ബൈക്ക് മോഷണ ശ്രമം; ഓടി രക്ഷപെട്ട പ്രതികളെ മണിക്കൂറുകൾക്കുള്ളിൽ പിടികൂടി പൊലീസ്

ആലുവ: ബൈക്ക് മോഷ്ടിക്കുന്നതിനിടയിൽ ആളുകളുടെ ശ്രദ്ധയിൽപ്പെട്ടതിനെ തുടർന്ന് ഓടി രക്ഷപ്പെട്ട പ്രതികളെ മണിക്കൂറുകൾക്കുള്ളിൽ ആലുവ പൊലീസ് പിടികൂടി. ചാലക്കുടി മുകുന്ദപുരം കിഴക്കേക്കോട്ട ആറാട്ടുപറമ്പിൽ വീട്ടിൽ ആഷ്വിൻ (24), ഇടുക്കി രാജകുമാരി വേലിക്കകത്തു വീട്ടിൽ ബിനു മോൻ (23) എന്നിവരെയാണ് പിടികൂടിയത്. കാരോത്തുകുഴിക്ക് എതിർവശത്തെ റസിഡൻസ് കോംപ്ലക്‌സിന്റെ പാർക്കിങ് ഏരിയായിൽ വച്ചിരുന്ന ബൈക്കാണ് മോഷ്ടിക്കാൻ ശ്രമിച്ചത്.

ജീവനക്കാർ വരുന്നത് കണ്ട് ശ്രമം ഉപക്ഷിച്ച് രക്ഷപ്പെടുകയായിരുന്നു. തുടർന്ന് പൊലീസ് നഗരത്തിൽ നടത്തിയ പരിശോധനയിൽ മണപ്പുറം നടപ്പാലത്തിന്റെ അടിയിൽ നിന്നുമാണ് ഇവരെ പിടികൂടിയത്. നിരവധി കേസുകളിലെ പ്രതികളാണിവർ. ഇൻസ്‌പെക്ടർ സൈജു കെ പോൾ, എസ്‌ഐമാരായ കെ.വി.ജോയി, ശിവാസ് സി.പി. ഒമാരായ മാഹിൻ ഷാ അബൂബക്കർ, മുഹമ്മദ് അമീർ, നിയാസ് തുടങ്ങിയവരാണ് അന്വേഷണ സംഘത്തിലുണ്ടായിരുന്നത്.