ആറാട്ടുപുഴ: ഇറച്ചി വ്യാപാരിയെ വീട്ടിൽ കയറി വെട്ടിപ്പരിക്കേൽപിച്ച കേസിൽ രണ്ടുപേരെ കരീലക്കുളങ്ങര പൊലീസ് അറസ്റ്റ് ചെയ്തു. മുതുകുളം സജീന മൻസിലിൽ ഷാജഹാൻ (34), മുതുകുളം തെക്ക് ചിറ്റേഴത്ത് വീട്ടിൽ ശരത്ത് (ആന ശരത്ത് -32) എന്നിവരെയാണ് അറസ്റ്റ് ചെയ്തത്.

കഴിഞ്ഞ എട്ടിനാണ് ചിങ്ങോലി കൈതവന ലക്ഷംവീട്ടിൽ നവാസിനെ (44) ഒരുസംഘം വീട്ടിൽ അതിക്രമിച്ചുകയറി വെട്ടിപ്പരിക്കേൽപിച്ചത്. രണ്ടാംപ്രതി കീരിക്കാട് തെക്ക് ഇരുമ്പാണി ലക്ഷംവീട്ടിൽ അരുൺ കോശിയെ (27) കേസിൽ നേരത്തേ അറസ്റ്റ് ചെയ്തിരുന്നു. ഇനിയും പ്രതികൾ പിടിയിലാകാനുണ്ടെന്ന് പൊലീസ് പറഞ്ഞു.