എയര്‍ ഇന്ത്യ വിമാന ദുരന്തത്തില്‍ ജീവന്‍ നഷ്ടപ്പെട്ടവര്‍ക്ക് ആദരാഞ്ജലികള്‍ - ഓര്‍മ്മ ഇന്റര്‍നാഷണല്‍
2025 ജൂണ്‍ 12-ന് അഹമ്മദാബാദില്‍ നടന്ന ദാരുണമായ എയര്‍ ഇന്ത്യ വിമാന ദുരന്തത്തില്‍ ജീവന്‍ നഷ്ടപ്പെട്ടവര്‍ക്ക് ആദരാഞ്ജലികള്‍ അര്‍പ്പിച്ചുകൊണ്ട് ORMA International (Overseas Residents Malayalee Association International) അനിശോചന യോഗം സംഘടിപ്പിച്ചു.
അഹമ്മദാബാദ് സര്‍ദാര്‍ വല്ലഭായി വിമാനത്താവളത്തില്‍ നിന്ന് ലണ്ടനിലേക്ക് ഉച്ചയ്ക്ക് ഒന്നരയോടെ പറന്നുയര്‍ന്ന എയര്‍ ഇന്ത്യ AI171 ബോയിങ് 787 ഡ്രീംലൈനര്‍ വിമാനമാണ് അപകടത്തില്‍ പെട്ടത്. വിമാനത്തിലുണ്ടായിരുന്ന 242 പേരില്‍ഇന്ത്യന്‍ വംശജനായ ഒരു ബ്രിട്ടീഷ് പൗരന്‍ ഒഴികെ 241 പേരും മരിച്ചു. വിമാനം വീണ മെഡിക്കല്‍ കോളേജ് ഹോസ്റ്റലില്‍ ഉണ്ടായിരുന്നവര്‍ ഉള്‍പ്പെടെ ആകെ 265 പേര്‍ക്ക് മരണം സംഭവിച്ചു.
വളരെ ഹൃദയഭേദകമായ ഈ ദുരന്തത്തില്‍ ജീവന്‍ നഷ്ടപ്പെട്ടവരുടെ ആത്മാവിന് സാന്ത്വനമാകട്ടെ എന്ന പ്രാര്‍ത്ഥനയോടെ ORMA International വേദനപൂര്‍ണ്ണമായ അനുശോചന യോഗം സംഘടിപ്പിച്ചു. മനസ്സില്‍ നൊമ്പരവുമായി ഒന്നിച്ചുകൂടിയ ഈ യോഗത്തില്‍ വിവിധ രാജ്യങ്ങളില്‍ നിന്നുള്ള സംഘടനയുടെ നേതാക്കളും അംഗങ്ങളും പങ്കെടുത്തു. യോഗത്തില്‍ ORMA International പ്രസിഡന്റ് സജി സെബാസ്റ്റ്യന്‍ അധ്യക്ഷനായിരുന്നു. ട്രസ്റ്റി ബോര്‍ഡ് ചെയര്‍മാന്‍ ജോസ് ആറ്റുപുറം, ജനറല്‍ സെക്രട്ടറി ക്രിസ്റ്റി എബ്രഹാം, വൈസ് പ്രസിഡന്റ് പിന്റോ കണ്ണമ്പള്ളി, ട്രഷറര്‍ റോഷന്‍ പ്ലാമൂട്ടില്‍, മുന്‍ പ്രസിഡന്റ് ജോര്‍ജ് നടവയല്‍, പിആര്‍ഒ മെര്‍ളിന്‍ അഗസ്റ്റിന്‍, ഓര്‍മ്മ ടാലന്റ്റ് പ്രൊമോഷന്‍ ഫോറം ചെയര്‍മാന്‍ ജോസ് തോമസ്, പബ്ലിക് അഫയേഴ്‌സ് ഫോറം ചെയര്‍മാന്‍ വിന്‍സന്റ് ഇമ്മാനുവല്‍, ഫിനാന്‍ഷ്യല്‍ ഓഫീസര്‍ ഷാജി അഗസ്റ്റിന്‍, ജെയിംസ് തുണ്ടത്തില്‍ (നോര്‍ത്ത് കരോളിന ചാപ്റ്റര്‍ പ്രസിഡന്റ്), കുര്യാക്കോസ് മാണിവയലില്‍ (കേരള ചാപ്റ്റര്‍ പ്രസിഡന്റ്), റെജി തോമസ് (ഷാര്‍ജ), എന്നിവര്‍ അനുശോചനപ്രസംഗങ്ങള്‍ നടത്തി.
പ്രസംഗങ്ങള്‍ക്കിടയില്‍ നേതാക്കള്‍ ഈ ദുരന്തത്തെ ഒരു ദേശീയ ദുരന്തമായി ആഖ്യാനിച്ചു. യാത്രികര്‍ക്കായി അന്താരാഷ്ട്ര സുരക്ഷാ മാനദണ്ഡങ്ങള്‍ ശക്തമായി നടപ്പിലാക്കുന്നതിനും, ഇനിയൊരിക്കലും ഇത്തരത്തിലുള്ള വലിയ വിമാന ദുരന്തങ്ങള്‍ സംഭവിക്കാതിരിക്കാന്‍ അധികാരികളും കമ്പനികളും സുരക്ഷാ മാനദണ്ഡങ്ങള്‍ കര്‍ശനമായി പാലിക്കത്തക്കവിധം അതുമായി ബന്ധപ്പെട്ട നിയമങ്ങള്‍ പരിഷ്‌കരിക്കപ്പെടേണ്ടതിന്റെ ആവശ്യകതയെ കുറിച്ചും ശക്തമായ നിയമ നടപടികള്‍ സ്വീകരിക്കേണ്ട സമയം അതിക്രമിച്ചിരിക്കുന്നു എന്നും ചൂണ്ടിക്കാട്ടി. അതോടൊപ്പം തന്നെ വിമാനയാത്രക്കാര്‍ക്കും അവരുടെ കുടുംബങ്ങള്‍ക്കുമായി നിര്‍ബന്ധമായ ഇന്‍ഷുറന്‍സ് പരിരക്ഷ ഉറപ്പാക്കുന്നതിനുള്ള നിയമനിര്‍മാണം അനിവാര്യമാണെന്നും അവര്‍ കൂട്ടിച്ചേര്‍ത്തു.
ഇത്തരത്തിലുള്ള വന്‍ദുരന്തങ്ങള്‍ വിശകലനം ചെയ്യുമ്പോള്‍, വികസനത്തോടൊപ്പം സുരക്ഷക്കും പ്രാധാന്യം കല്പിക്കേണ്ടതാണെന്നും, ആധുനിക സാങ്കേതികവിദ്യയുടെ ഉപയോഗം മാത്രമല്ല, മാനുഷികവും ഉത്തരവാദിത്വപരവും ആയ സമീപനം സ്വീകരിക്കേണ്ടതിന്റെ ആവശ്യകതയും നേതാക്കള്‍ മുന്നോട്ടുവച്ചു. അപകടത്തില്‍ ദുഃഖത്തിലാണ്ടിരിക്കുന്ന മരണപ്പെട്ടവരുടെ കുടുംബാംഗങ്ങള്‍ക്കും അവരുമായി ബന്ധപ്പെട്ട എല്ലാവര്‍ക്കും ORMA International ഐക്യദാര്‍ഢ്യവും ആത്മസ്വാന്തനവും ഈ അനുസ്മരണ യോഗത്തിലൂടെ അര്‍പ്പിച്ചു.
മെര്‍ലിന്‍ മേരി അഗസ്റ്റിന്‍