നീണ്ട 21 വർഷത്തെ സ്തുത്യർഹമായ സേവനത്തിന് ശേഷം അൽ ഇഖ്തിസ്സാദ് കമ്പനിയിൽ നിന്നും സേവനമവസാനിപ്പിച്ച് അബ്ദുസ്സലാം യാത്രയാകുന്നു. 1997 ൽ സേവനമാരംഭിച്ച് സീനിയർ സർവീസ് എഞ്ചിനീയറായി വിരമിക്കുന്ന സലാം കമ്പനിയിൽ വരുന്ന കാലത്ത് മലയാളികളായി സാങ്കേതിക സേവന രംഗത്ത് അധികമാരും ഉണ്ടായിരുന്നില്ല.
എന്നാൽ അദ്ദേഹത്തിന്റെ പ്രയത്‌നം കൊണ്ട് മലയാളികളായ ഒരുപാട് സാങ്കേതിക വിദഗ്ദ്ധരെ കമ്പനിയുടേതായി പരിപോഷിപ്പിച്ചെടുക്കുവാനും ജിദ്ദയിലെ വിവര സാങ്കേതിക രംഗത്ത് മലയാളികൾക്കൊരു മേൽവിലാസമുണ്ടാക്കുവാനും സാധിച്ചു.
ഫ്‌ളമിംഗോ മാളിലെ ബാർബിക്യു റെസ്റ്റാറന്റിലൊരുക്കിയ പ്രൗഢമായ വിടവാങ്ങൽ ചടങ്ങിൽ ജിദ്ദ ബ്രാഞ്ച് മാനേജർ ഫാദി അവാദ് അബ്ദുസ്സലാമിന് കമ്പനിയുടെ ഉപഹാരവും വിശിഷ്ടസേവാ ഫലകവും സമ്മാനിച്ചു.
അബ്ദുൽ ജലീൽ കാരിയോടൻ, മാരിയോ, അഹ്മദ് വഹ്ശി തുടങ്ങിയവർ സംസാരിച്ചു. ശേഷം സലാം വികാര നിർഭരമായ മറുപടി പ്രസംഗം നടത്തി. മാതൃകാപരമായ സേവനത്തിനും ഉപഭോക്തക്കളുമായി വളരെ നല്ല ബന്ധം സ്ഥാപിച്ച് കമ്പനിയുടെ യശസ്സുയർത്തിയതിനും മാനേജർ അബ്ദുസ്സലാമിനെ പ്രത്യേകം അനുമോദിച്ചു. മലപ്പുറം ജില്ലയിലെ അരീക്കോട് സ്വദേശിയാണ് അബ്ദുസ്സലാം .
