മനാമ: ഇന്ത്യൻ സ്‌കൂൾ ഗ്രൗണ്ടിൽ സുന്നീ ഔഖാഫിന്റെ നേതൃത്വത്തിൽ മലയാളികൾക്കായി നടത്തിയ ഈദ് ഗാഹിൽ ആയിരങ്ങൾ അണിനിരന്നു. തണലും ഇളം തണുപ്പും നിറഞ്ഞ കാലാവസ്ഥയിൽ ഈദ്ഗാഹിലേക്ക് വിശ്വാസികൾ ഏറെ സന്തോഷത്തോടെയും ആവേശത്തോടെയുമാണ് എത്തിയത്. പുലർച്ചെ തന്നെ രാജ്യത്തിന്റെ വിവിധ ഭാഗങ്ങളിൽ നിന്നൊഴുകിയത്തെിയവർ രാവിലെ 5.28നു നമസ്‌കാരത്തിനായി അണിനിരന്നു. ശാന്തമായ കാലാവസ്ഥയിൽ ഈദ് പ്രഭാഷണം കൂടി ശ്രവിച്ച ശേഷമാണ് വിശ്വാസികൾ പരസ്പരം ആലിംഗനം ചെയ്തും സാഹോദര്യവും സ്‌നേഹവും കൈമാറിയും പിരിഞ്ഞു പോയത്. മലയാളികൾ ഏറ്റവും കൂടുതൽ സംഗമിക്കുന്ന ഈദ് ഗാഹാണ് ഇന്ത്യൻ സ്‌കൂളിലേത്. വീട്ടുകാരും കുടുംബങ്ങളും ഒന്നിച്ച് കണ്ടുമുട്ടുകയും ബന്ധം പുതുക്കുകയും ചെയ്യുന്ന സംഗമമായി മാറാൻ ഇതിന് സാധിച്ചിട്ടുണ്ട്.
ബഹ്റൈനിലെ പ്രമുഖ പണ്ഡിതനും പ്രഭാഷകനുമായ സഈദ് റമദാൻ നദ്വി പെരുന്നാൾ നമസ്‌കാരത്തിനും ഖുതുബക്കും നേതൃത്വം നൽകി. ദൈവിക മഹത്വം പ്രകീർത്തിച്ച് വിശ്വാസ പ്രഖ്യാപനം നടത്തുന്ന ആഘോഷമാണ് പെരുന്നാൾ എന്ന് അദ്ദേഹം പ്രസ്താവിച്ചു. വിശ്വാസം ഊട്ടിയുറപ്പിക്കാനും പ്രതിസന്ധികൾ വകഞ്ഞുമാറ്റി മുന്നേറാനും റമദാൻ കരുത്തേകിയിട്ടുണ്ട്. പ്രവാചകന്മാർ നിലകൊണ്ട ആശയാദർശത്തിൽ അടിയുറച്ച് നിലകൊള്ളാനും അതിന് മുന്നിലുള്ള പ്രതിസന്ധികൾ അതിജീവിക്കാനും സാധിക്കണം. വിശ്വാസി സമൂഹം ആഗോള തലത്തിൽ നേരിട്ടു കൊണ്ടിരിക്കുന്ന പലവിധ പ്രതിസന്ധികളുടെയും ആഴം വളരെ വലുതാണ്. എന്നാൽ അത്തരം സന്ദർഭങ്ങളിൽ പതറാതെ സ്ഥിര ചിത്തതയോടെ നിലകൊള്ളുമ്പോഴാണ് ദൈവിക സഹായം ലഭിക്കുന്നത്. തിന്മയെ ഏറ്റവും മികച്ച നന്മയിലൂടെയാണ് പ്രതിരോധിക്കേണ്ടത്.
വ്രതാനുഷ്ഠാനത്തിന്റെ പവിത്രത വരും മാസങ്ങളിൽ നിലനിർത്താൻ സാധിക്കണം. ആഘോഷാവസരങ്ങൾ ബന്ധങ്ങൾ കൂടുതൽ ഊഷ്മളമാക്കാൻ വിനിയോഗിക്കണം. ദൈവ താല്പര്യത്തിനനുസൃതമായി തങ്ങളുടെ ഇഷ്ടാനിഷ്ടങ്ങളെ പുതുക്കിപ്പണിയാനും വിശ്വാസികൾക്ക് സാധിക്കണം. അതിനു കൂടി പ്രചോദിപ്പിക്കേണ്ടതാണ് കഴിഞ്ഞ ഒരു മാസം നാം അനുഷ്ടിച്ച നോമ്പ് എന്നും അദ്ദേഹം കൂട്ടിച്ചേർത്തു. ഈദ് ഗാഹ് സംഘാടക സമിതി കൺവീനർ പി.പി.ജാസിർ, എം.അബ്ബാസ്, യൂനുസ് രാജ്, എ.എം ഷാനവാസ്, സുബൈർ എം.എം, മുഹമ്മദ് ഷാജി, വി.കെ.അനീസ്, അബ്ദുൽ ജലീൽ, ഫാറൂഖ് വി.പി, സമീർ മനാമ, മുഹമ്മദ് ഷമീം, സജീർ കുറ്റ്യാടി, മുഹമ്മദ് കുഞ്ഞി, ജുനൈദ്, സിറാജ് കിഴുപ്പള്ളിക്കര, ബാസിം മുഹമ്മദ്, മുഹമ്മദ് മിൻഹാജ്, ജലീൽ, മൂസ കെ.ഹസൻ, ലത്തീഫ് കടമേരി, ജാബിർ പയ്യോളി, എൻ.കെ. അൽതാഫ്, അബ്ദുറഹീം, അജ്മൽ ശറഫുദ്ധീൻ , ഇർഫാൻ, അബ്ദുൽ അഹദ്, ഷൗക്കത്ത്, സഫീർ, അബ്ദുൽ നാസർ, അബ്ദുൽ ഹക്കീം, റഫീഖ് മണിയറ, കെ.പി.സമീർ, സലാഹുദ്ധീൻ, ഷാക്കിർ, നൗഷാദ്, ലത്തീഫ്, ഷംനാദ്, ഇജാസ് മൂഴിക്കൽ, ഷുഹൈബ്, റഹീസ്, സാജിദ സലീം, ഷൈമില നൗഫൽ , ഡോ.ലുബ്ന, റഷീദ സുബൈർ, നൗഷാദ് വി.പി, ഫാത്തിമ സ്വാലിഹ്, രേഷ്മ സുഹൈൽ, സമീറ നൗഷാദ്, തുടങ്ങിയവർ ഈദ്ഗാഹിന് നേതൃത്വം നൽകി.
