കൊച്ചി: സമൂഹ മാധ്യമത്തിൽ നടിമാർക്ക് പല തരത്തിലുള്ള കമന്റുകൾ തേടിയെത്തുന്നത് പതിവാണ്. മിക്കവരും ഇതിനെതിരെ പ്രതികരിക്കാറുമില്ല. എന്നാൽ തനിക്കെതരെ കമന്റിട്ട 'ഞരമ്പ് രോഗിക്ക് ' കിടിലൻ മറുപടിയാണ് അനു സിത്താര കഴിഞ്ഞ ദിവസം നൽകിയത്. നിമിഷ സജയനൊപ്പമുള്ള ഫോട്ടോയാണ് കഴിഞ്ഞ ദിവസം അനു ഫേസ്‌ബുക്കിലൂടെ പങ്കുവെച്ചത്. നിമിഷങ്ങൾക്കകം തന്നെ ഒട്ടേറെ കമന്റുകളും  ചിത്രത്തെ തേടിയെത്തി.

ഫഹദ് ഫാസിൽ നായകനായ വരത്തൻ എന്ന സിനിമയിലെ 'ഞരമ്പു രോഗിയായി' വേഷമിട്ട വിജിലേഷിന്റെ ചിത്രമാണ് യുവാവ് കമന്റിട്ടത്. എന്നാൽ ഇതിൽ പതാറാതെ അനു ഉരുളയ്ക്കുപ്പേരി പോലെ മറുപടിയും നൽകി. വിജിലേഷ് അടക്കമുള്ള വില്ലന്മാർക്കെതിരെ സംഘട്ടനം നടത്തുന്ന ഫഹദിന്റെ ചിത്രമാണ് അനു 'മറുപടി കമന്റായി' നൽകിയത്. ഇതിന് പിന്നാലെ ആയിരത്തിലധികം കമന്റുകളും ലൈക്കുകളുമാണ് അനുവിന്റെ പ്രതികരണത്തെ തേടിയെത്തിയത്.

ഫോട്ടോ കമന്റിട്ടയാളെ ട്രോളി നിരവധി ആരാധകരും കമന്റിന് താഴെയെത്തിയിരുന്നു. നേരത്തെ ടൊവിനോക്കൊപ്പമുള്ള ചിത്രവുമായി ബന്ധപ്പെട്ട് അനു സിത്താരയെ ട്രോളിയ ആരാധകന് നടി നൽകിയ രസകരമായ മറുപടി വൈറലായിരുന്നു. കുപ്രസിദ്ധ പയ്യൻ എന്ന ചിത്രത്തിൽ നിമിഷയും അനുവും നായികമാരായെത്തുന്നുണ്ട്. ടൊവിനോ ആണ് ചിത്രത്തിലെ നായകൻ.