സ്‌കൂട്ടർ യാത്രക്കാരിക്ക് നേരം ആക്രമണം: പെരുമ്പാവൂർ ഒരാൾ അറസ്റ്റിൽ

പെരുമ്പാവൂർ: സ്‌കൂട്ടർ യാത്രക്കാരിയായ യുവതിയെ ആക്രമിച്ച കേസിൽ ഒരാൾ അറസ്റ്റിൽ. വെങ്ങോല വില്ലേജ് ഓഫീസിനു സമീപം ബ്ലായിൽ വീട്ടിൽ നിഖിൽ രാജു (തമ്പി 31) വിനെയാണ് പെരുമ്പാവൂർ പൊലീസ് അറസ്റ്റ് ചെയ്തത്. കഴിഞ്ഞ ദിവസം പൂനൂർ ഭാഗത്ത് വെച്ച് വെങ്ങോല സ്വദേശിയായ യുവതി ഓടിച്ചുവന്ന സ്‌കൂട്ടറിൽ നിഖിൽ രാജിന്റെ സ്‌കൂട്ടർ ഇടിപ്പിച്ച് യുവതിയെ റോഡിൽ വീഴ്‌ത്തുകയായിരുന്നു.

തുടർന്ന് ഇയാൾ കൈവശം കരുതിയിരുന്ന കമ്പി കൊണ്ട് കുത്താൻ ശ്രമിച്ചത് തടഞ്ഞ കാരണം യുവതി കുത്തേൽക്കാതെ രക്ഷപ്പെട്ടു. സംഭവത്തിൽ പരിക്കേറ്റ ഇവർ ആശുപത്രിയിൽ ചികിത്സയിലാണ്. മുൻപ് ഇതേ പരാതിക്കാരിയെ ആക്രമിച്ചതിനും, പ്രതിയുടെ സുഹൃത്തിനെ കൊലപ്പെത്താൻ ശ്രമിച്ചതിനും പെരുമ്പാവൂർ പൊലീസ് സ്റ്റേഷനിൽ ഇയാൾക്കെതിരെ കേസുകളുണ്ട്.

പെരുമ്പാവൂർ ഇൻസ്‌പെക്ടർ ആർ.രഞ്ജിത്ത്, സബ്ബ് ഇൻസ്‌പെക്ടർമാരായ റിൻസ് എം തോമസ്, ജോസ്സി എം ജോൺസൺ, എഎസ്ഐ ബിജു.എൻ.കെ, എസ്.സി.പി.ഒ ഷിബു.പി.എ എന്നിവരാണ് അന്വേഷണ സംഘത്തിലുള്ളത്.