറ്റൊരു ജേഴ്‌സിയിൽ കളിക്കണ്ട; ഐപിഎല്‍ മതിയാക്കി ആന്ദ്രെ റസ്സൽ; ഇനി പവർ കോച്ചായി തുടരും'; കൊൽക്കത്തയുടെ മിന്നും പടക്കുതിര മസിൽ റസ്സൽ എന്നും കെ.കെ.ആറിനൊപ്പമെന്ന് കിംഗ് ഖാനും
കൊൽക്കത്ത: കൊൽക്കത്ത: വെസ്റ്റ് ഇൻഡീസ് ക്രിക്കറ്റ് ഇതിഹാസവും കൊൽക്കത്ത നൈറ്റ് റൈഡേഴ്സിന്റെ (കെകെആർ) താരവുമായ ആന്ദ്രെ റസ്സൽ ഇന്ത്യൻ പ്രീമിയർ ലീഗിൽ (ഐപിഎൽ) നിന്ന് വിരമിച്ചു. 2026 സീസണിന് മുന്നോടിയായി കെകെആർ താരത്തെ ഒഴിവാക്കിയതിന് പിന്നാലെയാണ് റസ്സലിന്റെ വിരമിക്കൽ പ്രഖ്യാപനം. എന്നാൽ, കെകെആറുമായുള്ള ബന്ധം അവസാനിപ്പിക്കാൻ റസ്സൽ തയ്യാറായില്ല. പകരം, ടീമിന്റെ പുതിയ പവർ കോച്ചായി അദ്ദേഹത്തെ നിയമിച്ചു. മറ്റൊരു ഐപിഎൽ ടീമിനായി കളിക്കാൻ ആഗ്രഹിക്കാത്തതാണ് ഈ വിരമിക്കൽ തീരുമാനത്തിന് പിന്നിലെ പ്രധാന കാരണം.
കഴിഞ്ഞ 12 സീസണുകളിലായി കെകെആർ ജേഴ്‌സിയിൽ കളിച്ച റസ്സൽ, ഫ്രാഞ്ചൈസിയുടെ രണ്ട് ഐപിഎൽ കിരീട നേട്ടങ്ങളിലും നിർണായക പങ്കുവഹിച്ചിട്ടുണ്ട്. അതിവേഗ റൺസുകൾ നേടാനും നിർണായക വിക്കറ്റുകൾ വീഴ്ത്താനുമുള്ള അദ്ദേഹത്തിന്റെ കഴിവ് ടീമിന് എന്നും മുതൽക്കൂട്ടായിരുന്നു. 2015ലും 2019ലും ഐപിഎല്ലിലെ ഏറ്റവും മൂല്യമുള്ള താരമായി റസ്സലിനെ തിരഞ്ഞെടുത്തിരുന്നു. കെകെആർ ആരാധകരുടെ പ്രിയപ്പെട്ട 'ഡ്രെ റസ്' ആയി താരം മാറിയത് ഈ പ്രകടനങ്ങളിലൂടെയാണ്.
റസ്സലിന്റെ വിരമിക്കൽ പ്രഖ്യാപന വീഡിയോയ്ക്ക് പിന്നാലെ ഷാരുഖ് ഖാൻ പ്രതികരണവുമായി രംഗത്തെത്തി. "നന്ദി, ആന്ദ്രെ. ഈ മനോഹരമായ ഓർമ്മകൾക്ക്. ഞങ്ങളുടെ മിന്നുന്ന പടക്കുതിര! കൊൽക്കത്ത നൈറ്റ് റൈഡേഴ്സിനായുള്ള താങ്കളുടെ സംഭാവനകൾ ചരിത്രത്തിൽ രേഖപ്പെടുത്തേണ്ടവയാണ്," ഷാരൂഖ് കുറിച്ചു. "ഒരു കായികതാരമെന്ന നിലയിൽ താങ്കളുടെ മഹത്തായ യാത്രയിലെ മറ്റൊരു അധ്യായമാണിത്. ഇനി പവർ കോച്ചായി, ആ അറിവും, തീർച്ചയായും ആ 'പവറും' പർപ്പിൾ ആൻഡ് ഗോൾഡ് ജേഴ്സിയിലെ നമ്മുടെ യുവതാരങ്ങളിലേക്ക് കൈമാറൂ..." ഷാരൂഖ് ആശംസിച്ചു.
"പ്രിയപ്പെട്ടവനേ, മറ്റേതൊരു ജേഴ്സിയും താങ്കൾക്ക് ചേരില്ല. അത് കാണാൻ വിചിത്രമായിരിക്കും. മസിൽ റസ്സൽ ജീവിതകാലം മുഴുവൻ കെ.കെ.ആറിനൊപ്പം! ടീമിനുവേണ്ടിയും കായികപ്രേമികൾക്കുവേണ്ടിയും ഞാൻ താങ്കളെ സ്നേഹിക്കുന്നു," കെ.കെ.ആർ. ഉടമ കൂട്ടിച്ചേർത്തു.
ആകെ 140 ഐപിഎൽ മത്സരങ്ങൾ കളിച്ച റസ്സൽ 2651 റൺസ് നേടുകയും 123 വിക്കറ്റുകൾ വീഴ്ത്തുകയും ചെയ്തിട്ടുണ്ട്. കെകെആറിന് വേണ്ടി മാത്രം 2593 റൺസും 122 വിക്കറ്റുകളും അദ്ദേഹം സ്വന്തമാക്കി. ഐപിഎല്ലിൽ തന്റെ ആദ്യ സീസണിൽ ഡൽഹി ഡെയർഡെവിൾസിനായാണ് (ഇപ്പോഴത്തെ ഡൽഹി ക്യാപിറ്റൽസ്) റസ്സൽ കളിച്ചത്. പിന്നീട് അദ്ദേഹം കെകെആർ പാളയത്തിലെത്തുകയായിരുന്നു.