വാഹന പരിശോധനക്കിടെ വടിവാളുമായി രണ്ടു പേർ പിടിയിൽ; ഓടി രക്ഷപെടാൻ ശ്രമിച്ചവരെ പിന്തുടർന്ന് പിടികൂടി

ആലുവ: വാഹന പരിശോധനക്കിടെ വടിവാളുമായി രണ്ടു പേർ പിടിയിൽ. അത്താണി വാഴവച്ചുപറമ്പിൽ പ്രസാദ് (29), കോടശേരി പരിയാരം കോട്ടാറ്റി വീട്ടിൽ അനീഷ് (28) എന്നിവരെയാണ് നെടുമ്പാശേരി പൊലീസ് പിടികൂടിയത്. അത്താണി വി.ഐ.പി റോഡിൽ കഴിഞ്ഞ ദിവസം പുലർച്ചെ ഒരു മണിയോടെ ജില്ലാ പൊലീസ് മേധാവി കെ. കാർത്തിക്കിന്റെ നിർദ്ദേശാനുസരണം പ്രത്യേക സംഘം രാത്രികാല പരിശോധന നടത്തുമ്പോഴാണ് ഇവർ ബൈക്കിൽ കടന്നുപോകുന്നത് ശ്രദ്ധയിൽ പെട്ടത്.

പൊലീസിനെക്കണ്ട് രക്ഷപ്പെടാൻ ശ്രമിച്ച ഇവരെ പൊലീസ് പിന്തുടർന്ന് പിടികൂടുകയായിരുന്നു. പ്രസാദ് കൊലപാതക ശ്രമം അടക്കം പന്ത്രണ്ട് കേസുകളിലെ പ്രതിയും, നെടുമ്പാശേരി പൊലീസ് സ്റ്റേഷനിലെ റൗഡി ലിസ്റ്റിൽ പെട്ടയാളുമാണ്. എസ്.എച്ച്.ഒ പി.എം.ബൈജു, എസ്‌ഐമാരായ വി എസ്.പ്രസാദ്കുമാർ, ജോസ് എഎസ്ഐ ബൈജു കുര്യൻ എസ്.സി.പി.ഒമാരായ എൻ.ജി.ജിസ്‌മോൻ, ഷാക്കിർ തുടങ്ങിയവർ ചേർന്നാണ് പ്രതികളെ പിടികൂടിയത്.