എലീന പടിക്കലും രോഹിത് പ്രദീപും വിവാഹിതരായി; വിവാഹം കോഴിക്കോട് വച്ച് ഹൈന്ദവാചാരപ്രകാരം; സഫലമാകുന്നത് ഏഴുവർഷത്തെ പ്രണയം

തിരുവനന്തപുരം: അവതാരകയും ബിഗ്‌ബോസ് താരവുമായ എലീന പടിക്കൽ വിവാഹിതയായി. രോഹിത് പ്രദീപ് ആണ് വരൻ. രാവിലെ കോഴിക്കോട് വച്ച്, ഹൈന്ദവ ആചാര പ്രകാരമായിരുന്നു ചടങ്ങുകൾ.ഏഴു വർഷം നീണ്ട പ്രണയമാണ് വിവാഹത്തിലെത്തിയത്.

സുഹൃത്തിന്റെ സുഹൃത്തായ രോഹിത്തിനെ ബെംഗളൂരുവിൽ വച്ച് യാദൃച്ഛികമായാണ് എലീന പരിചയപ്പെടുന്നത്.പിന്നീട് ഇരുവരും പ്രണയത്തിലായി.വ്യത്യസ്ത മതത്തിൽപ്പെട്ടവരായിതനാൽ ഇരു കുടുംബങ്ങളും എതിർത്തു. എങ്കിലും സമ്മതിക്കുന്നതുവരെ കാത്തിരിക്കാനായിരുന്നു ഇവരുടെ തീരുമാനം. ഒടുവിൽ വീട്ടുകാരുടെ സമ്മതത്തോടെയാണ് പ്രണയം വിവാഹത്തിലെത്തിയത്.

ഡാർക്ക് മെറൂൺ നിറത്തിലുള്ള കാഞ്ചീപുരം സാരിയായിരുന്നു എലീനയുടെ വേഷം. കസവ് മുണ്ടും ജുബ്ബയുമായിരുന്നു രോഹിത്ത് ധരിച്ചത്.കോവിഡ് മാനദണ്ഡങ്ങൾ പാലിച്ചു നടത്തിയ വിവാഹത്തിൽ അടുത്ത ബന്ധുക്കളും സുഹൃത്തുക്കളും മാത്രമാണ് പങ്കെടുത്തത്.

അവതാരകയായി തിളങ്ങിയ എലീന, ബിഗ് ബോസ് മത്സരാർഥിയായും ശ്രദ്ധ നേടിയിരുന്നു. കോട്ടയം സ്വദേശി ഫിലിപ്പോസ് പടിക്കലിന്റെയും ബിന്ദുവിന്റെയും ഏകമകളാണ്. കോഴിക്കോട് സ്വദേശിയായ രോഹിത് ബിസിനസ്സുകാരനാണ്. പ്രദീപ് നായരും ശ്രീജയുമാണ് മാതാപിതാക്കൾ.