കൊച്ചി: തങ്ങളുടെ ഇടപാടുകാർക്ക് അടിസ്ഥാന ബാങ്കിങ് സേവനങ്ങൾ വാട്ട്സ്ആപ്പ് വഴി നൽകുന്നതിന് രാജ്യത്തെ ഏറ്റവും വലിയ മൂന്നാമത്തെ സ്വകാര്യ ബാങ്കായ ആക്സിസ് ബാങ്കും ജനപ്രിയ ചാറ്റിങ് ആപ്ലിക്കേഷനായ വാട്ട്സ്ആപ്പും പങ്കാളിത്തം ആരംഭിച്ചു.

അക്കൗണ്ട് ബാലൻസ്, അടുത്തിയിടെ നടത്തിയ ഇടപാടുകൾ, ക്രെഡിറ്റ് കാർഡ് അടവ്, എഫ്ഡി, റെക്കറിങ് ഡിപ്പോസിറ്റ് വിശദാംശങ്ങൾ തുടങ്ങിയ വിവരങ്ങൾക്കു പുറമേ അന്വേഷണങ്ങൾക്കു തത്സമയം മറുപടിയും ലഭിക്കുന്ന സേവനങ്ങളാണ് വാട്ട്സ്ആപ്പ് വഴി ബാങ്ക് ലഭ്യമാക്കുന്നത്.

ബാങ്കിങ് ഇടപാടുകൾ, അടുത്തുള്ള ശാഖ, എടിഎം, വായ്പ നൽകുന്ന കേന്ദ്രങ്ങൾ തുടങ്ങിയവ സംബന്ധിച്ച അന്വേഷണങ്ങൾ, വിവിധ ബാങ്കിങ് ഉത്പന്നങ്ങൾക്കുള്ള അപേക്ഷ തുടങ്ങിയവയെല്ലാം വാട്ട്സ്ആപ്പ് ബാങ്കിങ് ഉപയോഗിച്ച് നടത്താം. ഡെബിറ്റ്, ക്രെഡിറ്റ് കാർഡ് ബ്ലോക്ക് ചെയ്യാനും വാട്ട്സ്ആപ്പ് ബാങ്ക് വഴി സാധിക്കും.

ബാങ്കിന്റെ ഉപഭോക്താക്കൾക്കും അല്ലാത്തവർക്കും അവധി ദിവസങ്ങൾ ഉൾപ്പെടെ 24 മണിക്കൂറും ആക്സിസ് ബാങ്ക് വാട്ട്സ്ആപ്പ് ബാങ്കിങ് ലഭ്യമായിരിക്കും. ഉപഭോക്താക്കളെ കൂടുതൽ ശ്രദ്ധിക്കുകയും നിരന്തരമായ നവീകരണത്തിലൂടെ ഉപഭോക്താക്കൾക്ക് കൂടുതൽ സൗകര്യമൊരുക്കുകയും ചെയ്യുകയെന്ന തത്ത്വത്തിന് അനുസൃതമായാണ് ബാങ്ക് വാട്ട്സ്ആപ്പ് ബാങ്കിങ് അവതരിപ്പിച്ചിട്ടുള്ളത്. പൂർണ സുരക്ഷിയോടെയാണ് ഈ സംവിധാനമൊരുക്കിയിട്ടുള്ളത്.

ഉപഭോക്താക്കളുടെ ജീവതത്തിൽ തങ്ങൾക്കു വഹിക്കാവുന്ന സ്ഥാനം പുനർനിർവചിക്കുകയെന്നതാണ് തങ്ങളുടെ ലക്ഷ്യം. ഉപഭോക്താക്കളുമായുള്ള ബന്ധത്തിൽ പുതിയൊരു തലം സൃഷ്ടിക്കുവാൻ തങ്ങൾ ആഗ്രഹിക്കുന്നു. ഈ സാങ്കേതിക വിദ്യ ഉപഭോക്തൃ അനുഭവം മെച്ചപ്പെടുത്തുമെന്നു മാത്രമല്ല, എല്ലാ ഉപഭോക്താക്കൾക്കും പ്രയാസങ്ങളില്ലാതെ വ്യക്തിഗത അനുഭവം പ്രദാനം ചെയ്യുകയും ചെയ്യുന്നു, ആക്സിസ് ബാങ്ക് ഇവിപിയും ഡിജിറ്റൽ ബാങ്കിങ് മേധാവിയുമായ സമീർ ഷെട്ടി പറഞ്ഞു.

വാട്ട്സ്ആപ്പ് ബാങ്കിങ് ഉപയോഗിക്കുന്നതിന് ഉപയോക്താക്കൾ വാട്ട്സ്ആപ്പിൽ 7036165000 എന്ന നമ്പറിലേക്ക് 'ഹായ്' അയച്ചാൽ മതി.

 

ആക്സിസ് ബാങ്ക്