അയച്ച മെസേജുകൾ ഡിലീറ്റ് ചെയ്യുകയോ എഡിറ്റ് ചെയ്യുകയോ ചെയ്യാം; ലോക്സ്‌ക്രീനും വാൾ പേപ്പറുമൊക്കെ സ്വയം സൃഷ്ടിക്കാം; ആപ്പിൾ ഐ ഒ എസ് 16 മാറ്റങ്ങൾ ഇങ്ങനെ; ഏറ്റവും പുതിയ മാക്സ് ബുക്ക് എയറിന്റെ വിശേഷങ്ങളും അറിയാം; ആപ്പിൾ ഗ്ലാസ്സ് ഇനിയുമില്ല
നിങ്ങൾ ആർക്കെങ്കിലും തെറ്റായ ഒരു സന്ദേശം അയച്ചുവോ ? അല്ലെങ്കിൽ ഒരു സന്ദേശം അയച്ചതിനു ശേഷം അത് അയക്കേണ്ടിയിരുന്നില്ല എന്ന് തോന്നിയിട്ടുണ്ടോ ? ഇനിഅത്തരം സന്ദർഭങ്ങളിൽ ഏറെ പശ്ചാത്തപിക്കേണ്ടി വരില്ല. പുതിയ ഐ ഒ എസ് 16 ൽ ആപ്പിൾ ഇത്തരം പ്രശ്നങ്ങൾക്ക് പരിഹാരം നിർദ്ദേശിക്കുന്നുണ്ട്. നിങ്ങൾ അയച്ച സന്ദേശം അൺഡൂ സെൻഡ് ചെയ്യുവാനും അല്ലെങ്കിൽ അത് എഡിറ്റ് ചെയ്യുവാനുമുള്ള സൗകര്യമാണ് ആപ്പിൾ പുതിയ ഐ ഒ എസ് 16 ൽ നൽകുന്നത്. വാട്സ്അപിനേയും അതുപോലുള്ള മറ്റ് മെസേജിങ് ആപ്പുകളോട് കിടപിടിക്കുന്ന സൗകര്യമാണ് ആപ്പിൾ നൽകുന്നതെന്ന് സി സി എസിലെ ചീഫ് അനലിസ്റ്റ് ബെൻ വുഡ് പറയുന്നു.
ഇന്നലെ നടന്ന ആപ്പിളിന്റെ ഡബ്ല്യൂ ഡബ്ല്യൂ ഡി സി കോൺഫറൻസിലാണ് ഇക്കാര്യം പുറത്തുവിട്ടത്. ആപ്പിളിന്റെ മെസേജ് ആപ്പിലായിരിക്കും ഈ സൗകര്യം ഉണ്ടാവുക.. വരുന്ന വർഷം ഇറങ്ങാനിരിക്കുന്ന ഐ ഒ എസ് 16 അപ്ഡേറ്റിനൊപ്പം ഇതും ലഭ്യമാകും. നിങ്ങൾ സന്ദേശം അയച്ചതിനു ശേഷം അതിൽ തെറ്റുകൾ എന്തെങ്കിലുമുണ്ടെന്ന് തോന്നിയാൽ അത് എഡിറ്റ് ചെയ്യാവുന്നതാണ്. സന്ദേശം ലഭിച്ചയാൾക്ക് ലഭിച്ച സന്ദേശത്തിൽ എഡിറ്റ് ചെയ്തിരിക്കുന്നു എന്ന അറിയിപ്പോടെ സന്ദേശം എത്തും. അതുപോലെ ഒരു സന്ദേശം ഒരാൾക്ക് തെറ്റായി അയച്ചാൽ, അത് അൺഡൂ സെൻഡ് ചെയ്യാം. അപ്പോൾ സ്വീകർത്താവിന്റെ ഫോണിൽ, നിങ്ങളുടെ പേരും നമ്പറും മാത്രമെ കാണുകയുള്ളു. സന്ദേശം സ്വമേധയായ് ഡിലിറ്റ് ആയിപോകും.
