പേരും മതവും മാറി കളം നിറഞ്ഞ ക്രിക്കറ്റ് ഇതിഹാസങ്ങൾ; യൂസഫ് യൂഹാനയും ദിൽഷനും അസ്ഗർ അഫ്ഗാനുമെല്ലാം ഈ പട്ടികയിൽ; ആ പേരുമാറ്റ രഹസ്യങ്ങൾ ഇങ്ങനെ

മുംബൈ: നമ്മൾ ക്രിക്കറ്റ് താരങ്ങളെ അവരുടെ പേരുകളിലൂടെയും റെക്കോർഡുകളിലൂടെയുമാണ് തിരിച്ചറിയാറുള്ളത്. എന്നാൽ ചില പ്രശസ്ത താരങ്ങൾ തങ്ങളുടെ കരിയറിലെ നിർണ്ണായക ഘട്ടത്തിൽ പേര് പൂർണ്ണമായും മാറ്റിയിട്ടുണ്ടെന്ന് നിങ്ങൾക്കറിയാമോ? മതപരിവർത്തനം മൂലമോ സാംസ്കാരികമായ സ്വത്വം സംരക്ഷിക്കാനോ വ്യക്തിപരമായ കാരണങ്ങളാലോ ആണ് പലരും ഈ മാറ്റത്തിന് മുതിർന്നത്. അത്തരത്തിൽ പേര് മാറ്റിയ പ്രശസ്തരായ ചില ക്രിക്കറ്റ് താരങ്ങൾ ഇവരാണ്:

മുഹമ്മദ് യൂസഫ് (മുൻപ്: യൂസഫ് യൂഹാന)

പാക്കിസ്ഥാൻ ക്രിക്കറ്റിലെ ഇതിഹാസ ബാറ്റിംഗ് താരം യൂസഫ് യൂഹാനയാണ് ഈ പട്ടികയിൽ ഏറ്റവും കൂടുതൽ ചർച്ച ചെയ്യപ്പെട്ട പേര്. ഒരു ക്രിസ്ത്യൻ കുടുംബത്തിൽ ജനിച്ച അദ്ദേഹം പാക്കിസ്ഥാനെ പ്രതിനിധീകരിക്കുന്ന നാലാമത്തെ ക്രിസ്ത്യൻ താരമായിരുന്നു. 2005-ൽ ഇസ്ലാം മതം സ്വീകരിച്ചതോടെയാണ് പേര് മുഹമ്മദ് യൂസഫ് എന്നാക്കി മാറ്റിയത്.

2006-ൽ ഒരു കലണ്ടർ വർഷത്തിൽ ഏറ്റവും കൂടുതൽ ടെസ്റ്റ് റൺസ് (1,788 റൺസ്) എന്ന ലോക റെക്കോർഡ് അദ്ദേഹം സ്ഥാപിച്ചു. ഒരു കലണ്ടർ വർഷത്തിൽ ഏറ്റവും കൂടുതൽ സെഞ്ച്വറികൾ (9), 150-ൽ അധികം സ്കോറുകൾ തുടങ്ങിയ റെക്കോർഡുകളും അദ്ദേഹത്തിന്റെ പേരിലുണ്ട്. സയീദ് അൻവറിന്റെ പ്രഭാഷണങ്ങളിൽ ആകൃഷ്ടനായാണ് അദ്ദേഹം ഇസ്ലാം മതം സ്വീകരിച്ചത്.

തിലകരത്‌നെ ദിൽഷൻ (മുൻപ്: തുവൻ മുഹമ്മദ് ദിൽഷൻ)

ശ്രീലങ്കയുടെ വെടിക്കെട്ട് ഓപ്പണറും 'ദിൽ സ്കൂപ്പ്' (Dilscoop) ഷോട്ടിന്റെ ഉപജ്ഞാതാവുമായ തിലകരത്‌നെ ദിൽഷൻ ഒരു മുസ്ലീം കുടുംബത്തിലാണ് ജനിച്ചത്. തുവൻ മുഹമ്മദ് ദിൽഷൻ എന്നായിരുന്നു ആദ്യ പേര്. പിതാവ് മുസ്ലീമും മാതാവ് ബുദ്ധമത വിശ്വാസിയുമായിരുന്നു. മാതാപിതാക്കൾ വേർപിരിഞ്ഞതിന് ശേഷം അദ്ദേഹം തന്റെ മാതാവിന്റെ മതമായ ബുദ്ധമതം സ്വീകരിക്കുകയും പേര് തിലകരത്‌നെ മുടിയൻസെലഗെ ദിൽഷൻ എന്ന് മാറ്റുകയും ചെയ്തു.

സൂരജ് രൺദീവ് (മുൻപ്: മുഹമ്മദ് മർഷുക്ക് മുഹമ്മദ് സൂരജ്)

ഇന്ത്യൻ ഓപ്പണർ വീരേന്ദർ സെവാഗിന് സെഞ്ച്വറി നിഷേധിക്കാൻ നോ-ബോൾ എറിഞ്ഞതിലൂടെ പ്രശസ്തനായ ശ്രീലങ്കൻ ഓഫ് സ്പിന്നർ സൂരജ് രൺദീവും ഒരു മുസ്ലീം കുടുംബത്തിലാണ് ജനിച്ചത്. മുഹമ്മദ് മർഷുക്ക് മുഹമ്മദ് സൂരജ് എന്നായിരുന്നു ആദ്യ പേര്. 2010-ൽ അദ്ദേഹം ബുദ്ധമതം സ്വീകരിക്കുകയും പേര് സൂരജ് രൺദീവ് എന്ന് മാറ്റുകയും ചെയ്തു. 2011 ലോകകപ്പ് ഫൈനലിൽ ശ്രീലങ്കയെ പ്രതിനിധീകരിച്ച അദ്ദേഹം പിന്നീട് ക്രിക്കറ്റ് ഉപേക്ഷിച്ച് ഓസ്‌ട്രേലിയയിലേക്ക് താമസം മാറി.

അസ്ഗർ അഫ്ഗാൻ (മുൻപ്: അസ്ഗർ സ്റ്റാനിക്സായ്)

അഫ്ഗാനിസ്ഥാൻ ക്രിക്കറ്റ് ടീമിന്റെ ഏറ്റവും വിജയകരമായ ക്യാപ്റ്റൻമാരിൽ ഒരാളായ അസ്ഗർ സ്റ്റാനിക്സായ് 2018-ലാണ് തന്റെ കുടുംബപ്പേര് മാറ്റാൻ തീരുമാനിച്ചത്. തന്റെ ദേശീയ സ്വത്വം ഉയർത്തിപ്പിടിക്കുന്നതിനായി അദ്ദേഹം അസ്ഗർ അഫ്ഗാൻ എന്ന പേര് സ്വീകരിച്ചു. അഫ്ഗാനിസ്ഥാന്റെ ആദ്യ ടെസ്റ്റ് മത്സരത്തിൽ ടീമിനെ നയിച്ചതും ഇദ്ദേഹമായിരുന്നു.