രാഷ്ട്രത്തെ അഭിസംബോധന ചെയ്ത് ജോ ബൈഡന്റ് വിടവാങ്ങല്‍ പ്രസംഗം ജനുവരി 15ന്
വാഷിങ്ടന്‍ : ഡോണാള്‍ഡ് ട്രംപ് അധികാരത്തില്‍ തിരിച്ചെത്തുന്നതിന് അഞ്ച് ദിവസം മുന്‍പ് യുഎസ് പ്രസിഡന്റ് ജോ ബൈഡന്‍ രാഷ്ട്രത്തെ അഭിസംബോധന ചെയ്ത് വിടവാങ്ങല്‍ പ്രസംഗം നടത്തും. ജനുവരി 15ന് ന്യൂയോര്‍ക് സമയം രാത്രി 8 മണിക്കാണ് ബൈഡന്റെ വിടവാങ്ങല്‍ പ്രസംഗമെന്ന് വൈറ്റ് ഹൗസ് അറിയിച്ചു. ജനുവരി 20നാണ് ട്രംപ് പ്രസിഡന്റായി സ്ഥാനമേല്‍ക്കുന്നത്.
രാജ്യത്തിന്റെ ഭാവിയെ കുറിച്ചുള്ള സന്ദേശമാകും അദ്ദേഹത്തിന്റെ വിടവാങ്ങല്‍ പ്രസംഗമെന്നാണ് രാജ്യാന്തര മാധ്യമങ്ങള്‍ റിപ്പോര്‍ട്ട് ചെയ്യുന്നത്. ഒപ്പം തന്റെ ഭരണകാലയളവിലെ അഭിമാനകരമായ നേട്ടങ്ങളും പരാമര്‍ശിക്കും. 4 വര്‍ഷം മുന്‍പ് വിടവാങ്ങല്‍ പ്രസംഗം നടത്തിയ ഡോണള്‍ഡ് ട്രംപ് ബൈഡന്‍ ഭരണകൂടത്തിന് ആശംസകള്‍ നേര്‍ന്നിരുന്നു. നേരത്തെ റെക്കോര്‍ഡ് ചെയ്ത പ്രസംഗമായിരുന്നു ഇത്.
ഓവല്‍ ഓഫീസില്‍ നിന്ന് ബൈഡന്‍ അവസാനമായി സംസാരിച്ചത്, മത്സരത്തില്‍ നിന്ന് പിന്മാറാനുള്ള തീരുമാനത്തെക്കുറിച്ച് രാജ്യത്തെ അഭിസംബോധന ചെയ്തപ്പോഴാണ്.
'ഞാന്‍ ഈ ഓഫീസിനെ ബഹുമാനിക്കുന്നു, പക്ഷേ ഞാന്‍ എന്റെ രാജ്യത്തെ കൂടുതല്‍ സ്‌നേഹിക്കുന്നു,' കുടുംബാംഗങ്ങള്‍ക്കൊപ്പം ബൈഡന്‍ പറഞ്ഞു. 'പ്രസിഡന്റായി സേവനമനുഷ്ഠിക്കുക എന്നത് എന്റെ ജീവിതത്തിലെ ഒരു ബഹുമതിയാണ്, പക്ഷേ ജനാധിപത്യത്തിന്റെ പ്രതിരോധത്തില്‍, അത് അപകടത്തിലാണ്, ഏതൊരു പദവിയേക്കാളും പ്രധാനമാണെന്ന് ഞാന്‍ കരുതുന്നു.'
ഡെമോക്രാറ്റുകള്‍ക്ക് സെനറ്റ് നിയന്ത്രണം നഷ്ടപ്പെടുകയും ഹൗസ് തിരിച്ചുപിടിക്കാന്‍ കഴിയാതിരിക്കുകയും ചെയ്ത സാഹചര്യത്തില്‍ ബൈഡന്‍ വൈറ്റ് ഹൗസ് വിടാന്‍ തയ്യാറെടുക്കുമ്പോള്‍ പാര്‍ട്ടിയുടെ ഭാവി നേതൃത്വത്തെയും മുന്നോട്ടുള്ള പാതയെയും കുറിച്ചുള്ള ചോദ്യങ്ങള്‍ ഉയരുന്നു