പുതുമയാർന്ന ലൊക്ക് സ്‌ക്രീൻ
ഇതിനൊപ്പം ഐ ഒ എസ് 16 ൽ വരുന്ന മറ്റൊരു പ്രത്യേകത കൂടുതൽ ആകർഷകമായ ലോക്ക്സ്‌ക്രീനായിരിക്കും എന്നും കമ്പനി ഇന്നലെ വെളിപ്പെടുത്തി. നിലവിലെ ലോക്ക്സ്‌ക്രീനിൽ, മുകളിൽ കലണ്ടറും സമയവുമാണ് വരുന്നത്. എന്നാൽ, പുതിയ ലോക്ക്സ്‌ക്രീനിൽ നിങ്ങൾക്ക് വിഡ്ജറ്റുകൾ, ഫോണ്ടുകൾ, വാൾപേപ്പറുകൾ എന്നിവ ഉപയോഗിച്ച്, നിങ്ങളുടെ ഇഷ്ടാനുസരണം ലോക്ക്സ്‌ക്രീൻ ക്രമീകരിക്കാൻ കഴിയും. പുതിയ മൾട്ടിലയേർഡ് എഫക്ട് ഉപയോഗിച്ച് ഈ ആകർഷകമായ ലോക്ക്സ്‌ക്രീൻ സാധ്യമാക്കിയിരിക്കുന്നത്. അതുപോലെ തീയതിയുടെയും സമയത്തിന്റെയും രൂപങ്ങളും മാറ്റാൻ സാധിക്കും.
അടുത്ത വർഷത്തെ ഐ ഒ എസ് 16 അപ്ഡേറ്റിനൊപ്പമായിരിക്കും ഈ സൗകര്യവും ലഭ്യമാക്കുക. ലോക്ക്സ്‌ക്രീനിൽ ഏതൊക്കെ വിഡ്ജറ്റുകൾ വേണമെന്നത് ഉപയോക്താക്കൾക്ക് തെരഞ്ഞെടുക്കാവുന്നതാണ്. ഉദാഹരനത്തിന് നടക്കുമ്പോൾ സ്റ്റെപ് കൗണ്ട് എടുക്കണമെന്ന് നിങ്ങൾ ആഗ്രഹിക്കുന്നെങ്കിൽ അത് ഇവിടെ കാണിക്കാൻ കഴിയും. മാത്രമല്ല, പ്രിയപ്പെട്ട ഇമോജികളും മറ്റും ചേർത്ത് ഇഷ്ട നിറത്തിൽ തന്നെ ലോക്ക്സ്‌ക്രീൻ ആകർഷണീയമാക്കാനുള്ള സൗകര്യവും ഇതിലുണ്ടായിരിക്കും.
പുതിയ മാക്‌ബുക്ക് എയറിന്റെ വിശേഷങ്ങൾ
ഇന്നലെ നടന്ന ഡബ്ല്യൂ ഡബ്ല്യൂ ഡി സി കോൺഫറൻസിൽ ആപ്പിൾ അവരുടെ പുതിയ മാക്‌ബുക്കും പ്രസിദ്ധപ്പെടുത്തി. വെറും 11 മില്ലിമീറ്റർ മാത്രം കനമുള്ളതാണ് ഈ ലാപ്ടോപ്. മാത്രമല്ല കഷ്ടിച്ച് 1.25 കിലോ തൂക്കവും. മാഗ്സേഫ് ചാർജിങ്, രണ്ട് തണ്ടർബോൾട്ട് പോർട്ടുകൾ, ഒരു ഹെഡ്ഫോൺ ജാക്ക്, ആപ്പിളിന്റെ പുതിയ എം 2 പ്രൊസസ്സർ എന്നിവയാണ് ഇതിന്റെ പ്രത്യേകതകൾ. ലോകത്തിലെ തന്നെ ഏറ്റവുമധികം ജനപ്രീതിയുള്ള രണ്ട് ലാപ്ടോപുകളായ മാക്‌ബുക്ക് എയർ, 13 ഇഞ്ച് മാക്‌ബുക്ക് പ്രോ എന്നിവയിൽ പുതിയ എം 2 ചിപ് കൊണ്ടുവരുന്നു എന്നത് അഭിമാനകരമായ കാര്യമാണെന്നാണ് കമ്പനി വക്താവ് അവകാശപ്പെട്ടത്.
