ബഹ്‌റൈനിൽ നിയന്ത്രണങ്ങൾ കടുപ്പിക്കുന്നു; മാളുകളടക്കമുള്ള ഷോപ്പുകളിൽ പ്രവേശനം വാക്‌സിൻ പൂർത്തീകരിച്ചവർക്ക്; രാജ്യത്തേക്ക് പ്രവേശിക്കാനുള്ള അനുമതി റസിഡന്റ് വിസക്കാർക്ക് മാത്രം
കോവിഡ് രോഗികളുടെ എണ്ണം ഉയരുന്ന സാഹചര്യത്തിൽ ബഹ്‌റൈനിൽ കൂടുതൽ നിയന്ത്രണങ്ങൾ പ്രഖ്യാപിച്ചു.ഷോപ്പിങ് മാൾ, മാർക്കറ്റ്, റസ്റ്റാറന്റ്, സലൂൺ, സിനിമ തിയറ്റർ എന്നിവിടങ്ങളിൽ പ്രവേശനം കോവിഡ് വാക്‌സിൻ രണ്ടാം ഡോസ് സ്വീകരിച്ച് 14 ദിവസമായവർക്കും കോവിഡ് മുക്തി നേടിയവർക്കും മാത്രമായി പരിമിതപ്പെടുത്തി.ഇവിടങ്ങളിൽ 18 വയസ്സിൽ താഴെയുള്ളവർക്ക് പ്രവേശനമില്ല.
സർക്കാർ ഓഫിസുകൾ, സേവന കേന്ദ്രങ്ങൾ എന്നിവിടങ്ങളിലും ഇത് ബാധകമാണ്. അതേസമയം, സൂപ്പർമാർക്കറ്റുകൾ, ബാങ്കുകൾ, ഫാർമസികൾ എന്നിവിടങ്ങളിലെ പ്രവേശനത്തിന് ഈ നിയന്ത്രണം ബാധകമല്ല. വെള്ളിയാഴ്ച മുതൽ പ്രാബല്യത്തിൽ വരുന്ന നിയന്ത്രണങ്ങൾ ജൂൺ മൂന്നു വരെ തുടരും. ഒത്തുചേരലുകൾ ആറു പേർക്ക് മാത്രമായി ചുരുക്കിയിട്ടുണ്ട്.
ഇന്ത്യ, പാക്കിസ്ഥാൻ, ബംഗ്ലാദേശ്, നേപ്പാൾ, ശ്രീലങ്ക എന്നിവിടങ്ങളിൽ നിന്ന് ബഹ്‌റൈനിൽ റെസിഡന്റ് വിസ ഉള്ളവർക്ക് മാത്രമാണ് പ്രവേശനം അനുവദിക്കുക. ഇവർക്ക് ബഹ്‌റൈനിൽ 10 ദിവസത്തെ ക്വാറന്റീൻ നിർബന്ധമാക്കിയിട്ടുണ്ട്. യാത്ര പുറപ്പെടുന്നതിനു മുമ്പ് 48 മണിക്കൂറിനുള്ളിൽ നടത്തിയ കോവിഡ് പരിശോധനയുടെ സർട്ടിഫിക്കറ്റ് ഇവർ ഹാജരാക്കണം. ബഹ്‌റൈനിൽ എത്തുമ്പോൾ വിമാനത്താവളത്തിൽ വെച്ചും തുടർന്ന് അഞ്ചാം ദിവസവും പത്താം ദിവസവും കോവിഡ് പരിശോധന നടത്തുകയും വേണം.
ബഹ്‌റൈനിൽനിന്ന് കോവിഡ് വാക്‌സിൻ സ്വീകരിച്ചവർക്കും ഇത് ബാധകമാണ്.
