'ടീം വലിയ ആവേശത്തിൽ, പാകിസ്ഥാനെതിരായ പോരാട്ടത്തിനായി ഞങ്ങൾ ഇപ്പോഴേ തയ്യാർ'; ഏത് വെല്ലുവിളിയും നേരിടാൻ ഞങ്ങൾ റെഡിയാണെന്നും തിലക് വർമ്മ

ദില്ലി: ടി20 ലോകകപ്പിൽ പാകിസ്ഥാനെതിരായ ആവേശപ്പോരാട്ടത്തിനായി ഇന്ത്യൻ ടീം പൂർണ്ണ സജ്ജമാണെന്ന് യുവതാരം തിലക് വർമ്മ. "ആ പോരാട്ടത്തിനായി ഞങ്ങൾ ഇപ്പോഴേ തയ്യാറാണ്," എന്ന് നമീബിയക്കെതിരായ മത്സരത്തിന് മുന്നോടിയായി നടന്ന വാർത്താസമ്മേളനത്തിൽ തിലക് വർമ്മ വ്യക്തമാക്കി. ഒക്ടോബർ 15-ന് കൊളംബോയിൽ നടക്കാനിരിക്കുന്ന ഇന്ത്യ-പാകിസ്ഥാൻ മത്സരത്തെക്കുറിച്ചുള്ള അനിശ്ചിതത്വങ്ങൾ നീങ്ങിയതിൽ ടീം ഏറെ സന്തോഷത്തിലാണെന്നും, ഏത് വെല്ലുവിളിയും നേരിടാൻ തങ്ങൾ തയ്യാറാണെന്നും തിലക് കൂട്ടിച്ചേർത്തു.

കളി നടക്കുമെന്ന വാർത്ത വന്നപ്പോൾ മുതൽ ടീം അംഗങ്ങളെല്ലാം വലിയ ആവേശത്തിലാണെന്നും താരം പറഞ്ഞു. അതേസമയം, ടീം അംഗങ്ങളായ അഭിഷേക് ശർമ്മയുടെയും ജസ്പ്രീത് ബുമ്രയുടെയും ആരോഗ്യനിലയെക്കുറിച്ച് താരം വിവരങ്ങൾ പങ്കുവെച്ചു. വയറിലെ അണുബാധയെത്തുടർന്ന് ചികിത്സയിലായിരുന്ന അഭിഷേക് ശർമ്മയെ ഇന്ന് ആശുപത്രിയിൽ നിന്ന് ഡിസ്ചാർജ് ചെയ്തു. നമീബിയക്കെതിരായ മത്സരത്തിൽ അദ്ദേഹം കളിക്കുമോ എന്ന കാര്യത്തിൽ നാളെ അന്തിമ തീരുമാനമെടുക്കും.

പനി ബാധിച്ച് സുഖം പ്രാപിച്ചുവരുന്ന ജസ്പ്രീത് ബുമ്രയ്ക്ക് ഒരു ദിവസത്തെ വിശ്രമം നൽകി നമീബിയക്കെതിരെ കളിപ്പിക്കണോ അതോ വിശ്രമം അനുവദിക്കണോ എന്ന് ടീം മാനേജ്‌മെന്റ് തീരുമാനിക്കും. പാകിസ്ഥാനെതിരായ പ്രധാന മത്സരത്തിന് മുമ്പ് താരങ്ങളുടെ ഫിറ്റ്നസ് ഇന്ത്യക്ക് അതീവ നിർണായകമാണ്. സൂര്യകുമാർ യാദവിന്‍റെ നേതൃത്വത്തിലുള്ള ഇന്ത്യൻ ടീം നമീബിയയെക്കാൾ ശക്തരാണെങ്കിലും, ടി20 ഫോർമാറ്റിൽ ആരെയും നിസ്സാരക്കാരായി കാണാൻ കഴിയില്ലെന്ന് തിലക് വർമ്മ ഓർമ്മിപ്പിച്ചു.

ടി20 എന്നത് ചെറിയ ഫോർമാറ്റാണ്, ഇവിടെ എന്ത് വേണമെങ്കിലും സംഭവിക്കാം. അതുകൊണ്ട് തന്നെ ഒരു ടീമിനെയും ഞങ്ങൾ കുറച്ചു കാണില്ലെന്നും, നമീബിയക്കെതിരെ ഏറ്റവും മികച്ച പ്രകടനം തന്നെ പുറത്തെടുക്കുമെന്നും അദ്ദേഹം കൂട്ടിച്ചേർത്തു.എം പരിക്കിൽ നിന്ന് മോചിതനായി ലോകകപ്പ് ടീമിലേക്ക് തിരിച്ചെത്തിയതിൽ താൻ അതീവ സന്തോഷവാനാണെന്നും, ടീമിനായി ഏത് റോളിലും സംഭാവന നൽകാൻ തയ്യാറാണെന്നും തിലക് വർമ്മ വ്യക്തമാക്കി.