മനാമ: സമസ്ത കേരള ജംഇയ്യത്തുൽ ഉലമ പ്രസിഡന്റ് സയ്യിദുൽ ഉലമ സയ്യിദ് മുഹമ്മദ് ജിഫ് രി മുത്തുക്കോയ തങ്ങളുടെ ത്രിദിന ബഹ്‌റൈൻ സന്ദർശനം നവംബർ 11 (വെള്ളിയാഴ്ച) മുതൽ ആരംഭിക്കും.
സമസ്ത ബഹ്‌റൈൻ കേന്ദ്ര-ഏരിയാ കമ്മറ്റികളുടെ കീഴിൽ ബഹ്‌റൈനിലെ വിവിധ ഭാഗങ്ങളിൽ സംഘടിപ്പിക്കുന്ന വിവിധ പരിപാടികളിലും സ്വദേശി പ്രമുഖരുമായുള്ള കൂടിക്കാഴ്ചകളിലും തങ്ങൾ പങ്കെടുക്കും. സമസ്ത കേരള ഇസ്ലാം മത വിദ്യഭ്യാസ ബോർഡ് മാനേജർ മോയിൻകുട്ടി മാസ്റ്ററും തങ്ങളെ അനുഗമിച്ച് ബഹ്‌റൈനിലെത്തുന്നുണ്ട്.
വെള്ളിയാഴ്ച കാലത്ത് 10 മണിക്ക് ബഹ്‌റൈനിലെത്തുന്ന ഇരുവർക്കും സമസ്ത ബഹ്‌റൈൻ ഘടകത്തിന്റെ നേതൃത്വത്തിൽ നേതാക്കളും പ്രവർത്തകരും ബഹ്‌റൈൻ എയർപോർട്ടിൽ സ്വീകരണം നൽകും.തുടർന്ന് വെള്ളിയാഴ്ച രാത്രി 8.30ന് ഈസാടൗണിലെ ഇന്ത്യൻ സ്‌കൂൾ ഓഡിറ്റോറിയത്തിൽ നടക്കുന്ന സമസ്ത ബഹ്‌റൈൻ സ്വീകരണ മഹാ സമ്മേളനത്തിൽ ജിഫ്രി തങ്ങൾ മുഖ്യ പ്രഭാഷണം നടത്തും.
'നീതി നീങ്ങുന്ന ലോകം നീതി നിറഞ്ഞ തിരുനബി(സ)' എന്ന പ്രമേയത്തിൽ സമസ്ത ബഹ്‌റൈൻ ആചരിച്ചു വരുന്ന നബിദിനാഘോഷ കാന്പയിന്റെ സമാപനവും ഇതോടനുബന്ധിച്ച് നടക്കും.
സമസ്തയുടെ കീഴിൽ ബഹ്‌റൈനിലെ വിവിധ ഏരിയകളിലായി പ്രവർത്തിക്കുന്ന 9 മദ്‌റസകളുടെ കലാസാഹിത്യ പരിപാടികളുടെ സമാപന സംഗമം കൂടിയാണിത്. നേരത്തെ ഏരിയാ തലങ്ങളിൽ വിപുലമായ പരിപാടികൾ നടന്നിരുന്നു.
വെള്ളിയാഴ്ച ഇന്ത്യൻ സ്‌കൂളിൽ നടക്കുന്ന സമാപന ചടങ്ങിൽ സമസ്ത നേതാക്കളോടൊപ്പം മത-രാഷ്ട്രീയ-സാസ്‌കാരിക മേഖലകളിലെ പ്രമുഖരും സംബന്ധിക്കും.പരിപാടിയുടെ വിജയത്തിനായി വിപുലമായ സ്വാഗതസംഘം രൂപീകരിച്ച് പ്രവർത്തനമാരംഭിച്ചിട്ടുണ്ട്.
ഇതിന് മുമ്പ് 2017 നവംബറിലാണ് അവസാനമായി ബഹ്‌റൈനിൽ വന്നത്.2018 ലെ യുഎഇ ഗവൺമെന്റിന്റെ അതിഥിയായി തങ്ങൾ പങ്കെടുത്തിരുന്നു.
സയ്യിദ് മുഹമ്മദ് ജിഫ് രി മുത്തുക്കോയ തങ്ങൾ നിലപാട് കൊണ്ടും പാണ്ഢിത്യം കൊണ്ടും കേരളത്തിനകത്തും പുറത്തും ശ്രദ്ധേയനാണ്.പ്രവാചകൻ മുഹമ്മദ് നബി(സ)യുടെ സന്താന പരന്പരയിലെ സയ്യിദും സമസ്ത പ്രസിഡന്റുമായ ജിഫ് രി തങ്ങളുടെ ബഹ്‌റൈൻ സന്ദർശനം വിശ്വാസികൾക്ക് ഏറെ ആത്മീയാനുഭൂതി പകരുന്നതു കൂടിയാണ്. ഇസ്ലാമിക ശരീഅത്ത് വിഷയങ്ങളിൽ അനുയോജ്യമായ നിലപാടെടുക്കുന്ന തങ്ങൾ സാത്വികനും സൂഫിവര്യനും ലളിത ജീവിതത്തിനുടമയുമാണ്.
സമസ്തയുടെ അദ്ധ്യക്ഷനായിരിക്കെ, നിലവിൽ കാസർകോട് - കാഞ്ഞങ്ങാട് സംയുക്ത ഖാദി, കേരളത്തിലുടനീളം നിരവധി മഹല്ലുകളുടെ ഖാദി, കുറ്റിക്കാട്ടൂർ ജാമിഅ യമാനിയ്യ പ്രിൻസിപ്പൽ, വിവിധ മത സ്ഥാപനങ്ങളിലെ മുദരിസ്.. തുടങ്ങിയ മേഖലകളിലും സേവനമനുഷ്ടിക്കുന്ന തങ്ങൾ ആയിരക്കണക്കിന് ശിഷ്യസമ്പത്തിനുടമയാണ്. സമസ്ത പ്രസിഡന്റ് എന്നതൊടൊപ്പം പ്രവാചക കുടുംബത്തിലെ (അഹ് ലു ബൈത്തിലെ) ഒരു സയ്യിദ് കൂടിയായ തങ്ങളവരെ സ്വീകരിക്കാനൊരുങ്ങുകയാണ് ബഹ്‌റൈനിലെ വിശ്വാസി സമൂഹം. ജിഫ് രി തങ്ങളുടെ സന്ദർശനവുമായി ബന്ധപ്പെട്ട കൂടുതൽ വിവരങ്ങൾക്ക് -00973-39128941,
33049112