എം 2 അടിസ്ഥാനമാക്കി പൂർണമായും പുനർ രൂപകല്പന ചെയ്ത പുതിയ മാക് ബുക്ക് കൂടുതൽ കനം കുറഞ്ഞതും, ഭാരം കുറഞ്ഞതും അതേസമയം വേഗത കൂടിയതുമാണെന്ന് കമ്പനി പറയുന്നു. അതുപോലെ, മെച്ചപ്പെട്ടക്യാമറ, വർദ്ധിച്ച ബാറ്ററി ലൈഫ് എന്നിവയും ഇതിന്റെ പ്രത്യേകതകളാണ്. നാല് വ്യത്യസ്താ ഫിനിഷുകളിലാണ് ഇത് വിപണിയിൽ എത്തുക.
ഈ വർഷവും ആപ്പിൾ സ്മാർട്ട് ഗ്ലാസ്സ് ഇറങ്ങില്ല.
പുതിയ ഉദ്പന്നങ്ങളുടെ വിവരങ്ങൾ ആവേശപൂർവ്വം ഡബ്ല്യൂ ഡബ്ല്യൂ ഡി സി കോൺഫറൻസിൽകേട്ടുകൊണ്ടിരുന്ന ആപ്പിൾ ആരാധകരെ വീണ്ടും നിരാശപ്പെടുത്തിക്കൊണ്ട് ആപ്പിൾ സ്മാർട്ട് ഗ്ലാസ് വീണ്ടും നീണ്ടു പോവുകയാണ്. ഇത്തവണത്തെ ഈവന്റിൽ സ്മാർട്ട് ഗ്ലാസിനെ കുറിച്ചുള്ള കാര്യങ്ങൾ ആപ്പിൾ പുറത്തുവിടുമെന്ന് ഒരുകിംവദന്തി ഉണ്ടായിരുന്നു. എന്നാൽ, പുതിയ ഐഫോൺ, ഐ പാഡ്തുടങ്ങിയവയെ കുറിച്ചുള്ള വിശദാംശങ്ങൾ മാത്രമാണ് ആപ്പിൾ നൽകിയത്. അതിനൊപ്പം പുതിയ മാക്ക്‌ബുക്കിനെ കുറിച്ചും അവർ വെളിപ്പെടുത്തിയിരുന്നു.
നിരവധി പേരാണ് ഇക്കാര്യത്തിൽ തങ്ങളുടെ നിരാശ പങ്കുവച്ചുകൊണ്ട് സമൂഹമാധ്യമങ്ങളിൽ എത്തിയിരിക്കുന്നത്. വെർച്വൽ റിയാലിറ്റിയും ആഗ്മെന്റഡ് റിയാലിറ്റിയും സംഗമിപ്പിച്ചുകൊണ്ടുള്ള സ്മാർട്ട് ഗ്ലാസുകൾ വികസന ദശയിലാണെന്ന് കഴിഞ്ഞ കുറച്ചു വർഷങ്ങളായി കേള്ക്കുന്നതാണ്. 2020 ൽ ഇതിന്റെ രണ്ട് പ്രോട്ടോടൈപ്പുകൾ തയ്യാറായെന്നും ഒരു വാർത്ത ഉണ്ടായിരുന്നു. എന്നാൽ, ഇക്കാര്യത്തിൽ ആപ്പിൾ ഔദ്യോഗികമായ പ്രതികരണം ഒന്നും നൽകിയിരുന്നതുമില്ല.
